Hecho 18 - Tachi Ak'õre Pedea

Pablo Corinto p'uurude bada

¹ Mãɨya nak'ari Pablo Atena p'uurudepa Corinto p'uurudea wãsima.

^2-3 Mãma judio Aquila apataɨ unusima. Mãɨ Aquila Ponto tuadepema pasima. Chi k'ima Priscila ome Italia tuadepa chedada tãaraawẽa basima. Italiadepa wã p'anasima, chi Romanepema chi atepe chaarea bɨ Claudiopa judiorã ãarea Romane bee ãyá jerek'oada pẽra. Corinto p'uurude Pablo ãchimá wãsima ãchi jĩra p'aru te oo k'awa bɨ pẽra. Maapae ãchi ome beesima tausia mimiai k'orea.

⁴ Mimianak'apɨ́ ewaricha Pablo judiorã ará pedeapataɨ tede pedea bapachima judiorãpa mãɨnepa griegorãpa Jesude ĩjãanamẽrá.

⁵ Mãɨya bɨde Sila mãɨnepa Timoteo Macedonia tuadepa chesidama. Mãmãɨpa Pablopa ewaricha Tachi Ak'õre pedea jaratea bapachima. Ichia judiorã́ jarapachima Jesú piarã Tachi Ak'õrepa Tachi K'aripaparí teai jaradat'a.

⁶ Maamina ichia jara bɨt'a ãchia itu bɨsidama. Mãɨnepa ichi k'orea k'achia pedeapachidama. Mãɨpuru Pablopa chi neet'á ɨ̃rɨ jɨ̃ bɨ jĩnap'et'asima, chi ãchia oodada ichia mãɨ k'ɨ̃riawẽa bɨt'a k'awapii k'orea. Nãɨya jarasima: —Mãrapa mãɨ pedea ĩjãanaepɨra, mãɨ mɨ nepɨra newẽma. Chi mɨa mãra pae ooi badat'a, mãɨ ãarea oosima. Idiidepa mɨ judiorãwẽmá wãipɨ.

⁷ Mãɨne Pablo chi judiorã ará pedeapataɨ tedepa wãk'ari, Ticio Justo apataɨ temá jarateade wãsima. Mãɨ ẽpẽrapa Tachi Ak'õre wap'ea basima. Ichi te judiorã ará pedeapataɨ tek'á basima.

⁸ Judiorã ará pedeapataɨ tedepema chi chaarea bɨ Crispo apachidama. Mãɨ Crispopa mãɨnepa ãarea ichidirãpa Tachi Chiparide ĩjãasidama. Mãɨ awara minachia Corinto p'uurudepemarãpa ũrisidama Pablopa Jesú k'orea jaratea bɨt'a. Ĩjãanak'ari porochoasidama.

⁹ Ewariaba teamasi Pablopa k'ãmok'araa jĩra unusima Tachi Chiparipa ichiá nãɨya jararut'a: «Ne wap'earãse. Jaratea base. K'ĩup'earãse.

¹⁰ Mɨ pɨ ome bɨma. Abaɨ pida pɨ p'ue piawẽa ooiwẽma, mɨa ẽpẽerã minachia nãɨ p'uurude uru bɨ pẽra».

¹¹ Mãɨpuru Pablopa ãyo abaak'ari ya estarik'a Tachi Ak'õre pedea mãma jaratea beesima.

¹² Galión apataɨ Acaya ĩjũanepema chi chaarea bɨ beeside judiorãpa ará pedeadak'ari Pablo jitadak'ari, ichi mãɨ Galión k'ĩrari ateesidama.

¹³ Ãchia jarasidama: —Cha bɨpa ẽpẽerã́ jara bɨma Tachi Ak'õre minachia k'ɨ̃rianai p'anɨt'a maamina tachi romanepemarãpa bɨdade bɨ jĩra jarateak'ama.

¹⁴ Pablo pedearu paside Galionpa judiorã́ jarasima: —Nãɨ ẽpẽrapa piawẽa oodapara wa k'achia atepe oodapara mɨa mãra pedea sẽwẽa ũrii pasima.

¹⁵ Maamina mãrapa chi jaratea bɨ k'orea, mãra Tachi Ak'õre t'ɨ̃ k'orea mãɨnepa mãra Moisepa bɨda k'orea pedea p'anɨma. Mãɨpuru ara mãra tuaba mãɨ ak'ɨt'ɨ. Mɨa mãɨ k'orea ak'ɨi k'orea bɨwẽma.

¹⁶ Mãɨya jarak'ari ãyá jerek'oasima.

¹⁷ Mãɨne ãareaɨrãpa chi judiorã ará pedeapataɨ tedepema chi chaarea bɨ Sóstene jitadak'ari ara mãma jok'aesidama. Maamina Galionpa mãɨ k'orea ne ãpia pida ooé pasima.

Pablo jĩitea Antioquiadea wãna

¹⁸ Pablo Corinto p'uurude tãaraa basima. Mãɨne chi ũpẽarã ará p'anɨrã́ wãyane asima. P'ãp'orrode batooi naena Pablo Cencrea p'uurude poro t'ɨɨpisima, Tachi Ak'õre pae ne ooyade ada mãɨ ãarea ooda pẽra. Maapaepuru Siria tuadea wãsima, Aquila chi k'ima Priscila ome.

¹⁹ Wãutade Ép'eso p'uurude padak'ari Pablo chi Aquila, Priscila ome p'anana ãchi ãyá wãsima. Mãɨne judiorã ará pedeapataɨ tedea wãk'ari judiorã ome Jesú k'orea pedeasima.

²⁰ Ãchia ichiá chichupuria idisidama mãma tãaraa beemẽrá, maamina beei k'ɨ̃riaé pasima.

²¹ Mãɨpari wãrune nãɨya jarasima: —Tachi Ak'õrepa k'ɨ̃riasira mɨ mãicha mãra ak'ɨde cheipɨ. Maapae p'ãp'orrode batook'ari Ep'esodepa wãsima.

²² Cesarea p'uurude chek'ari Pablo Jerusalenea ũpẽarã ak'ɨde wãsima. Mãmãɨpa Antioquía p'uurudea wãsima.

Apolo Ep'esodea cheda

²³ Pablo mãma tãaraa bak'ari Galacia tuade mãɨnepa P'rigia tuade p'ɨrrɨasima. P'uurucha chi Jesude ĩjãapataɨrã́ jarateasima pia ĩjãanamẽrá.

²⁴ Mãɨmisa judio Apolo apataɨ Ép'eso p'uurude chesima. Mãɨ Apolo Alejandría p'uurudepema pasima. Ichia nepia pedeapachima mãɨnepa Tachi Ak'õre k'art'a sida minachia k'awa basima.

²⁵ Mãɨ Apoloa naena Tachi Chipari O jarateapachidama. Jesú k'orea minachia sõpia pedeapachima mãɨnepa arí jaratea bapachima. Maamina porochoai k'orea abapuru Juanpa jaratea badat'a k'awa basima.

²⁶ Mãɨne Apolopa judiorã ará pedeapataɨ tede ne wap'eawẽa jaratea basima. Ichia jaratea bɨt'a Aquilapa mãɨnepa Priscilapa ũrisidama. Mãɨpuru ichi ãyá ateewãnak'ari Tachi Ak'õre O k'orea atepe jarateasidama.

²⁷ Mãɨya nak'ari Apolo Acaya tuadea wã k'ɨ̃ria basima. Mãɨpuru ũpẽarã Ep'esodepemarãpa ichi wãit'a pia bɨade asidama. K'art'a bɨsidama Jesude ĩjãapataɨrãpa ichi mãma “pɨ pia chesiade” adamẽrá. Acaya tuade cheside Apolopa ũpẽarã Tachi Ak'õre sõpiadepa Jesude ĩjãanana minachia k'aripasima.

²⁸ Ichia jaratea bɨde judiorãpa seaade autacha ãareaɨrã k'ĩrari pia k'awapipachima ãchia Jesú k'orea piawẽa k'ɨ̃risia p'anɨt'a. Tachi Ak'õre pedeadepa minachia k'awapipachima Jesú piarã Tachi Ak'õrepa Tachi K'aripaparí teai jaradat'a.