Hecho 20 - Tachi Ak'õre Pedea

Pablo Macedonianea mãɨnepa Greciadea wãna

¹ Mãɨya k'ĩruupik'a para bak'ari itu bɨdak'ari Pablopa chi Jesude ĩjãapataɨrã t'ɨ̃k'oak'ari ãchi ome pedeasima Tachi Chiparide pia ĩjãanamẽrá. Maapae wãyane ak'ari Macedonia tuadea wãsima.

² Ãarea mãɨ tuade p'ɨrrɨa nipaside ũpẽarã k'aripapachima Tachi Chiparide pia ĩjãanamẽrá. Maapae Grecia tuade chesima.

³ Mãma jedek'o ũpea basima. Pablo Siria tuadea p'ãp'orrode wãi paside k'awasima judiorãpa ichi piawẽa oodai k'orea pedea ausidama. Mãɨpuru Macedonia tuade p'asa wãsima.

⁴ Ichi ome nãɨrã Asia tuadea wãsidama: chi Berea p'uurudepema Pirro warra Sópater, Tesalónica p'uurudepema Segundo mãɨnepa Aristarco, Derbe p'uurudepema Gayo; mãɨnepa Asia tuadepema Tík'ik'o mãɨnepa Tróp'imo. Timoteo sida ichi ome wãsima.

⁵ Mãɨ ũpẽarã tai naa wãnak'ari Troa p'uurude nɨ p'anasidama.

⁶ P'ana ooropiparí newẽa k'opataɨ ewari pak'ari tai P'ilipo p'uurudepa p'ãp'orrode wãsidama. Ewari k'ak'o joesomaane ãchi ome Troa p'uurude chi unusidama. Mãma ewari k'ak'o siete p'aneesidama.

Troa p'uurude tuanana

⁷ Maapae chi naapema ewari tomione tai mãɨnepa chi waapẽarã Jesude ĩjãapataɨrã ará p'anasidama chi Tachi Chiparidepema k'ɨ̃risiapataɨ nek'opataɨ k'odai k'orea. Mãɨne Pablopa jaratea basima. Norema wãi bɨ pẽra waa teamasi estarik'a pedeasima.

⁸ Tai chi te ɨt'ɨ pará bɨmá ará p'anasidama. Ĩpira minachia k'oa nɨbasima.

⁹ Mãɨne k'ũtã́ Eutico apataɨ tajatá ak'ɨpataɨde suak'abari basima. Pablo tãaraa pedea bɨ pẽra mãɨ k'ũtã́ tap'ok'eapa k'ãi beesima. Mãɨya bɨde chi te k'ɨda k'ak'o ũpeaɨdepa jeedaa baewãsima. Ichi jɨrɨde wãsidaɨde, mãɨ piubari bɨt'a unusidama.

¹⁰ Pablo edá wãk'ari chi k'ũtã́ ɨ̃rɨ sĩraporode bedabari k'obeek'ari oresima. Mãɨne jarasima: —P'erarãt'ɨ. Ichi chok'ae bɨma.

¹¹ Pablo mãicha tede eda wãk'ari chi Tachi Chiparidepema k'ɨ̃risiapataɨ nek'opataɨ k'odai k'orea ãchi ome k'osima. Maapae ãsaparudea mãicha pedea bak'ari wãsima.

¹² Chi k'ũtã́ ichi tedea chok'ae ateewãsidama. Mãɨpuru ãareaɨrã arapá tuaneesidama.

Troa p'uurudepa Mileto p'uurudea wãnana

¹³ Pablo Asó p'uurudea jĩte wãi k'ɨ̃risiasima. Maamina tai p'ãp'orrode naa wãpisima. Mãma ichi batooyade asima. Tai ara mãɨne wãsidama.

¹⁴ Asode Pablo tai ome ará ununak'ari p'ãp'orrode batoosima. Maapae Mitilene p'uurudea wãsidama.

¹⁵ Mãmãɨpa wãnak'ari norema Quío ĩjũa p'ɨrra bɨ k'ĩrari chesidama. Norema Samo p'uurude chesidama. Maapae Trogiliodea wãnak'ari, norema Mileto p'uurude chesidama.

¹⁶ Pablo Asia tuade tãaraa baemaapa Ép'eso p'uurude wãwẽa p'asa wãsima. Ichi isapea Jerusalene che k'ɨ̃ria basima, p'ue cherupara, Pentecosté ewaride mãma bai k'orea.

Pablopa ũpẽarã Ep'esodepemarã́ pedeada

¹⁷ Mileto p'uurude bɨde Pablopa chi Ep'esodepema ũpẽarã ak'ɨpataɨrã t'ɨ̃pisima.

¹⁸ Ichimá chesidaɨde Pablopa jarasima: «Mãrapa k'awa p'anɨma mɨ nãɨ Asia tuade chesiedapema sãmaasã́ mãra t'ãena bapachit'a.

¹⁹ Mɨa chi Tachi Chiparipa k'ɨ̃ria bɨt'a oo baside, chi atepe bait'a k'ɨ̃riaé pasima. Edaɨde jẽa bapachima mãɨnepa judiorãpa mɨ piawẽa oo k'ɨ̃ria p'anana pẽra mĩa bapachima.

²⁰ Maamina mɨa ãareaɨrã k'ĩrari mãɨnepa mãra techa mãra k'aripai k'orea jaratea bapachima. Mi ãpia pida jarateai amaa bak'a pasima.

²¹ Judiorã́ mãɨnepa judiorãwẽa mɨa jarasima nemietá oopataɨ itu bɨdak'ari Tachi Ak'õremá chedamẽrá mãɨnepa tachi Chipari Jesucristode ĩjãanamẽrá.

²² »Naapae Tachi Ak'õre Jaorepa mɨ wãpi bɨ pẽra, Jerusalenea wãipɨ. Maamina mɨa atua bɨma jãma mɨ k'ãre ne baeit'a.

²³ Abapuru k'awa bɨma Tachi Ak'õre Jaorepa mɨá k'awapi bɨma p'uurucha mɨ mĩa bait'a mãɨnepa mɨ jɨ̃a nɨbɨ bait'a.

²⁴ Maamina mãɨ k'orea mɨa minachia k'ɨ̃risiak'ama, mɨ pia bai jɨrɨwẽa bɨ pẽra. Abapuru chi Tachi Chipari Jesupa mɨá oopi bɨt'a mãɨ ãarea oo k'ɨ̃ria bɨma. Mãɨpuru chi pedea pia Tachi Ak'õrepa ichi sõpiadepa k'aripa bɨ k'orea mɨa pedea baipɨ.

²⁵ »Tachi Ak'õrepa ichidirã ichi juade ua p'anɨ k'orea mɨa mãɨ mãrá jara bapachima. Maamina naapae k'awa bɨma mãrapa mɨ waa ununaiwẽt'a.

^26-27 Mɨa ne wap'eawẽa Tachi Ak'õrepa mãra pae oo k'ɨ̃ria bɨt'a ãarea pia jara bapachima. Mãɨpuru idi mɨa jararuma: abaɨ atuaipɨra, mɨ nepɨra newẽma.

²⁸ »Tachi Ak'õrepa ichi Warra oadepa ẽpẽerã ichi pae atasima. Tachi Ak'õre Jaorepa mãra bɨsima ũpẽarã ak'ɨ p'ananamẽrá. Mãɨpuru ara mãra tuaba minachia jĩrak'aua p'anat'ɨ mãɨnepa Tachi Ak'õre warrarã ãarea ak'ɨ p'anat'ɨ.

²⁹ Mɨa k'awa bɨma mɨ wãk'ari ẽpẽra k'achiarã usa k'achia jĩra mãra t'ãena chedaipɨ chi ũpẽarã ãyá wãpidai k'orea.

³⁰ Ara machidepemarã pida sea jarateadaipɨ Jesude ĩjãapataɨrã ãyá wãnamẽrá.

³¹ Mãɨpuru jĩrak'aua p'anat'ɨ. K'ɨ̃risiat'ɨ mɨa ãyo k'ak'o ũpea, ãst'á mãɨnepa teamasi jẽa bɨpa machicha chi sea jarateapataɨrã k'orea ũraa basit'a.

³² »Naapae, mɨa mãra Tachi Ak'õre juade bɨipɨ. Ichi sõpiadepa tachi k'aripa bɨ k'orea pedea k'ɨ̃risiat'ɨ. Ichi sõpiadepa jua chaarea teaparima mãrapa pia ĩjãanamẽrá. Chi ichia teai jaradat'a ichi sõpiadepa mãrapa mãɨnepa ãarea chi ichi pae pia bɨdarãpa mãɨ jitadaipɨ.

³³ »Mɨa chĩara p'arat'a, nee wa chi neet'á ara mɨ pae k'ɨ̃riaé pasima.

³⁴ Mãrapa minachia k'awa p'anɨma ara mɨ juapa mimiasit'a, chi mɨa uru bai bɨt'a ata bai k'orea mãɨnepa chi mɨ ome p'ɨrrɨapataɨrã́ teai k'orea.

³⁵ Ãarea mɨa oodadepa mãrá k'awapisima ɨbɨa mimia p'anɨnepa chichupuria k'ede k'aripadai p'anɨt'a. K'ɨ̃risiadai p'anɨma Tachi Chipari Jesupa nãɨya jarasit'a: “Piipará bɨma abaɨa ne teait'a chi mãɨ jitai k'aepẽra”».

³⁶ Mãɨya jarak'ari Pablo sĩraporode k'obeek'ari ãarea ãchi ome Tachi Ak'õrea ɨt'aa chiidisima.

³⁷ Maapae pia wãpidai k'orea ãareaɨrã minachia jẽa p'anɨpa Pablo oredak'ari uitarrade sõsidama.

³⁸ Minachia sõk'achia p'aneesidama, waa ununaiwẽane ada pẽra. Maapae ichi ome p'ãp'orrodea wãsidama.