Hebreo 4 - Tachi Ak'õre Pedea

¹ Tachi Ak'õrepa piarã jara bɨma tachi wapida ichia ɨ̃apaapii bɨmá p'ue padai p'anɨt'a. Maamina jĩrak'aua p'anat'ɨ. Mãɨyawẽpɨra abaɨ mãranepema mãma p'ue paiwẽma.

^2-3 Chi pedea pia Tachi Ak'õrepa ɨ̃apaapii k'orea tachia ũrisidama tachi chõarãenapemarãpa ũrinana jĩra. Tachia sõnepa ĩjãa p'anɨ pẽra Tachi Ak'õrepa ɨ̃apaapii bɨmá padaipɨ. Maamina tachi chõarãenapemarãpa ũrinak'ari ĩjãanaanawẽ pẽra mãɨ pedeapa ãchi p'ue k'aripaé pasima. Ãchi k'orea Tachi Ak'õrepa nãɨya jarasima: «K'ĩruu bɨde mɨa piarãnepa nãɨya jarasima: “Mɨa chi ãchi ɨ̃apaapii bɨmá p'ue eda wãnaiwẽma”». Mãɨya jarasima nãɨ ĩjũa oodaedadepa ichia ooi bada ãarea oo uru bɨmina.

⁴ Tachi Ak'õre pedeade chi mimianak'apɨ́ ewari k'orea nãɨya bɨ bɨma: «Tachi Ak'õrepa jõma oo uru bada pẽra ewari sietede ɨ̃apaasima».

⁵ Maamina Tachi Ak'õrepa ichi pedeade nãɨya jara bɨma: «Mɨa ãchi ɨ̃apaapii bɨmá ãchi p'ue eda wãnaiwẽma».

⁶ Chi pedea pia Tachi Ak'õrepa ɨ̃apaapii k'orea naa ũrinaanapa ĩjãanaé pasima. Mãɨpuru ichia ɨ̃apaapii badamá p'ue padaé pasima. Maamina waapẽarã ẽpẽrarã wapida Tachi Ak'õrepa ɨ̃apaapii bɨmá p'ue wãnaipɨ.

⁷ Mãɨpuru Tachi Ak'õrepa ewari awara bɨsima ichia ɨ̃apaapii bɨmá wãnamẽrá. Mãɨ ewari Tachi Ak'õrepa t'ɨ̃ bɨsima «idi». Mãɨ ewari bɨk'ari tãaraarune ichia Davidepa mãɨ k'orea pedeasima. Mãɨ pedea naena bɨda nãɨya bɨ bɨma: «Idi Tachi Ak'õre pedea ũriutade mãra sõ chaarearãt'ɨ».

⁸ Josuepa israel ĩjũanepemarã Tachi Ak'õrepa piarã ɨ̃apaapii bɨmá ateewãnapara Tachi Ak'õrepa mãicha awara ɨ̃apaapii ewari k'orea pedeaiwẽ pasima.

⁹ Mãɨpuru chi mimianak'apɨ́ ewari ẽpẽrarã Tachi Ak'õrenepemarã pae wapida bɨma.

¹⁰ Abaɨ Tachi Ak'õrepa ɨ̃apaapii bɨmá wãipɨra, ichia oo badadepema ɨ̃apaasima Tachi Ak'õrepa ne ãarea ook'ari ɨ̃apaada jĩra.

¹¹ Mãɨpuru tachia pia jɨrɨdai p'anɨma Tachi Ak'õrepa ɨ̃apaapii bɨmá padai k'orea. Mãɨyara mi ãpia pida baedaiwẽma chõarãenapemarã ĩjãanawẽa p'anɨnepa baedada jĩra.

¹² Piarã Tachi Ak'õre pedea chok'ae bɨma mãɨnepa jua chaarea bɨma. Ichi pedea k'ĩruuparí nek'o k'ida ume era bɨ k'aepẽra p'eedea bɨma. Ichi pedeapa tachi k'ɨ̃risia mãɨnepa tachi sõpa oo k'ɨ̃ria bɨt'a ãarea pia k'awapiparima tachi k'ɨ̃risia, tachi jaore, tachi sõ sida eda k'õru jĩra.

¹³ Tachi Ak'õrepa ne ãarea unuparima. Chi ichia unuwẽa bɨ newẽma. Ichia ooda mãɨnepa tachia mẽra uru p'anɨt'a pia unu bɨma. Ichia tachi ak'ɨrude jõma tachia oodada ichiá jaradai p'anɨma.

Jesú tachi P'aare minachia k'awa bɨpɨ

¹⁴ Tachi Ak'õre Warra Jesú, tachi P'aare minachia k'awa bɨ pajãnea wãsima. Ichide ĩjãa p'anɨane a p'anɨ pẽra, piarã ĩjãa p'ananai p'anɨma.

¹⁵ Jesú tachi P'aare minachia k'awa bɨpa k'awa bɨma tachi jua ɨbɨwẽa p'anɨt'a. Tiorepa ichiá waa mĩesa jarasima ara mãɨya tachiá waa mĩesa jarapari jĩra. Maamina Jesupa nemietá ooé pasima.

¹⁶ Mãɨpuru tachia p'uedawẽa p'anɨne, Tachi Ak'õre poro jũra jɨ̃parí jɨ̃ bɨ suak'a beeparimá wãuta jĩra, ne wap'eadawẽa ichiá ɨt'aa chiididai p'anɨma. Mãɨya ichia tachi k'ĩra chupuriaipɨ mãɨnepa ichia k'aripamẽrá ɨt'aa chiidiutade ichi sõpiadepa k'aripaipɨ.