Hebreo 7 - Tachi Ak'õre Pedea

P'aare Melkisedé pada k'orea bɨda

¹ Mãɨ Melkisedé Salén p'uurudepema chi poro jũra jɨ̃ bɨ pasima mãɨnepa Tachi Ak'õre chi atepe bɨ p'aare pasima. Mãɨ ewaride Abrahán waapẽarã p'uuru poro jũra jɨ̃ be ome k'ĩruuk'ari ãarea p'uek'ari, ya cheru pasima. Mãɨne ara mãɨ Melkisedepa ichi jɨrɨde wãk'ari ichiá pia pedeasima mãɨ Tachi Ak'õrepa k'aripamẽrá.

² Maapae Abrahanpa chi ichia ãarea ẽemarinanepema ichiá teasima. Mãɨ diez joisiarucha aba teasima. Melkisedé t'ɨ̃ jara k'ɨ̃ria bɨma «poro jũra jɨ̃ bɨ chi jĩp'a bɨ». Mãɨnepa «Salenepema poro jũra jɨ̃bɨade» apachidama. Mãɨ t'ɨ̃ jara k'ɨ̃ria bɨma «chi tachi ne k'ɨ̃risiawẽa bapiparí poro jũra jɨ̃ bɨ».

³ Melkisedé ak'õre, chi nae mãɨnepa ichi chõarãenapemarã k'orea Tachi Ak'õre pedeade bɨ bɨwẽma. Ichiaba ichi t'õna k'orea mãɨnepa piuda k'orea bɨ bɨwẽma. Mãɨya ichi Tachi Ak'õre Warra jĩra ewaricha p'aarepɨ.

⁴ ¡Melkisedé k'orea minachia k'ɨ̃risiat'ɨ! Ichi piarã chi atepe basima. Tachi chõarãenapema chi atepe bɨ Abrahanpa k'ĩruu bak'ari chi ẽemarinanepema ichiá teasima. Diez joisiarucha aba teasima.

⁵ Moisepa bɨdade jarasima ãarea israel ĩjũanepemarãpa jitautadepema chi Levidepemarã ununana p'aarerã́ teadai p'anɨt'a. Diez jitautacha aba teadai p'anɨma. Israel ĩjũanepemarã mãɨ p'aarerã ũpẽarãmina, abarik'a Abrahanepema ununamina, mãɨya teadai p'anɨma.

⁶ Mãɨyawẽapuru Melkisedé Levidepa chedawẽ pasimina, Abrahanpa ẽemarinanepema ichiá teasima. Diez joisiarucha aba teasima. Mãɨne Melkisedepa Abrahaná pia jarasima Tachi Ak'õrepa k'aripamẽrá. Mãɨ Tachi Ak'õrepa naena piarã k'aripayade a basima.

⁷ Ãareaɨrãpa k'awa p'anɨma chi atepe k'awa bɨpa chi ãpia k'awawẽa bɨ pia pedeaparima mãɨ Tachi Ak'õrepa k'aripamẽrá.

⁸ Israel ĩjũanepemarãpa jitautadepema Levidepa chedada p'aarerã́ teapatama. Mãɨ p'aarerã piudaimina diez jitautacha ãchiá aba teapatama. Maamina Tachi Ak'õre pedeade jara bɨma Melkisedé wapida chok'ae bɨt'a. Mãɨya Abrahanpa ẽemarinanepema mãɨ piuk'apɨ́ p'aarea teasima. Diez joisiarucha aba teasima.

^9-10 Israel ĩjũanepemarãpa diez jitautadepema Levidepa chedada p'aarerã́ aba teapatama. Maamina Melkisedepa Abrahán pia pedeaside Abrahán ãichae Leví wapida neé pasima. Mãɨpuru tachia nãɨya jaradai p'anɨma: Abrahanpa diez joisiarucha Melkisedea aba teaside ichi ãichae Levidepa chedai padarã pida ara mãɨ teasidama.

¹¹ Tachi Ak'õrepa Moisepa bɨda Israeldepemarã́ teaside Levidepa chedada p'aarerã bɨsima mãɨ p'aarerã padamẽrá. Mãɨ p'aarerãpa oo p'anɨnepa ẽpẽrarã Tachi Ak'õremá orrobaridaipara, ¿k'ãre k'orea Aarón awara p'aare Melkisedé jĩra bɨ chei pasima?

¹² Mãɨ p'aare chi awaraɨrãnepa cheda pẽra, chi ichi pae pida ley awara bai basima.

¹³ Jõma mãɨpa Jesú k'orea pedea bɨma. Ichi Levidepa chewẽ pasima, mãɨpari Judadepa cheda pasima. Mãɨ naena mi ãpia pida Judadepa cheda p'aare baé pasima.

¹⁴ Moisepa chi p'aarerã mãɨ ẽpẽrarãnepa chedayade ak'a pasima. Ãareaɨrãpa k'awa p'anɨma Tachi Chipari Jesú Judadepa cheda pasit'a.

¹⁵ Ãarea mɨa jarada pia bɨma nãɨ k'awadaipɨra: Jesú p'aare awaraɨrãnepa cheda pẽra, ichi p'aare beesima Melkisedé bada jĩra.

¹⁶ Ichi p'aare beaé pasima Moisepa bɨdapa bɨda pẽra. Moisepa bɨdapa abapuru Levidepa chedaadat'a bɨparima. Mãɨyawẽapuru Jesú p'aare beesima ichi jua chaareadepa piuk'a pẽra.

¹⁷ Ichi k'orea Tachi Ak'õre pedeade nãɨya bɨ bɨma: «Pɨ ewaricha p'aare baipɨ Melkisedé bada jĩra».

¹⁸ Chi naa bɨda Tachi Ak'õrepa mãɨ itu bɨsima, mi ãpia pida k'aripaé pasi pẽra

¹⁹ mãɨnepa mi ãpia pida jĩp'a bɨé pasima. Mãɨ Moisepa bɨda k'aepẽra Tachi Ak'õrepa nepia teasima tachi k'aripai k'orea. Mãɨnepa Tachi Ak'õremá ará orrobariparima.

^20-21 Tachi Ak'õrepa chi naa p'anana p'aarerã bɨside ewaricha p'ananayane aé pasima. Maamina Tachi Ak'õrepa Jesú p'aare bɨside piarãpẽa jarasima ewaricha mãɨya bayade asima. Tachi Ak'õre pedeade nãɨya bɨ bɨma: «Tachi Chiparipa piarãpẽa jarasima pɨ ewaricha p'aare baipɨ Melkisedé bada jĩra. Ichia jarada k'ĩra awara ooiwẽma».

²² Mãɨ Tachi Ak'õrepa piarã jarada pẽra tachia k'awa p'anɨma Tachi Ak'õrepa Jesudepa tachi ome pedea chiwidi auda piarã ooit'a. Mãɨ pedea auda ichia naa teada piipará bɨma chi Moisepa bɨda k'aepẽra.

²³ Chi naapema p'aarerã minachia p'anasima. Aba piusira abaɨ beepachima. Ya abaɨ chek'ari mãɨpa jõnea oo beepachima.

²⁴ Maamina Jesú piuk'a pẽra ewaricha p'aare paipɨ.

²⁵ Mãɨpuru ichidepa Tachi Ak'õremá cheutarã ãarea p'ue k'aripaipɨ ewaricha chok'ae p'ananamẽrá. Piuk'a pẽra ewaricha tachi k'orea Tachi Ak'õrea chichupuria idiparima.

²⁶ Tachi P'aare minachia k'awa bɨ Jesupa ne ãareaɨne tachi p'ue k'aripaipɨ. Nemietá ook'ama, ne ãareaɨne jĩp'a bɨma. Tachi Ak'õrepa ichi pia unu bɨma. Chi nemietá oopataɨrã t'ãenapema ãyá bɨk'ari pajãne chi atepe bɨsima.

²⁷ Ichia ook'ama waapẽarã p'aare minachia k'awa p'anɨrãpa ewaricha oopata jĩra. Mãɨ p'aarerãpa ara ãchia nemietá oodada k'orea naa Tachi Ak'õrea ãnimara paateapatama. Maapaepuru waapẽarã ãnimara paateapatama ẽpẽrarãpa nemietá oodada k'orea. Maamina Jesupa ãnimara paatearu jĩra ara ichi itu peapisima ẽpẽrarãpa nemietá oopataɨ k'orea. Bari k'ak'o aba mãɨya oodapa nemietá ãarea sɨɨsima.

²⁸ Moisepa bɨdapa ẽpẽrarã ne ãareaɨne jĩp'awẽa be bɨparima p'aare minachia k'awa p'anɨrã p'ananamẽrá. Maamina mãɨ Moisepa bɨ bada teak'ari, Tachi Ak'õrepa piarãpẽa jarasima ichi Warra ewaricha P'aare minachia k'awa bɨ bayade asima. Mãɨya ichi Warra bɨsima chi tachi pae p'aare arí bɨ beemẽrá.