Hebreo 12 - Tachi Ak'õre Pedea

Jesucristode k'ɨ̃risia p'anat'ɨ

¹ Mãɨ ẽpẽerã minachia p'anɨrãpa Tachi Ak'õrene piarã ĩjãasida pẽra tachia pida ara mãɨ jĩra ĩjãa p'ananai p'anɨma. Chi tachiá itu ĩjãapik'aɨ mãɨnepa nemietaapa tachi pɨra uru baparí ãyá bɨdak'ari ãarea choa p'anɨnepa naa wãtɨma tachi wãnai p'anɨmá.

² Jesude pia k'ɨ̃risiadai p'anɨma. Ichia k'aripasima tachia naa ĩjãanamẽrá mãɨnepa k'aripaparima ewaricha ĩjãa p'ananamẽrá. K'ɨ̃risiat'ɨ sãmaasã́ ichi k'urusude minachia mĩasit'a. Mãɨ k'orea p'erai badamina p'eraé pasima. Ichia k'awasima mãɨya nak'ari minachia arapá bait'a. Idiapae Tachi Ak'õre suak'a beeparí pia bɨ juaraari suak'abari bɨma.

³ Minachia k'ɨ̃risiat'ɨ ẽpẽra k'achia p'anɨrãpa Jesú piawẽa oosidaɨde sãmaasã́ choasit'a. Mãɨya mãra sẽnawẽma mãɨnepa ĩjãa p'anɨt'a itu bɨdai k'ɨ̃risiadaiwẽma.

⁴ Mãra nemietá ome chõo p'anɨmina wapida mãra peadawẽa p'anɨma Jesú peadada jĩra.

⁵ Pia ĩjãanamẽrá Tachi Ak'õre pedeade bɨ bɨma ¿mãrapa k'ɨ̃risia atuasidak'ãra? Ichi warrarã́ nãɨya jarasima: «Mɨ warra, Tachi Chiparipa ɨtɨarude minachia k'ɨ̃risiarãse. Ichiaba ũraarune sõk'achiarãse.

⁶ Chi Tachi Chiparipa k'ɨ̃ria bɨ ẽpẽerã ɨtɨaparima. Chi ichi warrarã jĩra uru bɨrãpa nemietá oosidara mãɨrã ɨtɨaparima».

⁷ Mãra Tachi Ak'õre warrarã pẽra minachia mĩa p'anɨt'a choat'ɨ ichia mãɨpa jĩp'a oopi bɨ pẽra. ¿Warrapa jĩp'a oomẽrá chi ak'õrepa ɨtɨaiwẽk'ãra?

⁸ Tachi Ak'õrepa ichi warrarã ãarea ɨtɨaparima. Mãɨya ooepɨra, mãra ichi warrarãwẽma.

⁹ Tachi nãɨ ĩjũanepema ak'õrerãpa tachi ɨtɨapachidama. Mãɨpa ¿ewaricha chok'ae p'ananai k'orea tachi Pajãnepema Ak'õre minachia wap'eadaiwẽa p'anɨk'ãra?

¹⁰ Tachi ak'õrearã nãɨ ĩjũane chok'ae p'anasidaɨde tachi ɨtɨapachidama ara ãchia k'ɨ̃risia p'anana jĩra. Maamina Tachi Ak'õrepa mãɨya ooparima ichi jĩra nemietaawẽa pia p'ananamẽrá.

¹¹ Ɨtɨautade tachi arapaapidak'ama mãɨpari minachia sõk'achiapipatama. Maamina jãapae chi jĩp'a oodai k'awadak'ari ara mãɨya oopatama mãɨnepa ne k'ɨ̃risiawẽa p'anapatama.

¹² Mãɨ k'orea mãra jua ɨbɨwẽa sẽ be mãɨnepa mãra sĩraporo ɨbɨwẽa sẽ be mãɨ ãarea ɨbɨapit'ɨ.

¹³ O jĩp'a bɨde nipat'ɨ. Mãɨya chi ɨbɨwẽa berã baedaiwẽma mãɨyawẽapuru pia nipadaipɨ.

Tachi Ak'õre sõpia bɨt'a itu bɨdaiwẽa p'anɨ

¹⁴ Ãareaɨrã ome ne k'ɨ̃risiawẽa p'anat'ɨ. Mãɨnepa Tachi Chipari pae pia p'anat'ɨ. Chi Tachi Chipari pae pia p'anɨwẽpa ichi p'ue ununaiwẽma.

¹⁵ Jĩrak'aua p'anat'ɨ chi Tachi Ak'õrepa ichi sõpiadepa k'aripa bɨt'a mi ãpia pida itu bɨpidaemaapa. Mãɨnepa jĩrak'aua p'anat'ɨ mãra paara mi ãpia pida ẽpẽra pak'uru k'arra asia bɨ jĩra bɨt'a p'anapidaemaapa. Mãɨpa ũpẽarã́ piawẽa k'ɨ̃risiapik'ari mietá oopiparima.

¹⁶ Jĩrak'aua p'anat'ɨ mi ãpia pida wẽra awaraɨ ome k'ãipataɨ mãɨnepa chi Esaú jĩra Tachi Ak'õrene piawẽa k'ɨ̃risiapataɨ mãra paara p'anapidaemaapa. Esaú Jacó warra ĩwini pẽra chi ak'õrepa uru bɨdepema neet'á minachia jitai basima. Maamina ichi ũpẽapa barimama chik'o k'opida k'orea, ichia ichi ak'õre neet'á jitai badat'a ãarea chi ũpẽá teasima.

¹⁷ Mãrapa k'awa p'anɨma mãɨya nak'ari Esaupa k'ɨ̃ria basit'a chi ak'õrepa pedea piadepa ichiá pia pedeait'a Tachi Ak'õrepa k'aripamẽrá. Maamina chi ak'õrepa ichi itu bɨsima. Jẽasimina Esaupa naena oodapa p'ue pia bɨé pasima.

¹⁸ Mãra Tachi Ak'õremá chedada, chi israel ĩjũanepemarã chedada jĩra bɨwẽma. Israel ĩjũanepemarã Sinaí eyadea chesidaɨde, mãɨ eya ãchi taupa unusidama. Mãɨ eyade t'ɨpɨ urua nɨbasima, ewari p'ãrio nɨbasima, mãɨnepa nãu minachia p'õat'ɨ nɨbasima.

¹⁹ Ãchia chi ãnimara k'achu pedea ũrisidama mãɨnepa Tachi Ak'õrepa jĩk'ua pedea bɨt'a ũrisidama. Mãɨ ũrisidaɨde ne wap'eapa chichupuria idisidama Tachi Ak'õrea waa pedeapiemaapa.

²⁰ Minachia p'erasidama Tachi Ak'õrepa nãɨya jarada pẽra: «Paritua ẽpẽra wa ãnimara nãɨ eya orrobarisidara, mawarapa bat'a peadai p'anɨma wa siapa t'ĩunak'ari peadai p'anɨma».

²¹ Israel ĩjũanepemarãpa unu p'anɨt'a minachia mietá bɨ pẽra Moisepa nãɨya jarasima: «Mɨ ne wap'eapa ore nɨbɨma».

²² Maamina mãra chi piarãpẽa Sión eyadea chesidama, chi pajãnepema Jerusalén apataɨdea, chi Tachi Ak'õre chok'ae bɨ p'uurudea mãɨnepa chi ichia ɨt'aripa peedaɨrã minachia nɨbɨt'a ãarea ará arapá nɨbɨmá.

²³ Mãra Tachi Ak'õre warrarã ãarea ará nɨbɨmá chesidama. Tachi Ak'õremá, ãareaɨrã warrarã naapemarãpɨ. Pajãnepemarã pẽra ãchi t'ɨ̃ bɨ bɨma. Mãra chi ãarea tachi nepɨra ak'ɨparimá chesidama. Chi ẽpẽerã jaore jĩp'a ɨt'ari be Tachi Ak'õrepa pia bɨdamá chesidama.

²⁴ Mãra Jesumá chesidama. Ichidepa Tachi Ak'õre ẽpẽerã ome pedea chiwidi auside mãra ichia oa jĩp'odamá chesidama. Jesú oa ãrina Abel oa ãrina k'aepẽra mãɨpa tachiá atepe k'awapi bɨma.

²⁵ Mãɨ k'orea jĩrak'aua p'anat'ɨ Tachi Ak'õrepa jara bɨt'a itu bɨdaemaapa. Chi ichia nãɨ ĩjũane Sinaí eyade jarada itu bɨdaadarã ɨtɨaside ãjã́ p'aneenaé pasima. Mãɨpuru ichia pajãnepa tachi sõne jara bɨt'a itu bɨdaipɨra ¿Mĩrunaik'ãra? Mĩrunaiwẽma.

²⁶ Tachi Ak'õrepa Sinaí eyade pedeaside iurumia wãsima. Maamina nãɨ ewaride ichia nãɨya jara bɨma: Mãicha mɨa iurumia wãpiipɨ. Mãɨne abapuru nãɨ ĩjũa orepiiwẽma, mãɨpari pajã sida orepiipɨ.

²⁷ Mãicha orepiyade aside Tachi Ak'õrepa k'awapisima ne ãarea ichia ook'oadat'a orek'ari jõpiit'a. Mãɨne abapuru chi ne jõk'apɨɨt'a beeipɨ.

²⁸ Tachi Ak'õre juadepema jõk'apɨɨmá p'ananai pẽra ichiá pia bɨade adai p'anɨma. Minachia wap'ea p'anɨnepa ichiá pia pedeadai p'anɨma ichia k'ɨ̃ria bɨ jĩra,

²⁹ Tachi Ak'õrepa t'ɨpɨ uruapa ãarea paa peei bɨẽra.