Hecho 10 - Tachi Ak'õre Pedea

Tachi Ak'õrepa ɨt'aripa peedapa Cornelioa pedeada

¹ Cesarea p'uurude ẽpẽra Cornelio apataɨ basima. Ichi Italia tuadepema papaká berã chi mãɨrã chaarea pasima.

² Mãɨ Cornelio ichi tiidapemarã paara ãarea jĩp'a p'anasima. Tachi Ak'õre wap'ea p'anasidama. Corneliopa judiorã k'aripai k'orea erreara minachia teapachima mãɨnepa Tachi Ak'õrea ɨt'aa chiidi bapachima.

³ Ewariaba k'ewara hora ũpeaɨde Corneliopa k'ãmok'araa jĩra Tachi Ak'õrepa ɨt'aripa peeda ichimá cheru pia unusima. Mãɨpa jarasima: —¡Cornelio!

⁴ Corneliopa Tachi Ak'õrepa ɨt'aripa peeda minachia ak'ɨk'ari ne minachia wap'ea bɨdepa idisima: —¿K'ãre, mɨ chipari? Mãɨne Tachi Ak'õrepa ɨt'aripa peedapa jarasima: —Pɨa Tachi Ak'õrea ɨt'aa chiidi bɨt'a mãɨnepa nenea k'ede k'aripa bɨt'a ichia mãɨ pia unu bɨma, ichiá ne paatearu jĩra.

⁵ Mãɨpuru Jope p'uurudea ẽpẽerã peese chi ẽpẽra Simón, chi ɨ̃ana t'ɨ̃ Pedro apataɨ jɨrɨde wãnamẽrá.

⁶ Ichi p'usa ik'idá Simón chi ãnimara e p'oapiparí tede bɨma.

⁷ Tachi Ak'õrepa ɨt'aripa peeda ichi ome pedea bak'ari wãsima. Wãk'ari Corneliopa chi ichi pae pari mimiapataɨrã ume mãɨnepa papaká bɨ aba t'ɨ̃sima. Mãɨ papaká bɨpa Cornelio k'aripapachima mãɨnepa Tachi Ak'õre wap'ea basima.

⁸ Corneliopa ununa ãchiá ãarea nepɨrɨk'ari Jope p'uurudea peesima.

Pedropa k'ãmok'araa jĩra ununa

⁹ Norema ɨmat'ip'a parude ãchi ode Jope p'uuru k'ait'a cheutade, Pedro te ɨ̃rɨ wãsima Tachi Ak'õrea ɨt'aa chiidii k'orea.

^10-11 Jarra nɨbɨ pẽra nek'o k'ɨ̃ria basima. Ne chuu p'anɨmisa Pedropa k'ãmok'araa jĩra pajã ewarut'a unusima. Pajãnepa p'aru t'orroa nepalá bɨ edá cherut'a unusima. Mãɨ p'aru chi ide k'ĩrachu jɨ̃ bɨ jĩra beasima.

¹² Mãɨ p'arude eda ne wawaria ãnimara p'anasidama, bɨɨrɨ k'ĩmari be, ĩjũane urrujupataɨrã mãɨnepa ĩpanarã. (Chi eda waapẽarã ãnimara judiorãpa k'odak'a pasima).

¹³ Mãɨya bɨde Pedropa ne pedea ũrisima. Mãɨ pedeapa jarasima: —Pedro, p'irabarise. Ne peak'ari k'ose.

¹⁴ Maamina Pedropa jarasima: —Mɨa mãɨ k'oiwẽma, mɨ Chipari. Chi taipa nek'odak'apɨ́ wa pɨ k'ĩrari mietá be mɨa ewariaba pida mãɨ k'ok'ama.

¹⁵ Chi pedeapa mãicha jarasima: —Chi Tachi Ak'õrepa nepia bɨda, mãɨ mietá bɨade arãse.

¹⁶ Mãɨya pedearut'a Pedropa bari k'ak'o ũpea ũrisima. Maapae chi p'aru mãicha pajãnea wãsima.

¹⁷ Mãɨ unuk'ari Pedropa k'awa k'ɨ̃risiawẽa beesima. Mãɨ wapida k'ãre jara k'ɨ̃ria bɨt'a k'ɨ̃risia bɨmisa chi Corneliopa peedaɨrã Simón te k'orea idi p'anɨne chi eda wãpataɨmá wãsidama.

¹⁸ Ãchia jĩk'ua idisidama Simón, chi ɨ̃ana t'ɨ̃ Pedro apataɨ mãɨ tede bɨ k'awadayá.

¹⁹ Pedropa ununa k'orea wapida k'ɨ̃risia bɨde Tachi Ak'õre Jaorepa ichiá jarasima: «Ẽpẽerã ũpea p'anɨpa pɨ jɨrɨ p'anɨma.

²⁰ P'irabarik'ari tudá wãse. Ãchi ome wãiwẽane a k'ɨ̃risiarãse, mɨa ãchi chepida pẽra».

²¹ Ara mãɨne Pedro edá wãsima Corneliopa peedaɨrãmá. Ichia jarasima: —Mãrapa mɨt'a jɨrɨ p'anɨma. ¿K'ãarea che p'anɨma?

²² Ãchia p'anoosidama: —Tai papaká berã chi mãɨrã chaarea bɨ Corneliopa peesima. Ichi ẽpẽra jĩp'a bɨma mãɨnepa Tachi Ak'õre wap'ea bɨma. Ãarea judiorãpa ichi k'orea pia k'ɨ̃risia p'anɨma. Tachi Ak'õrepa ɨt'aripa peedapa mãɨ pɨ tiidá chepik'ari maapae pɨ pedea ũrimẽrá.

²³ Maapae Pedropa tede eda wãpisima. Mãɨ teamasi Pedro ome p'aneesidama. Norema Pedro p'irabarik'ari ãchi ome wãsima. Mãɨnepa waapẽarã ũpẽarã Jope p'uurudepema ãchi ome wãsidama.

Pedro Cornelio ome pedeada

²⁴ Mãɨ norema Cesarea p'uurude chesidama. Corneliopa ichi ẽpẽerã mãɨnepa ichi k'õp'ãerorã chi piipará be t'ɨ̃na pẽra ichi tede nɨ p'anasidama.

²⁵ Pedro chi te k'ait'a cheside Corneliopa ará pia pedeade wãsima. Pedro k'ĩrari jeeda bedabari k'obeek'ari ichiá pia pedea beesima, ara Tachi Ak'õrea mãɨya pedeapari jĩra.

²⁶ Maamina p'irabaripik'ari Pedropa nãɨya jarasima: —¡P'irabarise! Mɨ sida ẽpẽrapɨ, pɨ jĩra.

²⁷ Pedro Cornelio ome pedea p'anɨmisa ãchi eda wãsidama. Mãma Pedropa ẽpẽerã minachia p'anɨ ará posoa unusima.

²⁸ Maapae ichia jarasima: —Mãrapa k'awa p'anɨma tai judiorã judiorãwẽ ome p'ɨrrɨadaiwẽa p'anɨt'a mãɨnepa judiorãwẽ tede eda wãnaiwẽa p'anɨt'a. Maamina Tachi Ak'õrepa mɨá k'awapisima abaɨ k'orea mɨa mãɨ Tachi Ak'õre k'ĩrari piawẽa bɨade aiwẽa bɨma, wa ichi mietá bɨade aiwẽa bɨma.

²⁹ Mãɨpuru mɨ nãmá t'ɨ̃ peesidaɨde ne k'ɨ̃risiawẽa chesima. Naapae, mɨa k'awa k'ɨ̃ria bɨma k'ãre k'orea mɨ t'ɨ̃ pee p'anasidat'a.

³⁰ Mãɨne Corneliopa jarasima: —Ewari k'ak'o k'ĩmari pa bɨde ara nãɨ orak'a, k'ewara hora ũpeaɨde, mɨa Tachi Ak'õrene k'ɨ̃risiayá nek'ok'apɨ́ ewari oo basima. Tachi Ak'õrea ɨt'aa chiidimaa bɨde mɨ k'ĩrari ẽpẽra aba bɨt'a unusima. Ichi neet'á achiterrea basima.

³¹ Mãɨ ẽpẽrapa mɨá jarasima: “Cornelio, pɨa ɨt'aa chiidi bada Tachi Ak'õrepa pia ũrisima. Ichia k'ɨ̃risia atuawẽa bɨma pɨa nenea k'ede k'aripaparit'a.

³² Maapae ẽpẽerã Jope p'uurudea peese Simón, chi ɨ̃ana t'ɨ̃ Pedro apataɨ jɨrɨde wãnamẽrá. Ichi p'usa ik'idá Simón chi ãnimara e p'oapiparí tede bɨma. Mãɨ Simón Pedro cherude ichia pɨá pedeaipɨ”.

³³ Ara mãɨne mɨa pɨ jɨrɨpisima. Pɨ sõpia bɨ pẽra, nãmá chesima. Ya naapae, tai ãarea nãma Tachi Ak'õre k'ĩrari p'anɨma Tachi Chiparipa pɨá jarapi bɨt'a ũrinai k'orea.

³⁴ Mãɨne Pedropa jarasima: —Naapae mɨa k'awa bɨma chi Tachi Ak'õrepa abaɨ chi waapẽarã k'aepẽra atepe k'ɨ̃riak'at'a.

³⁵ Mãɨpari p'uurucha chi ichi wap'eapa jĩp'a oo bet'a pia unuparima.

³⁶ Tachi Ak'õrepa chi pedea pia Jesucristo k'orea pedea peesima Israeldepemarã́, Tachi Ak'õre ome pia p'ananamẽrá. Mãɨ Jesucristo ãareaɨrã Chiparipɨ.

³⁷ Mãrapa k'awa p'anɨma ãarea Judea tuade Jesú k'orea nepɨrɨpataɨ. Naa Galileade Juanpa jaratea basima ẽpẽerã porochoadamẽrá.

³⁸ Mãɨ ewaride Tachi Ak'õrepa ichi Jaore mãɨnepa ichi jua chaarea Jesú Nazaredepemá teasima. Tachi Ak'õre ichi ome bada pẽra Jesupa nepia oo p'ɨrrɨa bapachima mãɨnepa chi ẽpẽerã tiorepa piawẽa uru beadat'a ãarea jɨpa beepipachima.

³⁹ Judiorã tuade mãɨnepa Jerusalén p'uurude Jesupa ooda taipa ãarea unusidama. Ichia nepia oodamina judiorãpa k'urusude barijira bɨk'ari peasidama.

⁴⁰ Ara mãɨ Jesú Tachi Ak'õrepa ewari ũpeaɨde chok'ae p'irabaripik'ari waapẽarã́ unupisima.

⁴¹ Tachi Ak'õrepa ãareaɨrã́ unupié pasima maamina taiyá unupisima mãɨ k'orea ateeda pẽra. Ichi chok'ae p'irabarik'ari tai ichi ome nek'osidama mãɨnepa netosidama.

⁴² Jesupa tai peesima jõma ẽpẽerã́ nãɨya jaradamẽrá: Tachi Ak'õrepa ichi bɨsima chi chok'ae berã mãɨnepa piudaadat'a ãchi nepɨra ak'ɨparí bamẽrá.

⁴³ Ãarea Tachi Ak'õre pari pedeapataɨrãpa mãɨ k'orea pedeasidama. Ãchia k'awapisidama parituapa Jesude ĩjãaipɨra, mãɨ ẽpẽrapa nemietá oo bada Tachi Ak'õrepa ichidepa k'ɨ̃risia atuait'a.

Tachi Ak'õre Jaore judiorãwẽmá cheda

⁴⁴ Pedro mãɨ pedea bɨmisa, ãarea chi ichi pedea ũri p'anɨmá Tachi Ak'õre Jaore chesima.

^45-46 Mãɨne pedea awara pedea tuaneesidama mãɨnepa Tachi Ak'õrea pia pedea tuaneesidama. Judiorã Jesude ĩjãapataɨrã Pedro ome chedaadapa mãɨ ũrisidaɨde k'awa k'ɨ̃risiadaé pasima Tachi Ak'õrepa ichi Jaore judiorãwẽa teada pẽra.

⁴⁷ Mãɨne Pedropa jarasima: —Nãɨ ẽpẽerãpa Tachi Ak'õre Jaore jitasidama taipa jitadada jĩra. ¿K'aipa paniapa porochoarãapade adaima?

⁴⁸ Maapae Pedropa ãchi Jesucristo t'ɨ̃nepa porochoapisima. Mãɨya nak'ari ãchia chichupuria idisidama ichi ãchi ome tãaraa beemẽrá.