Hebreo 13 - Tachi Ak'õre Pedea

Ũpẽarã sãmaasã́ nipadai p'anɨma

¹ Mãra ũpẽarã pẽra ara chi k'ɨ̃ria p'anat'ɨ.

² K'ɨ̃risia atuarãt'ɨ chi mãra tiidá cheuta mãɨa pia pedeadai p'anɨt'a. Chi eda waapẽarãpa k'awadawẽa Tachi Ak'õrepa ɨt'aripa peedaɨrã ãchi tiidá pia chepi p'anasidama.

³ K'ɨ̃risia atuarãt'ɨ chi jɨ̃a nɨbɨpataɨ tede nɨbet'a, mãra sida ãchi ome eda serra p'anɨ jĩra. Chi ẽpẽrarãpa piawẽa oo p'anɨnepa minachia mĩa be k'ɨ̃risia atuarãt'ɨ mãra sida ãchi ome minachia mĩa p'anɨ jĩra.

⁴ Ãareaɨrãpa ãchi k'ima ome pia p'ananai k'orea minachia k'ɨ̃risiat'ɨ. Tachi k'ak'uadepa nemietá oopataɨ mãɨnepa k'ima awaraɨ ome k'ãipataɨ Tachi Ak'õrepa ɨtɨai pẽra abapuru mãra k'ima ome k'ãinai p'anɨma.

⁵ Erreara k'ɨ̃ria p'anarãt'ɨ. Mãɨpari ara machia uru p'anɨnepa sõpia p'anat'ɨ Tachi Ak'õrepa nãɨya jarada pẽra: «Mɨa pɨ ameeiwẽma mãɨnepa pɨ tuaba bɨiwẽma».

⁶ Mãɨ k'orea tachia ne wap'eawẽa nãɨya jaradai p'anɨma: «Mɨ Chiparipa mɨ k'aripapari pẽra, mɨ ne wap'eak'ama. ¿Sãmaasã́ ẽpẽrapa mɨ nemietá ooima?»

⁷ Chi mãra minachia k'awa p'anɨrã k'orea k'ɨ̃risiat'ɨ. Ãchia Tachi Ak'õre pedea mãrá jarateasidama. K'ɨ̃risiat'ɨ sãmaasã́ ãchi p'ɨrrɨa p'anana mãɨnepa mãɨ k'orea k'ãasãasit'a. Ãchia Cristode ĩjãa p'anana jĩra mãra pida ara ĩjãa p'anat'ɨ.

⁸ Jesucristo k'ĩra awara bak'ama. Noena bada jĩra idi pida abarik'a bɨma, mãɨnepa ewaricha mãɨya baipɨ.

⁹ Maamina chi eda waapẽarãpa ne wawaria piawẽa jarateapatama. Ãchirã́ itu seapirãt'ɨ. Mãrapa ne wawaria k'o p'anɨnepa wa nek'odawẽa p'anɨnepa k'aripak'ama. Chi mãɨya oo p'anɨrã pia p'anɨwẽma. Mãɨpari Tachi Ak'õrepa ichi sõpiadepa k'aripa bɨma mãrapa pia sõnepa ĩjãanamẽrá.

¹⁰ Tachia Jesú uru p'anɨma, ãnimara tachi nemietá k'orea paateadada jĩra. Maamina chi p'aarerãpa ãchi nemietá oodada k'orea ne paatea p'anɨnepa chi Jesudepa nepia p'ue jitadaiwẽma.

¹¹ Tachi nemietá k'orea chi p'aare minachia k'awa bɨpa ãnimara oa chi Tachi Ak'õre pae k'ɨda jẽesa chi atepe piipará bɨde eda oa jĩp'ode wãparima. Maamina chi ãnimara peadada k'odai k'aepẽra p'uuru awara ateewãnak'ari paapatama.

¹² Ara mãɨ jĩra Jesú p'uuru awara minachia mĩasima ichi oapa ẽpẽerã Tachi Ak'õre pae pia bɨi k'orea.

¹³ Mãɨpuru p'uuru awara Jesumá wãuta jĩra abapuru ichi ome wãnai p'anɨma. Ẽpẽerãpa Jesua k'achia pedeadada jĩra tachiá pida k'achia pedeautade choadai p'anɨma.

¹⁴ Nãɨ ĩjũane tachi p'uuru jõk'apɨɨwẽne p'anɨwẽma, mãɨpari nɨ p'anɨma p'uuru jõk'apɨɨde p'ananai k'orea.

¹⁵ Mãɨ k'orea Jesucristodepa tachia, chi Tachi Ak'õrene ĩjãa p'anɨane a p'anɨrãpa, ewaricha ichiá pia pedeadai p'anɨma ãnimara paateauta jĩra.

¹⁶ K'ɨ̃risia atuarãt'ɨ pia oodai k'orea mãɨnepa mãrapa uru p'anɨnepa chi k'aripa p'ananai k'orea. Mãɨ ãarea Tachi Ak'õrepa pia unu bɨma ãnimara paatea p'anɨ jĩra.

¹⁷ Ũpẽarã, mãra minachia k'awa p'anɨrãpa jara p'anɨt'a oot'ɨ. Mãra ak'ɨ p'anɨ pẽra ãchi juade p'anat'ɨ. Ãchia k'awa p'anɨma Tachi Ak'õrepa ak'ɨrude ãarea ãchia oodada ichiá ará jaradait'a. Mãɨpuru ãchia jara p'anɨt'a oot'ɨ. Mãɨya ãchia arapá mãɨnepa sõk'achiawẽa ãarea oodaipɨ. Mãrapa mãɨya oodawẽa p'anɨnepa ãchi sõk'achiapidaipɨra, mãɨ mãra p'ue pia k'aripapidaiwẽma.

¹⁸ Tai k'orea Tachi Ak'õrea ɨt'aa chiidit'ɨ. Tai ne ãareaɨne jĩp'a nipadai k'ɨ̃ria p'anɨma mãɨnepa k'awa p'anɨma nemietá oodawẽa p'anɨt'a.

¹⁹ Mɨa chichupuria idiruma, mɨ k'orea Tachi Ak'õrea ɨt'aa chiidipadade at'ɨ mãicha isapea mãramá wãpimẽrá.

²⁰ Tachi Chipari Jesucristo chi Oveja Ak'ɨparí chi Minachia Bɨpɨ. Tachi Ak'õrepa chi tachi ne k'ɨ̃risiawẽa p'anapiparí ichi piu badadepa chok'ae p'irabaripisima. Jesucristo oadepa Tachi Ak'õre ẽpẽrarã ome pedea ausidama. Mãɨ ewaricha baipɨ.

²¹ Mɨa k'ɨ̃ria bɨma chi ara mãɨ Tachi Ak'õrepa ne ãarea pia mãrá oo k'awapiit'a, ichia k'ɨ̃ria bɨ jĩra p'ue oodamẽrá. Mãɨnepa k'ɨ̃ria bɨma Jesucristodepa ichia tachi sõne ne ãarea ooit'a ichia k'ɨ̃ria bɨ jĩra p'ananamẽrá. Tachia ewaricha Jesucristoa pia pedeadai p'anɨma. Mãɨya beese.

²² Ũpẽarã, mɨa nãɨ k'art'a teesoawẽa bɨt'a bɨsima mãrapa pia ĩjãanamẽrá. Mãɨpuru mɨa mãrá chichupuria idiruma nãɨ pedea pia ũrinamẽrá.

²³ K'awat'ɨ tachi ũpẽa Timoteo eda jɨ̃a nɨbada awara wãsit'a. Ichi isapea mɨmá cheipɨra, mãra ak'ɨde wãrune mɨa ichi ateewãipɨ.

²⁴ Ũpẽarã, mãra ak'ɨpataɨrã́ mãɨnepa ãarea Tachi Ak'õre ẽpẽrarã́ pia p'anapadade a jarat'ɨ. Ichiaba ũpẽarã Italia tuadepemarãpa mãrá pia p'anapadade a jara pee p'anɨma.

²⁵ Mɨa k'ɨ̃ria bɨma Tachi Ak'õrepa ichi sõpiadepa mãra ãarea k'aripa bait'a.