Hebreo 9 - Tachi Ak'õre Pedea

Tachi Ak'õre te nãɨ ĩjũanepema mãɨnepa pajãnepema

¹ Tachi Ak'õre israel ĩjũanepemarã ome naa pedea auside te ãnimara edepa oopadade asima nãɨ ĩjũane mãɨnepa mãma eda k'ãre oodai p'anasit'a Tachi Ak'õrea pia pedeadai k'orea.

² Mãɨ te k'ɨda jẽesa k'ak'o umãarea basima. Chi naapema mãɨ «Tachi Ak'õre pae k'ɨda jẽesa pia bɨade» apachidama. Mãma ĩpira, nek'opataɨ, mãɨnepa chi mãɨ ɨ̃rɨ p'ana Tachi Ak'õre pae bɨda basima.

³ Chi k'aadeapema k'ɨda jẽesa p'aru eatɨa jira bɨ ãpɨte basima. Mãɨ «Tachi Ak'õre pae k'ɨda jẽesa chi atepe piipará bɨade» apachidama.

⁴ Mãma k'era Tachi Ak'õre pae paateapataɨ basima. Mãɨ ãarea nee ooda pasima. Tachi Ak'õre baulte basima. Mãɨ sida nee ãarea p'ɨrɨdada basima. Mãɨne eda p'arat'u nee ooda jãjoea bɨde maná basima. Aarón pak'uru t'õnona eda basima. Ichiaba chi Moisepa bɨda mawara p'ep'edea bɨt'a eda basima.

⁵ Baulte ɨ̃rɨ Tachi Ak'õrepa ɨt'aripa peeda jĩra ĩk'arra pará p'anɨ ume p'anasidama. Ãchi ĩk'arrapa chi baulte t'ap'a ɨ̃rɨ t'ap'a uru p'anasidama. Ãchi p'anɨmá Tachi Ak'õre k'ĩrawãrea achiterrea chepachima. Mãɨ ɨ̃rɨ chi p'aarepa ne oa jĩp'orude Tachi Ak'õrepa ẽpẽrarãpa nemietá oodada k'ɨ̃risia atuapachima. Maamina taipa nãɨ k'art'ade nãɨ ne ãarea p'ue jarateadaiwẽma.

⁶ Mãɨ ãarea pia oosidaɨde p'aarerã ewaricha chi naapema k'ɨda jẽesade eda wãpachidama ãchia Tachi Ak'õre pae oodai p'anɨ ãarea oodai k'orea.

⁷ Maamina chi k'aadeapema k'ɨda jẽesade abapuru chi p'aare minachia k'awa bɨt'a ãyocha bari k'ak'o aba eda wãpachima. Eda wãrune ichia nemietá ooda k'orea mãɨnepa ẽpẽrarãpa paritua nemietá oodada k'orea ãnimara oa Tachi Ak'õre k'ĩrari jĩp'oi k'orea ateewãpachima.

⁸ Mãɨnepa Tachi Ak'õre Jaorepa k'awapi basima p'aarerãpa wapida Tachi Ak'õre te nãɨ ĩjũane bɨde ne oodai p'anɨmisa ẽpẽrarã wapida Tachi Ak'õre te pajãne bɨde p'ue eda wãnaiwẽa p'anasit'a.

⁹ Nãɨ ewaride ãarea mãɨpa k'awapi bɨma Tachi Ak'õrea ne tea p'anɨnepa mãɨnepa ãnimara paatea p'anɨnepa chi mãɨya oo be k'ɨ̃risia p'ue jĩp'a bɨpiwẽt'a.

¹⁰ Moisepa bɨdapa abapuru k'awapisima chi tachi k'ak'ua ɨ̃rɨpema k'orea jarateapataɨ: k'ãre k'odai p'anɨt'a, k'ãre todai p'anɨt'a, mãɨnepa Tachi Ak'õrepa sɨɨpi bɨ sãmaasã́ sɨɨdai p'anɨt'a. Mãɨ ãarea nãɨ k'ak'uade oopachidama aba Tachi Ak'õrepa ãarea k'ĩra chiwidi oorudea.

¹¹ Maamina Cristo tachi P'aare minachia k'awa bɨ pa basima, tachia nepia Tachi Ak'õrenepa teada uru p'ananamẽrá. Tachi Ak'õre te pajãne bɨde eda wãsima. Mãɨ te chi piipará bɨpɨ mãɨnepa chi atepe bɨpɨ. Ẽpẽerãpa mãɨ oodawẽma; nãɨ ĩjũanepemawẽma.

¹² Mãma Cristo «Tachi Ak'õre pae k'ɨda jẽesa chi atepe piipará bɨde» barimama eda wãsima. Mãmá wãside chivo mãɨnepa p'ak'a warra oa Tachi Ak'õre k'ĩrari jĩp'oi k'orea ateewãé pasima. Mãɨpari ara ichi oa ateewãsima. Bari k'ak'o aba mãɨya oodapa tachi k'aripasima ewaricha nepɨrawẽa p'ananamẽrá.

¹³ P'aarepa p'ak'a chi ɨmɨk'ĩra oa, chivo oa, mãɨnepa p'ak'a wẽrachae paateada jora nausã́ bɨt'a ẽpẽerã ɨ̃rɨ jĩp'oparima. Mãɨpa ẽpẽrarã Tachi Ak'õre k'ĩrari piawẽa beada nãɨ k'ak'ua ɨ̃rɨpema sɨɨparima.

¹⁴ Mãɨyapɨra, ¿Cristo oapa tachi atepe piipará bɨwẽk'ãra? Cristo nemietá newẽa basima. Tachi Ak'õre Jaore piuk'apɨɨpa k'aripada pẽra ara ichi itu peapisima ãnimara Tachi Ak'õrea paatearu jĩra. Nemietá oo p'anɨ k'orea tachi piudai p'anasidama. Maamina Cristopa ara ichi itu peapida pẽra tachia nemietá oodada Tachi Ak'õrepa k'ɨ̃risia atuak'ari tachi k'ɨ̃risia jĩp'a bɨsima. Mãɨya chi Tachi Ak'õre chok'ae bɨpa k'ɨ̃ria bɨt'a tachia mãɨ p'ue oodaipɨ.

¹⁵ Mãɨyara, Cristodepa Tachi Ak'õrepa pedea chiwidi ausima. Ẽpẽerã chi naenapema pedea audade p'anapachidaɨde nemietá oopachidama. Maamina Cristo piusima mãɨnepema k'aripai k'orea. Ichiaba, Cristodepa chi ichia t'ɨ̃naɨrãpa ichia ne ãarea pia jõk'apɨ́ teai jaradat'a p'ue jitadaipɨ.

¹⁶ Nãɨ jĩra bɨma: ẽpẽrapa k'art'ade bɨparima ichi piuk'ari k'aipa ichia uru bɨdepema jitai bɨt'a. Maamina chi jitai bɨpa mãɨ ẽpẽra piarã piusit'a mãɨ k'awapiepɨra, ne p'ue jitaiwẽma.

¹⁷ Chi k'art'a bɨda wapida chok'ae bɨmisa chi jitai padapa mãɨ p'ue jitaiwẽma. Aba piuk'aripuru p'ue jitaipɨ.

¹⁸ Ara mãɨ jĩra Tachi Ak'õrepa israel ĩjũanepemarã ome naa pedea auside ãnimara oadepa mãɨya oosima. Mãɨpa k'awapisima ãchia mãɨ pedea auda oodai p'anasit'a.

¹⁹ Mãɨ nãɨya basima: Moisepa ichia bɨda ẽpẽrarã́ ãarea jarak'ari, maapae p'ak'a warra oa mãɨnepa chivo oa panianea p'uerasima. Oveja k'ara p'urea p'ɨrɨ bɨt'a atak'ari hisopo pak'uru juade ará pɨrak'ari maapae oade eda batopisima. Mãɨpa ichia chi k'art'a ɨ̃rɨ mãɨnepa ẽpẽrarã ɨ̃rɨ jĩp'osima.

²⁰ Mãɨ oa jĩp'orude nãɨya jarasima: «Nãɨ oapa jara bɨma Tachi Ak'õrepa mãra ome pedea auda ãarea oodai p'anɨt'a».

²¹ Ara mãɨ jĩra Moisepa Tachi Ak'õre te ãnimara edepa oodada mãɨnepa ãarea mãɨ tede ne eda berã oapa jĩp'osima.

²² Piarã Moisepa bɨdade jara bɨma perá ne ãarea oapa jĩp'oi badat'a mãɨ Tachi Ak'õre k'ĩrari pia beemẽrá. Mãɨ oa ãrinaepɨra tachia nemietá oodada Tachi Ak'õrepa k'ɨ̃risia atuaiwẽma.

Cristo oapa tachia nemietá oodada ãarea sɨɨparima

²³ Tachi Ak'õre te ãnimara edepa oodada mãɨnepa mãɨ tede ne eda be, Tachi Ak'õre te pajãne bɨ jĩra basima. Ãarea mãɨ ãnimara oapa ne jĩp'oi basima Tachi Ak'õre k'ĩrari pia bamẽrá. Maamina Tachi Ak'õre te pajãne bɨ mãɨnepa mãɨ tede eda be ãnimara oa k'aepẽra oa atepe pia bɨpa jĩp'oi basima.

²⁴ Cristo Tachi Ak'õre te ẽpẽerãpa oodaadade eda wãé pasima, mãɨ abapuru Tachi Ak'õre te chi piarã bɨt'a, ara pajãne bɨ jĩra bɨ pẽra. Cristo pajãne Tachi Ak'õre k'ĩrari wãsima, ichi oa ãrisidepa tachi k'orea ichiá k'ĩra chupuria idi bai k'orea.

²⁵ Ichi pajãnea wãé pasima ichi oa bari k'ak'o minachia jĩp'oi k'orea nãɨ ĩjũanepema p'aare minachia k'awa bɨpa ãyocha Tachi Ak'õre te k'ɨda jẽesa piipará bɨde oopari jĩra.

²⁶ Mãɨya badapara nãɨ ĩjũa oosidaedapema Cristo bari k'ak'o minachia piui bai pasima. Maamina nãɨ k'aadeapema ewaride ara ichi itu peapisima. Bari k'ak'o aba mãɨya oodapa tachia nemietá oodada ãarea ãyá bɨsima.

²⁷ Ãareaɨrã bari k'ak'o aba piudaipɨ. Mãɨya nak'ari Tachi Ak'õrepa tachi ɨtɨaipɨ.

²⁸ Ara mãɨ jĩra Cristopa bari k'ak'o aba ara ichi itu peapisima chok'araɨrãpa nemietá oodada ãyá bɨi k'orea. Ichi mãicha cheipɨ, maamina mãɨne cheiwẽma tachia nemietá oopataɨt'a ãyá bɨi k'orea. Mãɨpari cheipɨ ichi nɨ p'anɨrã k'aripai k'orea.