Hebreo 6 - Tachi Ak'õre Pedea

¹ Mãɨpuru naa wãtɨma Cristo k'orea pia k'awadayá. Tachia chi ichi k'orea naa k'awadaadat'a mãicha waa minachia jarateadaiwẽma, mãɨpari nãɨ k'orea jarateadai p'anɨma: nemietá oo p'anɨ k'orea piudai p'anɨt'a, nemietá itu bɨdak'ari Tachi Ak'õremá chedai p'anɨt'a, Tachi Ak'õrene ĩjãanai k'orea,

² porochoadai k'orea, ũpẽarã ɨ̃rɨ jua bɨdai k'orea, piudaadarã chok'ae p'irabaridai k'orea, mãɨnepa chi Tachi Ak'õrepa ĩjãanak'apɨɨrã ɨtɨarude ewaricha mãɨrã minachia mĩanai k'orea.

³ Tachi Ak'õrepa k'ɨ̃ria bɨpɨra, mãɨ k'orea ãarea mãicha jarateadai k'aepẽra tachi naa wãpododaipɨ Cristo k'orea pia k'awadayá.

⁴ Chi eda waapẽarãpa chi piarã pedea k'awa p'ananak'ari, Tachi Ak'õrepa tea bɨ k'orea arapá p'ananak'ari, Ichi Jaoredepa ne jitadak'ari,

⁵ ichi pedea minachia pia bɨ ũri p'ananak'ari mãɨnepa chi k'aadeapema ĩjũa chei bɨdepema ichi jua chaareadepa oo bɨt'a ẽpẽerãpa ne p'ue oodak'apɨ́ unu p'ananak'ari,

⁶ abaɨpa Cristo itu bɨda pẽra mãicha jĩitea ichimá p'ue cheiwẽma. Mãɨyasidara Tachi Ak'õre Warra k'orea jõmãɨrã́ piawẽa pedeapidaipɨ mãicha k'urusude barijira bɨuta jĩra.

⁷ K'oe cherucha chi ĩjũapa toparima. Mãɨpa chi ĩjũa pia bɨde chi ẽpẽra ne uuparí pae pia chaupiparima. Tachi Ak'õrepa mãɨ ĩjũa pia bayade aparima.

⁸ Maamina k'oe chek'ari ɨɨrɨ mãɨnepa sirua k'achia t'õnoipɨra, mãɨ ĩjũa piawẽa bɨma. Tachi Ak'õrepa mãɨ ĩjũa k'achia pedeak'ari maapae ãarea paaipɨ.

⁹ Ũpẽarã, tai mãɨya pedea p'anɨmina k'awa p'anɨma Tachi Ak'õrepa mãra k'aripada pẽra o piade wãutat'a.

¹⁰ Tachi Ak'õre jĩp'a bapari pẽra mãrapa pia oo p'anɨt'a mãɨnepa ichi k'ɨ̃ria p'anɨt'a k'ɨ̃risia atuaiwẽma. Ichi ẽpẽrarã k'aripa p'anɨnepa mãrapa unupisidama chi ichi k'ɨ̃ria p'anɨt'a. Wapida k'aripa p'anɨma.

¹¹ Taipa k'ɨ̃ria p'anɨma machicha mãɨya oo p'ananait'a aba piuutadea. Ara mãɨya mãrapa chi Tachi Ak'õrenepema jitadayá nɨ p'anɨ ãarea jitadaipɨ.

¹² Taipa k'ɨ̃rianawẽma mãra k'oa p'ananait'a, mãɨyawẽapuru k'ɨ̃ria p'anɨma chi mãra waapẽarã ũpẽarã jĩra p'ananait'a. Ãchia Cristode ĩjãa p'anɨẽra mãɨnepa ãarea choa p'anɨẽra, Tachi Ak'õrepa teai jarada ãarea jitadaipɨ.

Tachi Ak'õrepa pedea auda piarã ooipɨ

¹³ Tachi Ak'õre k'aepẽra chi atepe bɨ newẽma. Mãɨpuru Abrahán ome pedea auside ara ichi t'ɨ̃nepa piarã k'aripayade asima.

¹⁴ Nãɨya jarasima: «Piarã mɨa pɨ k'aripaipɨ mãɨnepa pɨdepa ẽpẽerã minachia unupiipɨ».

¹⁵ Abrahanpa choa bɨdepa nɨ bak'ari Tachi Ak'õrepa warra teai jarada unusima.

¹⁶ Ẽpẽrarãpa piarãnepa jarautade ãchi k'aepẽra chi atepe bɨ t'ɨ̃nepa mãɨya jarapatama. Mãɨne abaɨ pida p'ue mãɨ seade adak'ama.

¹⁷ Ara mãɨ jĩra Tachi Ak'õrepa pia k'awapi k'ɨ̃riasima chi ichia teayade ada pada piarã jitadait'a mãɨnepa ichia k'ɨ̃risia bɨ jĩra piarã ooparit'a. Mãɨpuru ara ichi t'ɨ̃nepa piarã teayade asima.

¹⁸ Tachi Ak'õrepa sea jarak'a pẽra ichia teai jarada piarã teaipɨ mãɨnepa ichi t'ɨ̃nepa jarada k'ĩra awara ooiwẽma. Mãɨ ne ume p'anɨnepa, taipa Tachi Ak'õre jɨrɨpatama tai k'aripamẽrá mãɨnepa k'ɨ̃riamẽrá. Ichia jarada piarã ooit'a k'awa p'anɨẽra tachia p'ue p'erawẽa ĩjãa p'ananaipɨ. Mãɨpa chi Jesudepa jitadai k'orea nɨ p'anɨt'a itu bɨdaiwẽma.

^19-20 Mãɨpa tachi k'aripa bɨma minachia ĩjãa p'ananamẽrá joerk'et'apa p'ãp'orro jõe uru nɨbɨ jĩra. Tachia jitadai p'anɨt'a piarã k'awa p'anɨma, Jesú pajãnea tachi naa wãsi pẽra. Tachi Ak'õre temá wãsima eda chi p'aru eatɨa jira bɨ wãyá tachi k'aripai k'orea. Mãma tachi P'aare minachia k'awa bɨ beesima Melkisedé bada jĩra. Ewaricha mãɨya bɨma.