Hecho 14 - Tachi Ak'õre Pedea

Iconio p'uurude p'anana

¹ Iconio p'uurude ãchia oopataɨ jĩra Pablo mãɨnepa Bernabé judiorã ará pedeapataɨ tede eda wãsidama. Ãchia jaratea p'anɨt'a minachia judiorãpa mãɨnepa griegorãpa Jesude ĩjãasidama.

² Maamina chi judiorã Jesude ĩjãawẽa bepa mãɨ judiorãwẽpa chi ũpẽarã k'orea piawẽa k'ɨ̃risiapisidama.

³ Maamina Pablo mãɨnepa Bernabé mãma tãaraa p'anasidama. Tachi Chiparipa k'aripa bɨ sõnepa ĩjãa p'anɨ pẽra ichi k'orea ne wap'eawẽa jarateapachidama. Mãɨne Tachi Chiparipa ãchiá jua chaarea teasima ẽpẽerãpa ne p'ue oodak'apɨ́ oodamẽrá. Mãɨya k'awapisima ichi sõpiadepema ãchia jaratea p'anɨ piarãt'a.

⁴ Maamina mãɨ p'uurudepemarãpa awara awará k'ɨ̃risia p'aneesidama. Chi eda waapẽarã Pablo mãɨnepa Bernabé ome p'anasidama, mãɨnepa chi waapẽarã judiorã ome p'anasidama.

⁵ Mãɨne judiorã mãɨnepa judiorãwẽ chi p'uurudepema chaarearã ome pedea ausidama Pablo mãɨnepa Bernabé mĩapidak'ari mawarapa bat'a peadai k'orea.

⁶ Maamina Pablo mãɨnepa Bernabepa mãɨ k'awasidaɨde Licaonia tuadea mĩruwãsidama. Listra p'uurudea mãɨnepa Derbe p'uurudea wãsidama. Ãarea mãɨ Licaonia tuade p'ɨrrɨasidama.

⁷ Mãma ãchia chi pedea pia Jesú k'orea jarapachidama.

Listra p'uurude p'anana

⁸ Listra p'uurude ẽpẽra jĩru sorek'ea bɨ basima. Mãɨ ichi t'õnaenapema p'ue ewariaba pida p'ue wãk'a pasima. Mãɨ ẽpẽra suak'abari badapa

⁹ chi Pablopa pedea bɨt'a ũrisima. Pablopa ichimá ak'ɨrude k'awasima ichia piarã ĩjãa bɨ Jesupa ichi p'ue jɨpa beepiit'a.

¹⁰ Mãɨpuru Pablopa ichiá jĩk'ua jarasima: —¡P'irabarise! ¡Bai nɨbeese! Ara mãɨne ichi ɨt'aa jĩitɨk'ari wãpodosima.

¹¹ Pablopa ooda unusidaɨde mãɨ p'uurudepemarãpa licaonia pedeade ɨbɨa jara tuaneesidama: —¡Tachi Ak'õre ume ẽpẽra jĩra tachimá edá chesidama!

¹² Ãchia Bernabé ãchi Tachi Ak'õre, Zeus apachidama mãɨnepa Pablo ãchi Tachi Ak'õre, Hermes apachidama, ichi chi pedea jarapari pẽra.

¹³ Zeus te minachia bɨ Listra p'uuru k'ĩrari basima. Mãmãɨpa chi Zeus p'aarepa p'ak'a mãɨnepa nep'ono chi p'uurude eda wãpataɨmá ateesima. Ichia chi ẽpẽerã minachia nɨbɨ ome Pabloa mãɨnepa Bernabea mãɨ p'ak'a paatea k'ɨ̃ria p'anasidama.

¹⁴ Maamina chi Jesupa peeda Bernabepa mãɨnepa Pablopa mãɨ k'awasidaɨde ãchi neet'á k'õat'aadak'ari ẽpẽerã t'ãena p'ira wãnak'ari nãɨya jĩk'ua jarasidama:

¹⁵ —Mãra, ¿k'ãre k'orea jãɨya oo p'anɨma? Tai Tachi Ak'õrewẽma. Tai ẽpẽrapɨ, mãra jĩra. Mãrá jarade che p'anɨma, chi piawẽa be itu bɨdak'ari Tachi Ak'õre chok'ae bɨt'a ĩjãanamẽrá. Mãɨ Tachi Ak'õrepa pajã, ĩjũa, p'usa mãɨnepa ãarea ãchide nɨbɨ sida oosima.

¹⁶ Naena Tachi Ak'õrepa ichi atua be p'uurudepemarã́ ara ãchia oo k'ɨ̃ria p'anɨt'a itu oopipachima.

¹⁷ Maamina ewaricha pia oo bɨdepa ichia k'awapi bɨma ichi piarã bɨt'a. Ichia pajãnepa k'oe chepiparima mãɨnepa ne uu ĩjũa chaupiparima. Mãɨya ichia tachiá jãwaa nek'opiparima mãɨnepa sõne arapaapiparima.

¹⁸ Pablo mãɨnepa Bernabepa mãɨya jara p'anasidamina mãɨ ẽpẽerãpa perá ãchiá p'ak'a paateasidama.

¹⁹ Listrade p'anɨne waapẽarã judiorã Antioquiadepa mãɨnepa Iconionepa chesidama. Ãchia Listradepemarã́ Pablo k'orea piawẽa k'ɨ̃risiapisidama. Mãɨpuru ãareaɨrãpa Pablo mawarapa bat'asidama. Ichi piuda k'ɨ̃risiasidada pẽra p'uuru tajatá jidibari ateewãsidama.

²⁰ Maapae chi Jesude ĩjãapataɨrãpa Pablo jũranak'ari ak'ɨ p'anasidama. Mãɨya p'anɨne ichi p'irabarisima. P'irabarik'ari jĩitea p'uurudea wãsima. Norema Bernabé ome Derbe p'uurudea wãsidama.

²¹ Derbe p'uurude Pablo mãɨnepa Bernabepa chi pedea pia Jesú k'orea jarasidaɨde minachia p'anɨrãpa ĩjãasidama. Mãɨya nak'ari Listra p'uurudea, Iconio p'uurudea mãɨnepa Pisidia tuade bɨ Antioquiadea jĩitea wãsidama.

²² P'uurucha ũpẽarã k'aripapachidama Jesude minachia ĩjãanamẽrá. Chi ãchia Jesude ĩjãa p'anɨt'a itu bɨpidaemaapa nãɨya jarapachidama: «Tachi Ak'õre juade p'ananai k'orea ichidirã paara, nãɨ ĩjũane minachia mĩanaipɨ».

²³ P'uurucha chi ĩjãapataɨrã t'ãena ũpẽarã ak'ɨpataɨrã bɨsidama. Maapae Tachi Ak'õrea ɨt'aa chiididak'ari, Tachi Ak'õrene k'ɨ̃risiadayá nek'odak'apɨ́ ewaride oodak'ari, chi Tachi Chipari ĩjãa p'anɨt'a ichi juade bɨsidama.

Siria tuade bɨ Antioquiadea jĩitea wãnana

²⁴ Mãɨya nak'ari Pisidia tuadepa Panp'ília tuade pade wãsidama.

²⁵ Tachi Ak'õre pedea Perge p'uurude jarateadak'ari Atalía p'uurudea wãsidama.

²⁶ Mãmãɨpa p'ãp'orrode Siria tuade bɨ Antioquiadea jĩitea wãsidama chi ãchia ode wãnana ãarea oodada pẽra. Mãɨ p'uurudepa ũpẽarãpa ãchi naena peesidama Tachi Ak'õrepa k'ɨ̃ria bɨt'a oodamẽrá. Mãɨne Tachi Ak'õre juade bɨsidama ichi sõpiadepa k'aripamẽrá.

²⁷ Chedak'ari ũpẽarã ome ará p'anasidama. Mãɨne nepɨrɨsidama ãarea Tachi Ak'õrepa ãchidepa ooda. Jarasidama Tachi Ak'õrepa eda wãpataɨ ewasit'a judiorãwẽ pida Jesude ĩjãanamẽrá.

²⁸ Mãma chi Jesude ĩjãapataɨrã ome tãaraa p'aneesidama.