Hecho 16 - Tachi Ak'õre Pedea

Timoteo Pablo ome p'ɨrrɨada

¹ Mãɨne Pablo Derbe p'uurudea wãk'ari mãmãɨpa Listra p'uurudea wãsima. Mãma Jesude ĩjãa bɨ aba Timoteo apataɨ basima. Timoteo nae judio pasima; Jesude ĩjãa basima. Ichi ak'õre griego pasima.

² Ũpẽarã Listradepemarãpa mãɨnepa Iconio p'uurudepemarãpa mãɨ Timoteo k'orea pia jarapachidama.

³ Mãɨne Pablopa Timoteo ateewã k'ɨ̃ria basima. Maamina ãareaɨrãpa k'awa p'anasidama Timoteo ak'õre griego pasit'a. Mãɨpuru Pablopa Timoteo k'ak'ua tauchaasima judiorã mãɨ tuade berãpa ichi k'orea piawẽa k'ɨ̃risiapidaemaapa. Maapae wãsidama.

⁴ Ãchi wãuta p'uurucha jarasidama Jesupa peedaɨrã mãɨnepa ũpẽarã ak'ɨpataɨrã Jerusalene berãpa k'art'ade bɨdada ũpẽarãpa ĩjãa p'ananamẽrá.

⁵ Mãɨya ũpẽarãpa Tachi Chiparide minachia ĩjãasidama mãɨnepa ewaricha eapasidama.

Pablopa Macedonianepema ẽpẽra ununa

⁶ Pablo mãɨnepa chi ichi ome nipadada P'rigia tuade mãɨnepa Galacia tuade p'ɨrrɨa wãsidama Tachi Ak'õre Jaorepa chi pedea Jesú k'orea Asia tuade itu jarapidawẽ pẽra.

⁷ Misia tuade wãsidaɨde k'ɨ̃risiasidama Bitinia p'uurudea wãnait'a, maamina Jesú Jaorepa mãmá pida itu wãpié pasima.

⁸ Mãɨpuru Misia tuade p'asa wãnak'ari Troa p'uurudea pasidama.

⁹ Teamasi Pablopa k'ãmok'araa jĩra unusima ẽpẽra Macedonia tuadepema bai nɨbɨt'a. Mãɨ ẽpẽrapa Pabloa nãɨya chichupuria idisima: «Macedonianea tai k'aripade chese».

¹⁰ Pablopa mãɨ ununa pẽra taipa k'awasidama Tachi Ak'õrepa tai t'ɨ̃ basit'a, chi pedea pia Jesú k'orea Macedonianepemarã́ jaradamẽrá. Ara mãɨne neet'á oodak'ari wãnayá p'aneesidama.

¹¹ Troa p'uurudepa p'ãp'orrode batoodak'ari jĩp'a wãnak'ari Samotracia ĩjũa p'ɨrra bɨde pasidama. Norema Neápoli p'uurude chesidama.

¹² Mãmãɨpa P'ilipo p'uurudea jĩte wãnak'ari mãma ewari k'ak'o tãaraawẽa p'anasidama. Mãɨ p'uuru Macedonia tuade p'uuru chi atepe bɨ pasima. Romanepemarã mãma p'anapachidama.

¹³ Mimianak'apɨ́ ewaride tai p'uuru tajatá wãnak'ari toedá wãsidama. Mãma judiorãpa Tachi Ak'õrea ɨt'aa chiidipataɨde ununai k'ɨ̃risiasidama. Wãutade wẽrarã ará posoa nɨbɨ unusidama. Jeeda suak'abari p'aneenak'ari taipa ãchiá pedeasidama.

¹⁴ Mãɨ wẽrarãnepema aba Lidia apachidama. Ichi Tiatira p'uurudepema pasima. P'aru k'ĩra pia arena bɨ netopachima. Mãɨ judiowẽ wẽrapa Tachi Ak'õre wap'ea basima. Tachi Chiparipa ichiá ũripisi pẽra Pablopa chi pedea bɨt'a Lidiapa pia ũrik'ari ĩjãasima.

¹⁵ Lidia mãɨnepa ãarea chi ichi tedepemarã porochoasidaɨde taiyá chichupuria idisima ichi tede p'aneenamẽrá. Nãɨya jarasima: —Mãramá mɨa piarã Tachi Chiparide ĩjãasira mɨ tede p'aneene chet'ɨ. Mãɨya tai ichi tede p'aneepisima.

Pablo, Sila ome eda jɨ̃a nɨbɨ p'anana

¹⁶ Ewariaba chi Tachi Ak'õrea ɨt'aa chiidipataɨmá wãutade taipa chipari pae pari mimiaparí ãwẽra jaore mietá pará bɨt'a unusidama. Mãɨ wẽrapa chi jaore mietaadepa chi ne mãɨya baeit'a jarapachima. Mãɨnepa ichi chiparirãpa erreara minachia jitapachidama.

¹⁷ Mãɨ ãwẽra Pablo tai ome k'aadea cherude jĩk'ua jarapachima: —¡Nãɨ ẽpẽerã Tachi Ak'õre chi Choma bɨ pae pari mimiapataɨrãpɨ! Ãchia mãrá jara p'anɨma sãmaasã́ mãɨ Tachi Ak'õrepa tachi k'aripaparit'a.

¹⁸ Ichia ewari minachia mãɨya jĩk'ua jara nipada pẽra Pablo sẽsima. Ichimá ak'ɨk'ari chi jaore mietá uru bɨa jarasima: —Mɨa Jesucristo t'ɨ̃nepa pɨá jararuma: nãɨ ãwẽranepema ãyá wãse. Ara mãɨne chi jaore mietá wãsima.

¹⁹ Mãɨne chi ãwẽra chiparirãpa k'awasidama ichidepa waa erreara jitadaiwẽt'a. Mãɨpuru Pablo mãɨnepa Sila jitadak'ari chi p'uuru chaarearãmá ateewãsidama.

²⁰ Chi nepɨra ak'ɨpataɨrã k'ĩrari nɨbɨdak'ari jarasidama: —Cha p'anɨ judiorãpa tachi p'uuru k'ĩruupi p'anɨma.

²¹ Chi tachi romanepemarãpa ne oodak'á p'anɨt'a ãchia mãɨ jaratea p'anɨma.

²² Mãɨne ãarea chi arí p'anɨpa Pablo Sila ome p'anɨmá baesidama. Mãɨya p'anɨne chi nepɨra ak'ɨpataɨrãpa ãchi neet'á wẽapidak'ari pak'urupa upisidama.

²³ Minachia udak'ari eda jɨ̃a nɨbɨsidama. Chi jɨ̃a nɨbɨpataɨ te ot'eaparia jarasidama minachia ak'ɨmẽrá.

²⁴ Ara mãɨne chi jɨ̃a nɨbɨpataɨ te ot'eaparipa Pablo mãɨnepa Sila chi tede eda bɨde bɨk'ari ãchi chi ẽpẽra bɨɨrɨ k'aat'ɨ nɨbɨpat'aɨde k'aat'ɨ nɨbɨsima.

²⁵ Teamasi estarik'a parude Pablopa mãɨnepa Silapa Tachi Ak'õrea ɨt'aa chiidi p'anasidama mãɨnepa ichiá k'ari p'anasidama. Mãɨ waapẽarã jɨ̃a nɨbɨdarãpa ũri p'anasidama.

²⁶ Mãɨya bɨde iurumia ɨbɨa wãsima. Mãɨpa chi jɨ̃a nɨbɨpataɨ te jĩru minachia oresima. Ara mãɨne ãarea chi eda wãpataɨ itu ewak'oa wãsidama. Chi jɨ̃a nɨbee k'ãnena baek'oawãsima.

²⁷ Mãɨne chi jɨ̃a nɨbɨpataɨ te ot'eaparí ɨ̃rɨmasima. Eda wãpataɨ ewa nɨbeeda unuside k'ɨ̃risiasima chi jɨ̃a nɨbee ãarea mĩruwãsidama. Mãɨ k'orea ichi k'ĩruuparí nek'o ẽut'aasima ara itu piui k'orea.

²⁸ Maamina Pablopa jĩk'ua jarasima: —Pɨ tuaba piurãse. Tai ãarea nãma p'anɨma.

²⁹ Maapae chi jɨ̃a nɨbɨpataɨ te ot'eaparipa ĩpira enemeepik'ari Pablo mãɨnepa Sila p'anɨmá isapea eda wãsima. Ne wap'eapa k'ak'ua ore nɨbɨpa ãchi k'ĩrari bedabari k'obeesima.

³⁰ Maapae ãchi tajatá ateewãk'ari idisima: —Ẽpẽrarã, mɨa ¿k'ãre ooi bɨma Tachi Ak'õrepa mɨ k'aripamẽrá?

³¹ Ãchia p'anoosidama: —Pɨa mãɨnepa pɨ ẽpẽerãpa Tachi Chipari Jesucristode ĩjãanaipɨra, ichia mãra k'aripaipɨ.

³² Maapae Tachi Chipari pedea ichiá mãɨnepa ãarea ichi tedepemarã́ jarasidama.

³³ Ara mãɨ teamasi chi jɨ̃a nɨbɨpataɨ te ot'eaparipa ãchi k'ak'ua k'õnana sɨɨsima. Mãɨya nak'ari ichi mãɨnepa ichi tedepemarã porochoasidama.

³⁴ Pablo mãɨnepa Sila ichi tedea ateewãk'ari nek'opisima. Tachi Ak'õre ĩjãanana pẽra ichi mãɨnepa ichi tedepemarã minachia sõ arapaasidama.

³⁵ Norema chi p'uurudepema chaarearãpa ãchi chi eda ot'eapataɨrã chi jɨ̃a nɨbɨpataɨ te ot'eaparia nãɨya jarade peesidama: «Pablo mãɨnepa Sila awara k'ẽet'aase».

³⁶ Maapae chi jɨ̃a nɨbɨpataɨ te ot'eaparipa Pabloa jarasima: —Chi chaarearãpa mãra k'ẽet'apade a jara peesidama. Mãɨpuru sõpia wãt'ɨ.

³⁷ Maamina Pablopa chi ot'eapataɨrã́ jarasima: —Tai romanepemarã p'anɨmina, tai nepɨra ak'ɨdawẽa tai ẽpẽerã taade upidak'ari maapae paritua k'orea jɨ̃a nɨbɨsidama. Naapaepuru, ¿mẽra ewa peedayá p'anɨk'ãra? ¡Mãɨyawẽma! ¡Ara ãchi chedai p'anɨma tai awara ateewãnai k'orea!

³⁸ Chi ot'eapataɨrãpa chi Pablopa jarada chi chaarearã́ jarade wãsidama. Ãchia Pablo mãɨnepa Sila romanepemarã ũrisidaɨde wap'easidama.

³⁹ Ara mãɨne ãchimá wãnak'ari k'ĩra chupuria idisidama chi ãchia oodada k'ɨ̃risia atuadamẽrá. Maapae chi jɨ̃a nɨbɨpataɨ tedepa awara ateewãnak'ari chichupuria idisidama p'uurudepema ãyá wãnamẽrá.

⁴⁰ Pablo mãɨnepa Sila chi jɨ̃a nɨbɨpataɨ tedepa awara wãk'ari Lidia tedea wãsidama. Chi ará p'anɨ ũpẽarã ome pedeasidama Tachi Chiparide pia ĩjãanamẽrá. Maapae wãsidama.