Hecho 13 - Tachi Ak'õre Pedea

Tachi Ak'õre Jaorepa Saulo mãɨnepa Bernabé peeda

¹ Ũpẽarã Antioquía p'uurudepema t'ãena Tachi Ak'õre pari pedeapataɨrã mãɨnepa jarateapataɨrã p'anasima. Bernabé, Saulo, Lucio Cirenenepema mãɨnepa Simón basima. Simón ɨ̃ana t'ɨ̃ «Chi P'aimá» apachidama. Manaén sida basima. Ichi Galilea tuadepema chi poro jũra jɨ̃parí jɨ̃ bɨ Herode ome tausia warisima.

² Ewariaba ũpẽarãpa Tachi Ak'õrene k'ɨ̃risiadayá nek'odak'apɨ́ ewaride oo p'anɨne Tachi Chiparia pia pedea p'anasidama. Mãɨya p'anɨne Tachi Ak'õre Jaorepa ãchiá jarasima: «Bernabé mãɨnepa Saulo mɨa t'ɨ̃sima. Mãɨpuru ãchi awara bɨt'ɨ mɨa oopi bɨt'a oodamẽrá».

³ Ãchia Tachi Ak'õrene k'ɨ̃risiadayá nek'odak'apɨ́ ewaride oodak'ari, Tachi Ak'õrea ɨt'aa chiidiutade ãchi jua Bernabé mãɨnepa Saulo ɨ̃rɨ bɨsidama. Maapae ãchi peesidama Tachi Chiparipa oopi bɨ ode wãnamẽrá.

Saulo mãɨnepa Bernabé wãnana

⁴ Ãchi Tachi Ak'õre Jaorepa peeda pẽra Seleucia p'uurudea wãsidama. Mãmãɨpa p'ãp'orrode Chipre ĩjũa p'ɨrra bɨdea wãsidama.

⁵ Salamina p'uurude chedak'ari judiorã ará pedeapataɨ techa Tachi Ak'õre pedea jarateasidama. Ãchi k'aripai k'orea Juan Marco ãchi ome p'ɨrrɨasima.

⁶ Ãarea mãɨ ĩjũa p'ɨrrɨautade Pap'o p'uurude pasidama. Mãma judio Barjesú apataɨ unusidama. Mãɨ Barjesú jaipana pasima. Seadepa jarapachima ara ichi Tachi Ak'õre pari pedeaparí pasit'a.

⁷ Ichi Chipredepema chi chaarea bɨ Sergio Paulo apataɨmá bapachima. Mãɨ Sergio Paulo k'ɨ̃risia minachia basima. Ewariaba ichia Bernabé mãɨnepa Saulo t'ɨ̃pisima Tachi Ak'õre pedea ũri k'ɨ̃ria bada pẽra.

⁸ Maamina ãchia jaratea p'anɨne chi jaipana Barjesupa seaade apachima chi chaarea bɨpa Tachi Ak'õre pedea ĩjãapiemaapa. (Barjesú t'ɨ̃ griego pedeade Elima apatama).

⁹ Mãɨne Saulo Tachi Ak'õre Jaoredepa basima. (Saulo ichiaba Pablo apatama). Pablopa Elimamá minachia ak'ɨ nɨbeek'ari nãɨya jarasima:

¹⁰ —¡Tiore warra, pɨa ne ãarea jĩp'a bɨt'a k'ɨ̃riak'ama! ¡Nemietá ooyá bɨma mãɨnepa chi sea bɨma! ¿K'ãre k'orea ara pɨchia Tachi Chipari pedea seaade a bɨma?

¹¹ Naapae tai Chiparipa ichi jua chaareadepa pɨ ɨtɨaipɨ. Pɨ tau p'ãrio beeipɨ. Ewari tãaraa ɨmata unuwẽa baipɨ. Ara mãɨne chi jaipanapa tau t'aua p'ãrio bɨ unuk'ari mãɨpa tau p'ãrio beesima. Maapae chichupuria idisima abaɨpa ichi juade jitak'ari k'aripa ateewãmẽrá.

¹² Sergio Paulopa mãɨ unuside chi Tachi Chipari k'orea jaratea p'anɨt'a minachia pia ũrina pẽra ĩjãasima.

Pisidia tuadea wãnana

¹³ Pablo mãɨnepa chi ichi ome wã p'anɨrã Pap'o p'uurudepa Panp'ília tuadea p'ãp'orrode wãsidama. Mãma Pergue p'uurude chesidama. Maamina Juan Marcopa ãchi ameek'ari Jerusalenea jĩitea wãsima.

¹⁴ Ãchi Pergedepa Antioquiadea wãsidama. Mãɨ Antioquía Pisidia tuade bɨma. Mãma mimianak'apɨ́ ewaride judiorã ará pedeapataɨ tede eda wãnak'ari suak'abari p'aneesidama.

¹⁵ Maapae chi chaarearãpa Moisepa bɨdadepema mãɨnepa Tachi Ak'õre pari pedeapataɨrãpa bɨdaadadepema jĩk'ua eda jarasidama. Maapae ãchia Pablo mãɨnepa Bernabé suak'abari p'anɨmá nãɨya jara peesidama: —Ũpẽarã, mãrapa pedea aba uru p'anɨpɨra tai k'aripadai k'orea, mãɨyara pedeat'ɨ.

¹⁶ Mãɨne Pablo p'irabarik'ari juapa jarasima ãareaɨrã́ k'ĩup'eadamẽrá. Maapae jarasima: —Israeldepemarã mãɨnepa judiorãwẽ Tachi Ak'õre wap'ea berã, ũrit'ɨ:

¹⁷ Chi Israel p'uurudepema Ak'õrepa tachi chõarãenapemarã jɨrɨ atasima. Ãchi Egito tuade chĩararã jĩra p'anasidaɨde Tachi Ak'õrepa ãchi p'uuru minachia eapapisima. Maapae ichi jua chaareadepa ãchi Egito tuadepema ateewãsima.

¹⁸ Mãɨya nak'ari ãchi ĩjũa pania newẽa bɨde, Tachi Ak'õrepa chi ãchia piawẽa oodada cuarenta ãyo choa basima.

¹⁹ Maapae Canaán ĩjũane Tachi Ak'õrepa p'uuru k'ak'o siete ãarea k'enapip'eda, chi mãɨrã ĩjũa pada tachi chõarãenapemarã́ teasima.

²⁰ Egitodea wãnaananepa aba ãchi ĩjũa atautadea 450 ãyo basima. »Mãɨya nak'ari Tachi Ak'õrepa chi ẽpẽerã nepɨra ak'ɨpataɨrã bɨpachima, aba Tachi Ak'õre pari pedeaparí Samuel ewaridea.

²¹ Mãɨ ewaride ãchia Tachi Ak'õrea chichupuria idisidama ẽpẽra aba ãchi poro jũra jɨ̃ bɨ bɨmẽrá. Mãɨ k'orea Tachi Ak'õrepa Quis warra Saúl bɨsima. Mãɨ Saúl Benjaminepa ununa pasima. Cuarenta ãyo israel ĩjũanepemarã poro jũra jɨ̃parí jɨ̃ bɨ basima.

²² Maamina Tachi Ak'õrepa Saulo ãyá bɨk'ari Daví bɨsima ãchi poro jũra jɨ̃parí jɨ̃ bɨ bamẽrá. Daví k'orea Tachi Ak'õrepa nãɨya jarasima: “Mɨa Jesé warra Daví pia unu bɨma. Mɨa oopi k'ɨ̃ria bɨt'a ichia ãarea ooipɨ”.

²³ »Maapae Tachi Ak'õrepa naena jarada jĩra oosima. Ichia Davidepa ununanepema aba bɨsima israel ĩjũanepemarã Tachi K'aripaparí bamẽrá. Mãɨ ẽpẽra Jesupɨ.

²⁴ Mãɨ Jesú chei naena Juanpa ãarea israel ĩjũanepemarã́ jaratea basima ãchi nemietá itu bɨdak'ari Tachi Ak'õremá chedamẽrá. Chi mãɨya ooutarã ichia porochoapachima.

²⁵ Ichi piui ewari ara k'ait'a paside Juanpa jarasima: “Mãrapa mɨ ¿k'ai k'ɨ̃risia p'anɨma? Mɨ Tachi Ak'õrepa Tachi K'aripaparí teai jaradawẽma. Maamina chi mɨ k'aadea cherut'a mɨ k'aepẽra chi atepe bɨma. Ichia jĩrune jɨ̃ bɨ ẽrai k'orea mɨ mãɨ pae pida pia bɨwẽma”.

²⁶ »Mãra ũpẽarã Abrahanepa ununaanarã mãɨnepa mãra judiorãwẽ Tachi Ak'õre wap'ea berã, Tachi Ak'õrepa tachiá peesima mãɨ pedea ateewãnai k'orea.

²⁷ Jerusalenepemarãpa mãɨnepa ãchi chaarearãpa Jesú Tachi K'aripaparí k'awadaé pasima. Tachi Ak'õre pari pedeapataɨrãpa bɨdada mimianak'apɨ́ ewaricha jĩk'ua eda jarapatamina chi ichi k'orea bɨdada k'awadaé pasima. Mãɨpari Jesú peapisidaɨde mãɨ pedea jara bɨt'a piarã oosidama.

²⁸ Mi ãpia pida nemietá ooda ununawẽmina ãchia Pilatoa jarasidama peamẽrá.

²⁹ Tachi Ak'õre k'art'ade ichi peadai bɨdada ãarea mãɨyak'ari ichi k'urusudepema edá jiradak'ari t'ɨbarisidama.

³⁰ Maamina Tachi Ak'õrepa ichi chok'ae p'irabaripisima.

³¹ Mãɨya nak'ari Jesupa chi ichi ome Galileadepa Jerusalenea wãnaanarã́ ara ichi bari k'ak'o minachia unupisima. Idiapae mãɨ ẽpẽerãpa ichi k'orea ãarea israel ĩjũanepemarã́ pedea p'anɨma.

^32-33 »Ara mãɨ jĩra taipa nãɨ pedea pia bɨt'a jara p'anɨma: Tachi Ak'õre tachi chõarãenapemarã ome pedea ausima mãɨnepa tachi, chi ãchidepema ununaanarã mãɨ pedea auda ãarea oosima. Jesú chok'ae p'irabaripisima salmo umene bɨ bɨ jĩra. Nãɨya jara bɨma: “Pɨ mɨ Warrapɨ. Idi pɨ mɨ Warraade aruma”.

³⁴ »Tachi Ak'õrepa Jesú piu bada chok'ae p'irabaripisima waa piupiemaapa. Mãɨ k'orea ichi k'art'ade nãɨya jarasima: “Mɨa Davia k'aripai jarada mãra ome piarã ooipɨ”.

³⁵ Mãɨpuru salmo chi k'art'a awara bɨ bɨde nãɨya bɨ bɨma: “Mɨ, chi pɨ pae pari mimiaparí chi jĩp'a bɨt'a itu beraapiiwẽma”.

³⁶ »Daví chok'ae baside Tachi Ak'õrepa ichidepa oosima ichia k'ɨ̃ria bada jĩra. Maapae Daví k'ĩrawẽak'ari t'ɨbarisidama ichi chõarãenapemarã t'ɨbaridaadamá. Mãɨne ichi beraasima.

³⁷ Maamina chi Tachi Ak'õrepa chok'ae p'irabaripidat'u mãɨ beraaé pasima.

³⁸ Mãɨpuru ũpẽarã, nãɨ k'awat'ɨ: mãrapa nemietá oopataɨ Tachi Ak'õrepa Jesudepa k'ɨ̃risia atuaipɨ.

³⁹ Moisepa bɨdade bɨ bɨma Tachi Ak'õrepa chi tachia nemietá tachi k'ɨ̃ría oopataɨ k'ɨ̃risia atuaiwẽma. Maamina ãarea chi Jesude ĩjãauta Tachi Ak'õrepa nepɨra newẽa p'anɨane aparima. Mãɨt'a mãrá jara p'anɨma.

⁴⁰ Jĩrak'aua p'anat'ɨ Tachi Ak'õre pari pedeapataɨrãpa bɨdada mãra ome mãɨyapiemaapa. Nãɨya bɨsidama:

⁴¹ “Mãrapa chi Tachi Ak'õrepa jara bɨt'a itu bɨ berã, ¡ak'ɨt'ɨ! ¡Ak'ɨɨtua nɨbeet'ɨ! ¡Piut'ɨ! Mɨa nãɨ ewaride ne ooipɨ. Mãɨ abaɨ pida mãrá jararu sida ĩjãanaiwẽma”.

⁴² Pablo mãɨnepa Bernabé judiorã ará pedeapataɨ tedepa wãutade ẽpẽerãpa chichupuria idisidama nãɨ mimianak'apɨ́ ewari cherude mãɨ k'orea mãicha pedeadamẽrá.

⁴³ Chi jere p'anana wãsidaɨde minachia judiorãpa mãɨnepa griegorã chi judiorã k'ɨ̃risia jĩra p'anapataɨrãpa Pablo mãɨnepa Bernabé paara wãsidama. Ãchia mãɨ ẽpẽerã́ minachia jarasidama Tachi Ak'õrepa ichi sõpiadepa ãchi k'aripa bɨt'a ĩjãa p'ananamẽrá.

⁴⁴ Ya ewari mimianak'apɨ́ ewari cherude chi p'uurudepemarã chi judiorã ará pedeapataɨ tedea ará cheepɨrɨsidama Tachi Chipari pedea ũrinai k'orea.

⁴⁵ Maamina chi judiorã chaarearãpa ẽpẽerã minachia nɨbɨ ãchi tede unusidaɨde Pablo k'orea sõpiawẽa tuaneesidama. Pablopa jaratea bɨde ãchia seaade apachidama mãɨnepa Pablo k'orea piawẽa pedeapachidama.

⁴⁶ Mãɨne Pablo mãɨnepa Bernabepa ne wap'eawẽa ãchiá jarasidama: —Piarã taipa mãrá Tachi Ak'õre pedea naa jaradai p'anasidama. Maamina mãrapa mãɨ itu bɨ p'anɨ pẽra mãɨnepa mãramá ewaricha Tachi Ak'õre ome chok'ae bai piawẽa pẽra, taipa judiorãwẽmá mãɨ jarade wãnaipɨ.

⁴⁷ Taipa mãɨya oodamẽrá Tachi Chiparipa nãɨya jarasima: “Mɨa pɨ ɨnaa jĩra bɨsima judiorãwẽpa mɨ k'orea k'awadamẽrá. Pɨa ãarea nãɨ ĩjũane berã́ k'awapiipɨ chi mɨa ẽpẽerã k'aripait'a”».

⁴⁸ Judiorãwẽpa mãɨ ũrisidaɨde arapaasidama. Ara mãɨne Tachi Chipari k'orea pedea pia pedeasidama. Chi Tachi Ak'õrepa ewaricha ichi ome chok'ae beadai k'orea bɨdarãpa ichide ĩjãasidama.

⁴⁹ Maapae Tachi Chipari pedea ãarea mãɨ tuade jarasidama.

⁵⁰ Maamina judiorãpa chi Tachi Ak'õre wap'ea be wẽerã minachia k'awa berã́ mãɨnepa p'uurudepema ɨmɨk'ĩira chi chaarearã́ jarasidama Pablo mãɨnepa Bernabé piawẽa oodamẽrá. Mãɨya ãchi p'uurudepema ãyá jeret'aasidama.

⁵¹ Mãɨne Pablo mãɨnepa Bernabepa p'uurudepema yooro jora ãchi jĩrunepema jãrap'et'asidama unupidai k'orea Tachi Ak'õrepa mãɨ k'ɨ̃riawẽa bɨt'a ãchiá k'awapii k'orea. Maapae Iconio p'uurudea wãsidama.

⁵² Maamina chi Jesude ĩjãapataɨrã mãɨ Antioquiade p'anɨ minachia arapá p'anasidama mãɨnepa Tachi Ak'õre Jaoredepa p'anasidama.