Hebreo 3 - Tachi Ak'õre Pedea

Moisé k'aepẽra Jesú chi atepe bɨma

¹ Ũpẽarã, mãra ẽpẽerã Tachi Ak'õrenepemarã pẽra mãɨnepa ichia mãra t'ɨ̃na pẽra, Jesucristo k'orea minachia jĩrak'aua k'ɨ̃risiat'ɨ. Tachia piarã ĩjãa p'anɨane apatama Ichi Tachi Ak'õrepa peedapɨ mãɨnepa P'aare minachia k'awa bɨpɨ.

² Tachi Ak'õrepa oopida Jesupa ãarea arí oosima Moisepa chi Tachi Ak'õre tedepemarã ome ooda jĩra.

³ Chi ẽpẽrarãpa chi te pia oo bɨa pia pedeapatama, ara chi te k'aepẽra. Ara mãɨ jĩra tachia Moisé k'orea pedeapataɨ k'aepẽra Jesú k'orea pia pedeadai p'anɨma.

⁴ Techa chi ooparí uru bɨma. Maamina Tachi Ak'õrepa ne ãarea oosima.

⁵ Moisé Tachi Ak'õre pae pari mimiaparí pẽra chi Tachi Ak'õre tedepemarã ome ãarea arí oosima. Ichia k'awapisima Tachi Ak'õrepa k'aadeapema ewaride k'ãre jarait'a.

⁶ Maamina Tachi Ak'õre warra Cristo ichi ẽpẽrarã chiparipɨ. Ãchi ome jõma arí oo bɨma. Tachia Cristode ĩjãa p'ananaipɨra mãɨnepa ichidepa ne jitadai k'orea arapá nɨ p'ananaipɨra, Tachi Ak'õreneerãpɨ.

Cristo itu bɨrãt'ɨ

^7-8 Mãɨ k'orea Tachi Ak'õre Jaorepa nãɨya jara bɨma: «Idi Tachi Ak'õre pedea ũriutade mãra sõ chaarearãt'ɨ mãra chõarãenapemarã sõ chaareadada jĩra. Ãchi ĩjũa pania newẽa bɨde tuanasidaɨde Tachi Ak'õrepa jarada itu bɨsidama ichia k'ãre ooi k'awadayá.

⁹ Mãma ichia ooda cuarenta ãyo unusidamina ãchia ĩjãanaé pasima k'ãre ooi k'awadayá.

¹⁰ Mãɨ k'orea ãchi ome k'ĩruuk'ari Tachi Ak'õrepa nãɨya jarasima: “Ãchi sõnepa mɨ piarã ĩjãanak'ama. Mɨ pedea ũrinak'ama”.

¹¹ Mãɨnepa k'ĩruuk'ari piarãnepa nãɨya jarasima: “Mɨa chi ãchi ɨ̃apaapii bɨmá p'ue eda wãnaiwẽma”».

¹² Ũpẽarã, jĩrak'aua p'anat'ɨ. Sõ chaareapa Tachi Ak'õrene ĩjãanawẽa p'anarãt'ɨ. Chi mãɨya bɨpa Tachi Ak'õre chok'ae bɨt'a itu bɨparima.

¹³ Mãɨpari wapida nãɨ ewari bɨde ewaricha chi k'aripa p'anat'ɨ mãɨ pia ĩjãanai k'orea. Mãɨya mi ãpia pida nemietaapa seak'ari sõ chaarea baiwẽma.

¹⁴ Tachia naa ĩjãanaananepa aba piuutadea Cristode ĩjãa p'ananaipɨra, ichi ome p'ananaipɨ.

¹⁵ Naena jara bada jĩra mãicha jararuma: «Idi Tachi Ak'õre pedea ũriutade mãra sõ chaarearãt'ɨ mãra chõarãenapemarã sõ chaareadada jĩra».

¹⁶ Tachi Ak'õre pedea ũrik'ari ¿k'ai sõ chaareasidama? ¿Ãarea Moisepa Egitodepa ateewãnana mãɨya sõ chaareasidawẽk'ãra?

¹⁷ ¿Tachi Ak'õre k'ai ome cuarenta ãyo k'ĩruu basima? ¿Chi nemietá oodada ome k'ĩruu basiwẽk'ãra? ¿Mãɨ k'orea ãchi ĩjũa pania newẽa bɨde ãarea piusidawẽk'ãra?

¹⁸ ¿Tachi Ak'õrepa k'aiyá p'ue wãnaiwẽane asima, chi ichia ɨ̃apaapii bɨmá? ¿Chi ichi pedea ĩjãanak'apɨɨrã́ mãɨya jarasiwẽk'ãra?

¹⁹ Mãɨnepa tachia k'awa p'anɨma ãchia ĩjãanaanawẽ pẽra Tachi Ak'õrepa ãchi ɨ̃apaapii badamá p'ue padaiwẽt'a.