Hebreo 5 - Tachi Ak'õre Pedea

¹ Tachi Ak'õrepa p'aare minachia k'awa bɨ bɨrude, ẽpẽra aba jɨrɨ atak'ari mãɨ bɨparima. Ẽpẽrarãpa nemietá oodada k'orea mãɨpa Tachi Ak'õrea ne teaparima mãɨnepa ãnimara paateaparima.

² Ẽpẽrarãpa atua p'anɨnepa ãchia piawẽa oodada k'orea chi p'aare minachia k'awa bɨpa p'ue k'awa k'ĩra chupuriai bɨma, ichia pida abarik'a oopari pẽra.

³ Mãɨpuru ẽpẽrarãpa nemietá oodada k'orea ãnimara paatearude ichiaba ichia ooda k'orea pida ãnimara paateai bɨma.

⁴ Abaɨ pida ara ichi tuaba p'aare minachia k'awa bɨ beek'ama, maawẽapuru Tachi Ak'õrepuru aba t'ɨ̃k'ari, maapae mãɨ bɨparima Aarón bɨda jĩra.

⁵ Ara mãɨ jĩra Cristo ara ichi tuaba P'aare minachia k'awa bɨ beaé pasima, mãɨpari Tachi Ak'õrepuru ichi mãɨya bɨsima. Tachi Ak'õrepa ichiá nãɨya jarasima: «Pɨ mɨ Warrapɨ. Idi pɨ mɨ Warraade aruma».

⁶ «Mãɨnepa nãɨya jarasima: Pɨ ewaricha p'aare baipɨ Melkisedé bada jĩra».

⁷ Cristo nãɨ k'ak'uade baside ɨbɨa jẽa bɨpa Tachi Ak'õrea jĩk'ua chichupuria idisima, ichi piui bɨdepema p'ue k'aripai bada pẽra. Mãɨne chi Tachi Ak'õrepa k'ɨ̃ria bɨ jĩra ooyade ada pẽra, Tachi Ak'õrepa ichi pedea ũrisima.

⁸ Cristo Tachi Ak'õre Warramina ichi minachia mĩa bɨdepa ichi Ak'õre pedea sãmaasã́ ũriit'a k'awasima.

⁹ Ne ãareaɨne arí ooda pẽra, chi ichi pedea ũriutarã ãarea k'aripaipɨ ewaricha chok'ae p'ananamẽrá.

¹⁰ Mãɨnepa Tachi Ak'õrepa ichi P'aare minachia k'awa bɨ bɨsima Melkisedé bɨ bada jĩra.

Chi piarãpẽa pedea itu bɨrãt'ɨ

¹¹ Mãɨ k'orea taipa minachia jaratea k'ɨ̃ria p'anɨma. Maamina chi t'aju bɨma arí k'awapidait'a, mãɨ mãra poro chaarea p'anɨẽra.

¹² Minachia tãaraa bɨma mãrapa Jesude ĩjãanaanat'a. Mãɨpuru idi mãra Tachi Ak'õre pedea jarateapataɨrã padai beasima. Maamina abaɨpa chi Tachi Ak'õre k'orea naa jarateada mãrá mãicha jarateai bɨma juba topiru jĩra. Warra chak'e jĩra p'anɨẽra chik'o k'odai k'aepẽra jubat'u todai p'anɨma.

¹³ Chi juba to berã wapida chupuri k'ede pẽra sãmaasã́ jĩp'a oodait'a atua p'anɨma.

¹⁴ Maamina chi chik'oara chõarã paepuru bɨma. Ãchia Tachi Ak'õre pedea jĩrak'aua k'ɨ̃risia p'anɨnepa k'awa p'anɨma k'ãret'u chi pia bɨt'a mãɨnepa k'ãret'u piawẽa bɨt'a.