Hebreo 8 - Tachi Ak'õre Pedea

Jesú k'orea chi pedea chiwidi auda piipará bɨma

¹ Chi k'ɨ̃risia taipa minachia jara p'anɨt'a nãɨpɨ: tachi P'aare minachia k'awa bɨ pajãne Tachi Ak'õre suak'a beeparí auk'ará bɨde juaraari suak'abari bɨma,

² mãɨnepa chi Pajãne Tachi Ak'õre tede eda mimiaparima. Mãɨ chi piarãpẽa te ãnimara e oodapɨ. Ẽpẽrapa mãɨ ooé pasima, mãɨpari Tachi Chiparipa mãɨ oosima.

³ Tachi Ak'õrepa chi p'aare minachia k'awa p'anɨrã ãarea bɨparima ichiá ne teadamẽrá mãɨnepa ãnimara paateadamẽrá. Mãɨpuru Tachi P'aare chi minachia k'awa bɨ pida ne teai basima.

⁴ Ichi nãɨ ĩjũane badapara p'aare paiwẽ pasima nãɨ ĩjũane p'aarerã minachia nɨbɨ pẽra. Mãɨ p'aarerãpa Tachi Ak'õrea ne teapatama Moisepa bɨdade bɨ bɨ jĩra.

⁵ P'aarerãpa oo p'anɨnepa unupipatama pajãne sãmaasã́ bɨt'a. Mãɨpuru Moisepa chi Tachi Ak'õre te ãnimara e ooi naena Tachi Ak'õrepa ichiá nãɨya jarasima: «Jõma arí oot'ɨ mɨa eyade unupida jĩra».

⁶ Maamina Jesú tachi P'aare Minachia K'awa bɨpa pajãne oo baparit'a atepe pia bɨma p'aarerãpa nãɨ ĩjũane oopataɨ k'aepẽra. Ara mãɨ jĩra Tachi Ak'õrepa Jesudepa pedea auda atepe pia bɨma ẽpẽerã ome pedea auda k'aepẽra, Tachi Ak'õrepa ẽpẽrarã minachia k'aripayade ada pẽra.

⁷ Chi Tachi Ak'õrepa ẽpẽerã ome naa pedea audapa piarã k'aripadapara mãicha awara pedea auiwẽ pasima.

⁸ Maamina Tachi Ak'õrepa ẽpẽrarãpa mãɨ oodawẽa p'anɨ unusima. Mãɨ k'orea nãɨya jarasima: Tachi Chiparipa nãɨya jara bɨma: «Ewariaba mɨa israel ĩjũanepemarã paara mãɨnepa Judadepemarã paara pedea chiwidi bɨipɨ.

⁹ Mãɨ pedea chiwidi mãra chõarãenapemarã ome pedea bɨda jĩra baiwẽma. Ãchi ome pedea bɨsima, ãchi jua jitak'ari Egitodepa ateewãside. Maamina piarã ĩjãanaé pada pẽra mɨa ãchi ameesima. Mãɨya jara bɨma Tachi Chiparipa.

¹⁰ Mãɨnepa Tachi Chiparipa nãɨya jara bɨma: K'aadeapema ewaride mɨa nãɨ pedea chiwidi auipɨ israel ĩjũanepemarã ome: Mɨa Moisepa bɨda ãchi k'ɨ̃risiade mãɨnepa ãchi sõne bɨipɨ. Mɨ ãchi Tachi Ak'õre paipɨ, mãɨnepa ãchi mɨ p'uuru padaipɨ.

¹¹ Mãɨne ãareaɨrãpa mɨ k'awadaipɨ. Chi k'ɨ̃risia ãpia bepa mãɨnepa chi k'ɨ̃risia atepe be pida mɨ k'awadaipɨ. Mãɨpuru mi ãpia pida ichi tuadepemarã́ mãɨnepa ichi ẽpẽrarã́ waa jarateadaiwẽma Tachi Chipari k'awadamẽrá.

¹² Ãchia ne piawẽa oodada mɨa jõma k'ɨ̃risia atuaipɨ. Mãɨnepa ãchia nemietá oodada mɨa waa k'ɨ̃risia baiwẽma».

¹³ Tachi Ak'õrepa pedea chiwidi bɨyade aside k'awapisima ichia chi naenapema pedea bɨda chi chotapɨ. Chota pẽra tãaraawẽa bɨde ãyá bɨipɨ.