Hebreo 2 - Tachi Ak'õre Pedea

Jĩrak'aua p'anat'ɨ Cristo itu bɨdaemaapa

¹ Mãɨpuru jĩrak'aua p'anat'ɨ tachia chi piarãpẽa pedea ũrinaanat'a minachia ũrinai p'anɨma mãɨnepema ãyá wãnaemaapa.

² Chi Tachi Ak'õrepa naena jara bɨeda pedea ichia ɨt'aripa peedaɨrãnepa teasima. Mãɨ pedea ẽpẽrarãpa ãarea oodai p'anasidama. Chi ãarea oowẽa be mãɨnepa chi mãɨ pedea ũriwẽa be Tachi Ak'õrepa arí ɨtɨapachima.

³ Ara mãɨ jĩra chi Tachi Ak'õrepa tachi minachia k'aripaidepema tachia itu bɨdaipɨra, ¿Ichia ɨtɨaidepema sãmaasã́ tachi mĩrunaima? Mãɨ pedea Tachi Chipari Jesupa naa jarateasima. Chi ũrinaanapa tachiá mãɨ piarãane asidama.

⁴ Mãɨ awara Tachi Ak'õrepa ẽpẽerãpa ne p'ue oodak'apɨ́ minachia wawaria oopisima. Ichia k'ɨ̃ria bada jĩra ichi Jaorepa oopi bɨt'a ichidirãcha teasima. Jõma mãɨnepa mãɨ pedea piarãt'a k'awapisima.

Jesucristo ara tachi jĩra bada

⁵ Chi ĩjũa chiwidi chei bɨt'a, chi mãɨ k'orea taipa jara p'anɨt'a Tachi Ak'õrepa ichia ɨt'aripa peedaɨrã juade mãɨ bɨé pasima.

⁶ Mãɨpari Tachi Ak'õre pedeade nãɨya bɨ bɨma: «Tachi Ak'õre, ẽpẽra ¿k'ãrema pɨa mãɨ k'orea k'ɨ̃risiai k'orea? Ẽpẽra ¿k'ãrema, pɨa mãɨ ak'ɨi k'orea?

⁷ Pɨa ichi chi Tachi Ak'õrepa ɨt'aripa peedaɨrã k'aepẽra k'aepe bɨsima. Ichi pia bɨsima mãɨnepa chi minachia k'awa bɨ bɨsima».

⁸ Pɨa ne ãarea ichi juade bɨsima. Tachi Ak'õrepa ne ãarea ichi juade bɨda pẽra, ichi juade ne ãpia pida bɨwẽa bɨt'a newẽma. Waidi ununawẽma ne ãarea ichi juade bet'a.

⁹ Maamina Jesú k'orea k'awa p'anɨma. Tachi Ak'õrepa ichit'u nãɨ ĩjũane k'aepe bɨsima chi ɨt'aripa peedaɨrã k'aepẽra. Tachi Ak'õrepa ichi sõpiadepa mãɨya oosima Jesú jõmãɨrã k'orea piumẽrá. Minachia mĩak'ari piuda pẽra Tachi Ak'õrepa ichi pia bɨsima mãɨnepa chi atepe bɨsima.

¹⁰ Tachi Ak'õrepa ne ãarea oosima. Ichidepa ne ãarea bɨma. Tachi Ak'õremá pia basima Jesú minachia mĩapiit'a. Mãɨya chi ichi ẽpẽrarã K'aripaparí arí bɨsima. Ichidepa Tachi Ak'õrepa ichi warrarã chok'ará p'anɨ jɨrɨ atasima, ichi pia bɨdepema jitadamẽrá.

¹¹ Jesupa ẽpẽerã Tachi Ak'õre pae pia bɨparima. Ichia, mãɨnepa mãɨ ẽpẽerã pida ãchi Ak'õre ara aba bɨt'a uru p'anɨma. Mãɨ k'orea Jesú p'erak'ama ãchi ichi ũpẽarãane ai k'orea.

¹² Tachi Ak'õre pedeade nãɨya bɨ bɨma: «Mɨa pɨ k'orea mɨ ũpẽarã́ pedeaipɨ. Ãareaɨrã ará p'anɨne mɨa pɨá pia pedeaipɨ».

¹³ Mãɨnepa nãɨya bɨ bɨma: «Mɨa ichide ĩjãa baipɨ». Mãɨnepa nãɨ sida bɨ bɨma: «Mɨ nãma bɨma, mãɨnepa warrarã Tachi Ak'õrepa mɨá teada mɨ ome ará p'anɨma».

¹⁴ Mãɨ warrarã k'ak'ua pará mãɨnepa oa pará ooda pẽra Jesú sida abarik'a basima ichi piudadepa tiore p'uei k'orea. Mãɨ tiorepa tachi piudai p'anɨ ichi juade uru bɨma.

¹⁵ Jesupa tiore p'ueda pẽra, chi piudai k'orea wap'ea beada ichia ãarea k'aripasima. Ewaricha piudai wap'ea p'anɨnepa ãchi piawẽa p'anasidama chipari pae pari mimiapataɨrã jĩra.

¹⁶ Piarã Jesú chi Tachi Ak'õrepa ɨt'aripa peedaɨrã k'aripade cheé pasima, mãɨpari Abrahán jĩra Tachi Ak'õrene ĩjãa bet'a k'aripade chesima.

¹⁷ Ichi cheside ne ãareaɨne tachi jĩra basima waapẽarã k'ĩra chupuriaparí p'aare minachia k'awa bɨ pai k'orea. Piarã Tachi Ak'õre k'ĩrari p'aare minachia k'awa bɨ jõma chi arí ooparí beesima. Mãɨpa ara ichi itu peapisima ẽpẽerãpa nemietá oopataɨ Tachi Ak'õrepa k'ɨ̃risia atuamẽrá.

¹⁸ Tiorepa waa mĩesa jara baside Jesú minachia mĩasima. Mãɨpuru tiorepa tachiá waa mĩesa jara bɨde, Jesupa tachi sãmaasã́ k'aripai k'awa bɨma.