Hecho 11 - Tachi Ak'õre Pedea

Pedropa ũpẽarã Jerusalenepemarã́ pedeada

¹ Mãɨya nak'ari Jesupa peedaɨrãpa mãɨnepa waapẽarã ũpẽarã Judea tuade berãpa ũrisidama judiorãwẽpa Tachi Ak'õre pedea ĩjãasidat'a.

² Mãɨpuru Pedro Jerusalenea wãside waapẽarã ũpẽarã judiorãpa ichiá k'ĩruu pedeasidama.

³ Nãɨya jarasidama: —¿K'ãre k'orea pɨ judiorãwẽ tede eda wãk'ari ãchi ome nek'o basima?

⁴ Mãɨne Pedropa chi mãɨyana ãchiá ãarea nepɨrɨsima.

⁵ —Jope p'uurude baside mɨa Tachi Ak'õrea ɨt'aa chiidi basima. Mãɨne k'ãmok'araa jĩra p'aru t'orroa nepalá bɨt'a unusima. Mãɨ p'aru chi ide k'ĩrachu jɨ̃ bɨ jĩra bet'a pajãnepa edá mɨmá chesima.

⁶ Mɨa pia ak'ɨsima k'ãre eda bɨ k'awai k'orea. Mãɨne ne wawaria ãnimara p'anasidama, bɨɨrɨ k'ĩmari be, ĩjũane urrujupataɨrã mãɨnepa ĩpanarã.

⁷ Mãɨya bɨde pedea aba ũrisima. Mãɨpa mɨá jarasima: “Pedro, p'irabarise. Ne peak'ari k'ose”.

⁸ Maamina mɨa jarasima: “Mɨa mãɨ k'oiwẽma, mɨ Chipari. Taipa k'odak'apɨɨt'a wa chi pɨ k'ĩrari nemietá bɨt'a mɨa k'ok'ama”.

⁹ Mãɨne bari k'ak'o ume chi pedeapa pajãnepa mɨá mãicha jarasima: “Chi Tachi Ak'õrepa nepia bɨda, mãɨ mietá bɨade arãse”.

¹⁰ Mãɨya pedea bɨt'a mɨa bari k'ak'o ũpea ũrisima. Maapae chi p'aru mãicha pajãnea wãsima.

¹¹ »Mãɨya bɨde ẽpẽra ũpea chi mɨ bɨ temá chesidama. Ãchi chiparipa Cesarea p'uurudepa mɨmá peesima.

¹² Tachi Ak'õre Jaorepa mɨ ãchi ome ne k'ɨ̃risiawẽa wãpisima. Cesarea p'uurude chedak'ari tai ãchi chipari tede edá wãsidama. Nãɨ ũpẽarã sei mɨ ome p'anasidama.

¹³ Mãɨ ẽpẽrapa taiyá nepɨrɨsima Tachi Ak'õrepa ɨt'aripa peeda ichi tede nɨbɨ unusit'a. Mãɨpa ichiá jarasima: “Jope p'uurudea ẽpẽerã peese Simón, chi ɨ̃ana t'ɨ̃ Pedro apataɨ jɨrɨde wãnamẽrá.

¹⁴ Ichia jaraipɨ sãya Tachi Ak'õrepa pɨ mãɨnepa pɨ tedepemarã k'aripait'a”.

¹⁵ »Mɨa mãɨ pedeaside Tachi Ak'õre Jaore ãchimá chesima ara mãɨ tachimá naena cheda jĩra.

¹⁶ Mãɨne Tachi Chiparipa jarada mɨa k'ɨ̃risiasima: “Piarã Juanpa ẽpẽerã paniapa porochoasima, maamina Tachi Ak'õrepa ichi Jaoredepa mãra porochoaipɨ”.

¹⁷ Tachi Chipari Jesucristode ĩjãa p'anɨ pẽra Tachi Ak'õrepa tachiá ichi Jaore teasima. Ichi Jaore ãchiá pida teada pẽra ¿mɨa sãmaasã́ ichia ooda k'orea k'achia pedeaima?

¹⁸ Jerusalenepema ũpẽarãpa mãɨ ũrisidaɨde waa k'achia pedeadaé pasima, mãɨpari Tachi Ak'õrea nãɨya pia pedeasidama: —¡Piarã Tachi Ak'õrepa judiorãwẽ sida k'aripasima ãchi nemietá oodada itu bɨdak'ari ichimá chedamẽrá! ¡Mãɨya ewaricha ichi ome chok'ae p'ananaipɨ!

Ũpẽarã Antioquía p'uurudepema

¹⁹ Esteban peadak'ari ẽpẽerãpa Jesude ĩjãapataɨrã ẽp'ẽsidama. Mãɨpuru ũpẽarã Jerusalenepa mĩruwãsidama ara tuacha ãchi k'ak'awá. P'enicia tuadea, Chipre ĩjũa p'ɨrra bɨdea mãɨnepa Antioquía p'uurudea wãsidama. Ãchi wãutacha chi pedea Jesú k'orea abapuru judiorã́ jarapachidama.

²⁰ Mãɨya p'anɨne chi eda waapẽarã Jesude ĩjãapataɨrã Chipredepema mãɨnepa Cirene p'uurudepema Antioquiadea p'aneene wãsidama. Mãɨrãpa griegorã́ pida chi pedea pia Tachi Chipari Jesú k'orea jara p'aneesidama.

²¹ Tachi Chiparipa ichi jua chaareadepa ãchi k'aripasima. Mãɨpa ãchia jara p'anɨt'a mãɨ minachia p'anɨrãpa ĩjãasidama. Chi ãchia naena ĩjãa p'anana itu bɨdak'ari Tachi Chiparide ĩjãasidama.

²² Ũpẽarã Jerusalenepemarãpa mãɨ k'awasidaɨde Bernabé Antioquiadea peesidama.

^23-24 Mãɨ Bernabé ẽpẽra jĩp'a basima. Jesude minachia ĩjãa basima; Tachi Ak'õre Jaoredepa pia basima. Bernabé Antioquiade cheside unusima Tachi Ak'õrepa ichi sõpiadepa ũpẽarã k'aripa bɨt'a. Mãɨpuru minachia sõ arapaasima. Mãɨne ãareaɨrã́ jarapachima sõnepa ewaricha Tachi Chiparide piarã ĩjãanamẽrá. Mãɨya bɨde minachia p'anɨrãpa chi Tachi Chiparide ĩjãasidama.

²⁵ Mãɨya nak'ari Bernabé Tarso p'uurudea Saulo jɨrɨde wãsima. Unuk'ari Antioquiadea ateewãsima.

²⁶ Mãma ũpẽarã ome ãyo aba chi jerepachidama. Ãchia minachia ẽpẽerã́ Jesucristo k'orea jarateapachidama. Mãɨ Antioquiade ẽpẽerãpa Jesude ĩjãapataɨrã “cristiano” apachidama. Mãɨ barimama naa mãɨya t'ɨ̃ bɨsidama.

²⁷ Mãɨ ewaride Tachi Ak'õre pari pedeapataɨrã Jerusalenepa Antioquiadea wãsidama.

²⁸ Aba Agabo apataɨ bai nɨbeek'ari Tachi Ak'õre Jaoredepa jarasima jõma nãɨ ĩjũane jarra minachia cheit'a. Mãɨ jarra piarã chesima Claudio chi Romanepema chi atepe poro chaarea bɨ ewari paside.

²⁹ Mãɨpuru chi Jesude ĩjãapataɨrã Antioquiade p'anɨpa pedea ausidama erreara ũpẽarã Judea tuade berã pae tea peedai k'orea. Ãchicha p'ue teauta jĩra teadayade asidama.

³⁰ Mãɨ erreara jɨrɨp'edak'ari Bernabé mãɨnepa Sauloa tea peesidama ũpẽarã ak'ɨpataɨrãmá ateewãnamẽrá.