Hecho 21 - Tachi Ak'õre Pedea

Jerusalenea wãnana

¹ Mãɨ ũpẽarã ameenak'ari tai p'ãp'orrode Cos ĩjũa p'ɨrra bɨdea jĩp'a wãsidama. Norema Roda ĩjũa p'ɨrra bɨdea wãnak'ari Patará p'uurude pade wãsidama.

² Mãɨ Patarade p'ãp'orro P'enicia tuadea wãyá ũu bɨt'a unusidaɨde mãɨne batoodak'ari wãsidama.

³ Wãutade Chipre ĩjũa p'ɨrra bɨ juawieri unusidama maamina Siria tuadea jĩp'a p'asa wãsidama. Mãma Tiro p'uurude edá batoosidama, chi p'ãp'orrodepemarãpa neet'á edá ameenai k'orea.

⁴ Mãma taipa chi Jesude ĩjãapataɨrã ununana pẽra ãchi ome ewari k'ak'o siete p'aneesidama. Mãɨne ãchia Tachi Ak'õre Jaoredepa Pabloa jarasidama Jerusalenea wãpiemaapa.

⁵ Maamina ewari k'ak'o siete padak'ari tai wãsidama. Ãarea ũpẽarã, ãchi mãɨnepa ãchi warrarã tai ome p'uuru tajatá wãsidama. Mãma p'usa ipu ik'idá sĩraporode k'op'aneenak'ari Tachi Ak'õrea ɨt'aa chiidisidama.

⁶ Maapae wãnayane adak'ari p'ãp'orrode batoosidama. Ãchi tedea wãsidama.

⁷ Maapae Tirodepa p'ãp'orrode wãnak'ari Tolemaida p'uurude chesidama. Mãma ũpẽarã ak'ɨde wãnak'ari ãchi ome ewari aba p'aneesidama.

⁸ Norema wãnak'ari Cesarea p'uurude chesidama. Mãma P'elipe tede p'aneesidama. Mãɨ P'elipe chi pedea pia Jesú k'orea jaraparí pasima. Ũpẽarã k'aripapataɨrã siete jɨrɨ atadaadadepema pasima.

⁹ Ichia k'aurã tuu p'anɨrã k'ĩmari uru basima. Mãɨ wẽrarã Tachi Ak'õre pari pedeapataɨrã pasima.

¹⁰ Mãma tãaraa p'anɨne Tachi Ak'õre pari pedeaparí Agabo Judea tuadepa chesima.

¹¹ Tai ak'ɨde cheside chi Pablo k'ɨrrɨde jɨ̃parí ẽrak'ari ara ichi jĩru mãɨnepa jua jɨ̃k'ari nãɨya jarasima: —Tachi Ak'õre Jaorepa nãɨya jara bɨma: Jerusalenepema judiorãpa nãɨ k'ɨrrɨde jɨ̃parí chipari nãɨya jɨ̃naipɨ. Maapae judiorãwẽa ichi teadaipɨ.

¹² Mãɨ ũrisidaɨde taipa mãɨnepa ũpẽarã Cesarea p'uurudepemarãpa Pabloa chichupuria idisidama Jerusalenea wãpiemaapa.

¹³ Maamina Pablopa jarasima: —¿K'ãre k'orea jẽa p'anɨma? ¿K'ãarea jãɨya mɨ sõp'uapi p'anɨma? Mɨ ara jua jɨ̃nai k'orea bɨma mãɨnepa Mɨ Chipari Jesú t'ɨ̃ k'orea Jerusalene piui k'orea bɨma.

¹⁴ Mãɨne taipa ichiá jara p'aneesidama wãpiemaapa maamina ichia k'ɨ̃risia bɨt'a p'uedaé pasima. Mãɨpuru waa mãɨ k'orea pedeadaé pasima. Mãɨpari jarasidama: —Mãɨya beese, Tachi Chiparipa k'ɨ̃ria bɨ jĩra.

¹⁵ Maapae wãnai k'orea ãarea oodak'ari Jerusalenea wãsidama.

¹⁶ Chi eda waapẽarã Jesude ĩjãapataɨrã Cesarea p'uurudepemarã tai ome wãsidama. Ãchia ẽpẽra Nasón apataɨmá ateewãnak'ari tai ichi tede p'aneesidama. Ichi Chipredepema pasima. Jesude ĩjãana tãaraa pa basima.

Pablo Jerusalene Santiago ome pedeada

¹⁷ Jerusalene chesidaɨde ũpẽarãpa taiyá minachia arapá pia pedeasidama.

¹⁸ Norema Pablo tai ome Santiago ak'ɨde wãsidama. Ũpẽarã ak'ɨpataɨrã sida ãarea mãma tuanasidama.

¹⁹ Maapae Pablopa ãchiá «pia p'anɨk'ãra» ak'ari chi Tachi Ak'õrepa ichidepa judiorãwẽmá ooda ãarea nepɨrɨsima.

²⁰ Mãɨ ũrisidaɨde ũpẽarãpa Tachi Ak'õrea pia pedeasidama. Maapae Pabloa jarasidama: —Ũpẽa, pɨa k'awa bɨma judiorã minachia p'anɨrãpa Jesude ĩjãa p'anɨt'a mãɨnepa Moisepa bɨda minachia ĩjãa p'anɨt'a.

²¹ Maamina pɨ k'orea sea ũrisidama. Waapẽarãpa ãchiá jarasidama pɨa ãarea judiorã griego t'ãena berã́ Moisé itu bɨpi bɨt'a, ãchi warrarã k'ak'ua tauchaapik'at'a mãɨnepa awara tachi judiorãpa oopataɨ oopik'at'a.

²² ¿Sãmaasã́ oodaima mãɨ seat'a k'awadamẽrá? Pɨ cheda tãaraawẽane k'awadaipɨ. Maapae piarã pɨ mĩapidai k'orea minachia chedaipɨ.

²³ Mãɨpuru taimá pɨa nãɨya ooi bɨma: tai t'ãena ũpẽarã k'ĩmari p'anɨma. Ãchia Tachi Ak'õre k'ĩrari ne oodai jaradada ãarea ooutama.

²⁴ Mãɨ ũpẽarã Tachi Ak'õre te minachia bɨdea ateewãse. Mãma chi Tachi Ak'õre k'ĩrari pia p'ananai k'orea oot'ɨ. Ãchia Tachi Ak'õrea teadai p'anɨt'a mãɨ pɨapuru tease. Mãɨyara ãchi p'ue poro u'urua wẽpidaipɨ k'awapidai k'orea ãchia ne ooi jaradaadat'a jõma oosidama. Mãɨpa ãareaɨrãpa k'awadaipɨ chi pɨ k'orea jara p'anɨt'a mãɨ seat'a, mãɨnepa k'awadaipɨ pɨ piarã jĩp'a baparit'a Moisepa bɨdade jara bɨ jĩra.

²⁵ Maamina judiorãwẽ Jesude ĩjãapataɨrãpa oodai p'anɨt'a taipa k'awa jaradak'ari k'art'ade bɨsidama: ãchia juapa oodada sãdoa teadada k'odaiwẽa p'anɨma, oa k'odaiwẽa p'anɨma, ãnimara ojɨ̃ peadada k'odaiwẽa p'anɨma mãɨnepa awaraɨ ome nemietá oodaiwẽa p'anɨma.

²⁶ Norema Pablopa mãɨ ẽpẽerã ichi ome ateewãnak'ari, ne oosidama Tachi Ak'õre k'ĩrari pia p'ananai k'orea. Mãɨne Tachi Ak'õre te minachia bɨdea wãnak'ari jarasidama sãɨ ewaride Tachi Ak'õre k'ĩrari pia p'ananait'a. Mãɨ ewaride ãchicha Tachi Ak'õrea ãnimara paateadai p'anasidama.

Judiorãpa Pablo jitadada

²⁷ Maamina siete ewari pamaa bɨde chi eda waapẽarã judiorã Asia tuadepema Tachi Ak'õre te eda p'anasidama. Mãɨ judiorãpa Pablo unusidaɨde ẽpẽerã ãarea arí p'anɨ k'ĩruupik'adak'ari Pablo jitasidama.

²⁸ Mãɨne jĩk'ua jara p'anasidama: «¡Israel ĩjũanepemarã, tai k'aripat'ɨ! Nãɨ ẽpẽrapa tuacha jaratea bɨma tachi israel ĩjũanepemarã, Moisepa bɨda mãɨnepa Tachi Ak'õre te minachia bɨ piawẽa bet'a. ¡Mãɨ awara griegorã Tachi Ak'õre te minachia bɨ edaria ateewãsima! ¡Nãɨ te abapuru Tachi Ak'õre pae bɨt'a mietá bɨsima!»

²⁹ Mãɨya jarasidama chi Ep'esodepema Tróp'imo, Pablo ome p'uurude nipadada ununana pẽra. Ãchia k'ɨ̃risiasidama Pablopa Tróp'imo Tachi Ak'õre te minachia bɨ edaria ateewã basit'a.

³⁰ Mãɨne jõma Jerusalenepemarã k'ĩruupik'adak'ari p'ira errosidama. Pablo jitadak'ari Tachi Ak'õre te eda jidibari ateewãsidama. Maapae chi eda wãpataɨ ãarea jɨ̃ak'oasidama.

³¹ Pablo pea k'ɨ̃ria p'anɨmisa abaɨpa romanepema papaká berã chi atepe poro chaarea bɨa jarade wãsima ãarea Jerusalene p'anɨrã k'ĩruupik'asidat'a.

³² Ara mãɨne ichi mãɨnepa ichi papaká berã chi mãɨrã chaarearã t'ɨ̃k'ari ẽpẽerã k'ĩruupik'a p'anɨmá p'ira wãsidama. Judiorãpa ãchi cheuta unusidaɨde Pablo sĩ p'anana itu bɨsidama.

³³ Chi papaká berã chi atepe poro chaarea bɨ ará cheside Pablo jitak'ari k'ãnena umeepa jɨ̃pisima. Maapae ẽpẽerã minachia cheepɨradadá idisima Pablo k'ait'a, mãɨnepa k'ãre oosit'a k'awai k'orea.

³⁴ Mãɨne ãareaɨrã ãchi k'ĩra awara awará bia tuaneesidama. Maamina chi papaká berã poro chaarea atepe bɨpa k'awa ũrik'a pasima ẽpẽerã minachia k'ĩruupik'a p'anɨ pẽra. Mãɨpuru Pablo chi papaká berã tuanapataɨmá ateewãpisima.

³⁵ Chi tumane pasidaɨde mãmãɨpa chi papaká berãpa Pablo jira ateewãsidama, judiorã minachia k'ĩruupik'a p'anɨ pẽra.

³⁶ Ãchi papaká berã k'aade wãsidaɨde, jĩk'ua jarapachidama: «¡Ichi peat'ɨ!»

Pablopa judiorã minachia cheepɨradadá jarada

³⁷ Papaká berãpa Pablo ãchi tuanapataɨ tede eda ateewãutade Pablopa chi poro chaarea bɨa griego pedeade nãɨya idisima: —¿Pia bɨk'ãra mɨ pɨ ome ne pedeait'a? Chi poro chaarea bɨpa p'anoosima: —¿Pɨa griego pedea k'awa bɨk'ãra?

³⁸ ¿Pɨwẽk'ãra chi Egitodepema, ẽpẽerã naena k'ĩruupik'ari, mẽaɨrã k'ak'o cuatro mil ĩjũa pania newẽa bɨdea ateewãnat'a?

³⁹ Mãɨne Pablopa jarasima: —Mãɨyawẽma, mɨ judiopɨ. Cilicia tuadepemapɨ. Tarso p'uuru atepe bɨde t'õsima. Mɨ chichupuria p'uuru k'ĩrari itu pedeapise.

⁴⁰ Chi poro chaarea bɨpa itu pedeapisima. Maapae Pablo tumene bai nɨbɨpa ichi juapa ẽpẽerã k'ĩup'eapisima. K'ĩup'easidaɨde hebreo pedeade pedeasima.