Hebreo 11 - Tachi Ak'õre Pedea

Tachi Ak'õrene ĩjãa bɨ k'orea bɨda

¹ Tachia Tachi Ak'õrene ĩjãa p'anɨ pẽra k'awa p'anɨma chi tachia ne nɨ p'anɨt'a piarã jitadaipɨ mãɨnepa chi tachia ne ununawẽa p'anɨt'a mãɨrã piarãpɨ.

² Tachi chõarãenapemarãpa Tachi Ak'õrene ĩjãa p'anana pẽra, Tachi Ak'õrepa ãchi pia unusima.

³ Tachia Tachi Ak'õrene ĩjãa p'anɨ pẽra, k'awa p'anɨma Tachi Ak'õre pedeadepa nãɨ ĩjũa mãɨnepa pajã ãarea oosit'a. Mãɨya chi tachia ununak'aɨdepa ichia chi ne ãarea tachia unupataɨ oosima.

⁴ Abelpa Tachi Ak'õrene ĩjãa bada pẽra, Caínpa teada k'aepẽra nepia bɨt'a teasima. Ĩjãana pẽra ichia teada Tachi Ak'õrepa pia unuk'ari, jarasima ichi jĩp'a basit'a. Abel piudamina ichia piarã ĩjãa badapa tachiá wapida k'awapi bɨma Tachi Ak'õrene ĩjãanai p'anɨt'a.

⁵ Enopa Tachi Ak'õrene ĩjãa bada pẽra, Tachi Ak'õrepa chok'ae ateewãsima mãɨ piupiemaapa. Mãɨ ateewãna pẽra waa ununaé pasima. Tachi Ak'õre pedeade bɨ bɨma Enó ateewãi naena Tachi Ak'õrepa ichi pia unusit'a.

⁶ Maamina chi Tachi Ak'õrene ĩjãak'apɨ́, Tachi Ak'õrepa mãɨ pia unuk'ama. Chi Tachi Ak'õremá che k'ɨ̃ria bɨpa ĩjãai bɨma Tachi Ak'õre piarã bɨt'a mãɨnepa ãarea chi ichi jɨrɨutat'a k'aripaparit'a.

⁷ Tachi Ak'õrepa Noea jarasima ne waidi unuk'á bet'a mãɨ ununait'a. Mãɨ Noepa ĩjãana pẽra, Tachi Ak'õre wap'ea bada pẽra p'ãp'orro minachia bɨt'a oosima, ichi ẽpẽerã k'aripai k'orea. Mãɨya chi nãɨ ĩjũane bea ãchi nemietá k'awapisima. Noepa ĩjãana pẽra Tachi Ak'õrepa ichi jĩp'a unusima.

⁸ Tachi Ak'õrepa Abrahaná jarasima ichia teai jaradamá wãmẽrá. Abrahanpa Tachi Ak'õrene ĩjãana pẽra, sãmá wãit'a atua bɨmina ichi tua ameek'ari wãsima.

⁹ Tachi Ak'õrene ĩjãana pẽra ichi Tachi Ak'õrepa teai jarada tuade bapachima p'aru te oodade waapẽarã jĩra. Ichi warra Isá mãɨnepa ichi ãichae Jacó ara mãɨ jĩra p'anapachidama, Tachi Ak'õrepa ãchiá pida mãɨ tua teai jarada pẽra.

¹⁰ Abrahán mãɨya bapachima, chi p'uuru jõk'á bɨdea bade wãi k'orea nɨ bada pẽra. Mãɨ p'uuru Tachi Ak'õrepa minachia k'ɨ̃risia bak'ari ãarea oosima.

¹¹ Abrahán chõa baside, chi k'ima Sara warra t'õk'a pasimina, Abrahanpa ĩjãasima Tachi Ak'õrepa ichiá warra unupiit'a. Tachi Ak'õrepa jararut'a piarã mãɨya ooparit'a ĩjãana pẽra warra unusima.

¹² Mãɨya Abrahán piuimaa basimina ichidepa ẽpẽerã minachia chesidama, k'ãk'ãi minachia p'anɨ jĩra mãɨnepa p'usa ipu p'ue joisiadak'a jĩra.

¹³ Mãɨrã ãarea Tachi Ak'õrene ĩjãa p'anɨ piusidama. Maamina Tachi Ak'õrepa teai jarada ãchia nãɨ ĩjũane jitadaé pasima. Maamina k'awasidama k'aadeapema ewaride ichia ãarea teait'a. Mãɨ k'orea arapaasidama mãɨnepa waapẽarã́ pia pedeasidama nãɨ ĩjũane ãchi tua awaraɨdepemarãt'a mãɨnepa tua awaraɨde p'ɨrrɨa bet'a.

¹⁴ Mãɨya pedea p'anɨnepa pia k'awapisidama ãchi tua piarã jitadai k'orea nɨ p'anɨt'a.

¹⁵ Chi ãchi chedada tua jĩitea wãnai k'ɨ̃risiadaadapara ya p'ue jĩitea wãnai pasima.

¹⁶ Maamina tua piipará bɨ pajãne bɨt'a k'ɨ̃ria p'anasidama. Mãɨpuru Tachi Ak'õre p'erak'ama ichi ãchi Ak'õrene autade. Ichia p'uuru ãchi pae oo uru bɨma.

^17-18 Tachi Ak'õrepa Abrahaná jarasima ichi warra paateapade asima, piarã ĩjãa bɨ k'awai k'orea. Maamina mãɨ naena Tachi Ak'õrepa ichiá nãɨya jarasima: «Pɨ warra Isaadepa warrarã minachia ununaipɨ». Tachi Ak'õrepa mãɨya jara basideepuru Abrahanpa ichi warra abapuru bɨt'a paateai k'orea basima.

¹⁹ Abrahanpa k'ɨ̃risiasima ichi warra Isá peak'ari Tachi Ak'õrepa ichi p'ue chok'ae p'irabaripiit'a. Piarã Tachi Ak'õrepa Isá chok'ae p'irabaripiipɨra itu peapié pasima. Mãɨya Abrahanpa Isá chok'ae uru beesima.

²⁰ Isapa Tachi Ak'õrene ĩjãa bada pẽra ichi warra Jacoa mãɨnepa Esaua pia pedeasima Tachi Ak'õrepa k'aadeapema ewaride k'aripamẽrá.

²¹ Jacobo piuimaa baside Tachi Ak'õrene ĩjãa bada pẽra ichia José warrarã abaabá p'anɨa pia pedeasima Tachi Ak'õrepa k'aripamẽrá. Maapae ichi tuma ɨ̃rɨ t'ɨ bai nɨbeek'ari, Tachi Ak'õrea pia pedeasima.

²² José piuimaa baside Tachi Ak'õrene ĩjãa bada pẽra israel ĩjũanepemarã Egito tuadepa wãnayane asima. Wãutade ichi bɨɨrɨ Canaán ĩjũanea t'ɨbaride ateewãpadaade asima.

²³ Moisé t'õsi ewaride p'araonpa israel ĩjũanepemarã warra ɨmɨk'ĩra chak'erã ãarea k'enapisima. Maamina Moisé ak'õrerãpa Tachi Ak'õrene ĩjãa p'anana pẽra chi mãɨpa jarada wap'eadaé pasima. Moisé t'õk'ari unusidama ichi warra auk'ará bɨt'a. Mãɨ peapiemaapa jedek'o ũpea mẽra uru p'anasidama.

²⁴ Moisepa Tachi Ak'õrene ĩjãa bada pẽra chõa pak'ari k'ɨ̃riawẽa basima ẽpẽrarãpa ichi p'araón k'au warraade adait'a.

²⁵ Ichimá nemietá oo bɨdepa arapá badooi k'aepẽra piipará basima ẽpẽerã Tachi Ak'õreneerã ome ará mĩa bait'a.

²⁶ Tachi Ak'õrepa Tachi K'aripaparí teai jarada piarã cheide ĩjãana pẽra, ichia k'ɨ̃risiasima Egitodepema nepia uru bai k'aepẽra pia bɨma minachia mĩa bait'a. Tachi Ak'õrepa k'aadeapema ewaride teai jarada pia jita k'ɨ̃riana pẽra mãɨya k'ɨ̃risia basima.

²⁷ Moisepa Tachi Ak'õrene ĩjãa bada pẽra p'araón k'ĩruui bɨt'a wap'eawẽa Egitodepa wãsima. Chi Tachi Ak'õre tachia ununak'apɨɨt'a unu bɨ jĩra ichia ĩjãa bɨt'a itu bɨé pasima.

²⁸ Moisepa Tachi Ak'õrene ĩjãa bada pẽra israel ĩjũanepemarã Egitodepa wãnana k'ɨ̃risiapataɨ ewari oopisima. Mãɨne techa chi eda wãpataɨ ik'idá oapa p'ɨrɨpik'oasima chi peaparipa ãchi warrarã chi ɨmɨk'ĩra warra naapemarã peapiemaapa.

²⁹ Tachi Ak'õrene ĩjãa p'anana pẽra israel ĩjũanepemarã P'usa P'urea bɨ Tachi Ak'õrepa chi to o ewaside ãchi mãɨne p'õesã́ wãsidama. Maamina Egitodepemarã ara mãɨ jĩra ode wãutade ãarea todepa piusidama.

³⁰ Tachi Ak'õrene ĩjãa p'anana pẽra israel ĩjũanepemarã Jericó p'uuru audu ewari bari k'ak'o siete jũra wãutade mãɨ p'uuru ik'idá mawaradepa jũk'a bada ãarea baewãsima.

³¹ Israel ĩjũanepemarã ume p'anɨpa Jericó p'uuru sãmaasã́ bɨ k'awadai k'orea ak'ɨde wãsidaɨde, wẽra k'achia bɨ Rahapa Tachi Ak'õrene ĩjãa bada pẽra ãchiá pia pedeasima. Mãɨ k'orea israel ĩjũanepemarãpa chi Tachi Ak'õrene ĩjãanak'apɨɨrã ãarea k'enasidaɨde ichi peadaé pasima.

³² ¿Tachi Ak'õrene ĩjãapataɨrã k'orea mɨa k'ãre mãicha jaraima? Sansón, Gedeón, Barac, Jep'té, David, Samuel, mãɨnepa Tachi Ak'õre pari pedeapataɨrã k'orea pedeai k'orea chi ewari ará paiwẽma.

³³ Tachi Ak'õrene ĩjãa p'anana pẽra chi eda waapẽarãpa tua awaraɨ p'uesidama, chi eda waapẽarãpa ãchi tua jĩp'a uru beasima, chi eda waapẽarãpa nãɨ ĩjũane Tachi Ak'õrepa teai jarada jitasidama mãɨnepa chi eda waapẽarã Tachi Ak'õrepa imamamá itu k'opié pasima.

³⁴ Tachi Ak'õrene ĩjãa p'anana pẽra chi eda waapẽarã t'ɨpɨ urua nɨbɨpa p'ue paak'oaé pasima. Chi eda waapẽarã k'ĩruuparí nek'opa peadai padadepema p'ue peadaé pasima. Chi eda waapẽarã k'ak'ua chaareawẽa beada k'ak'ua ɨbɨak'oasidama mãɨnepa jua chaarea beasima chi nek'ĩramá ome k'ĩruunai k'orea. Mãɨpa ãchi chi nek'ĩramá ãchi naa mĩrupisidama.

³⁵ Chi eda waapẽarã wẽerãpa Tachi Ak'õrene ĩjãa p'anana pẽra chi ẽpẽrarã ãchidirã piudada pada chok'ae p'irabaripidada unusidama. Maamina waapẽarã Tachi Ak'õrene ĩjãa p'anɨ k'orea ẽpẽerãpa minachia jok'aedak'ari peasidama. Eda serra p'anasidama, minachia mĩapidai k'orea. Mãma ãchi k'ẽet'aadayade asidama chi Tachi Ak'õrene waa ĩjãanaiwẽa p'anɨane adaipara. Maamina itu peapisidama, chok'ae p'irabaridak'ari piipará p'ananait'a nɨ p'anana pẽra.

³⁶ Chi eda waapẽarã Tachi Ak'õrene ĩjãa p'anɨ k'orea ẽpẽerãpa oo uru p'anɨpa k'achia pedeasidama, soapa p'esidama mãɨnepa k'ãnenapa jɨ̃nak'ari eda jɨ̃a nɨbɨpataɨ tede jɨ̃a nɨbɨpisidama.

³⁷ Eda waapẽarã mawarapa bat'a peasidama. Eda waapẽarã tachi estarik'a ɨrradak'ari peasidama. Eda waapẽarã k'ĩruuparí nek'opa peasidama. Eda waapẽarã te newẽa be pẽra, paritua p'ɨrrɨa wãsidama. Mãɨne jɨ̃nai k'orea newẽa beada pẽra oveja e k'osada mãɨnepa chivo e k'osada jɨ̃pachidama. Ãchi abaeda ne newẽa beasima. Ẽpẽerãpa ãchi minachia mĩapipachidama mãɨnepa piawẽa oopachidama.

³⁸ Chi nãɨ ĩjũanepemarã pia p'ananaé pasima, mãɨrã ãchi paara p'ananai k'orea. Ãchi te newẽa be pẽra ĩjũa pania newẽa bɨde mãɨnepa eyade p'ɨrrɨa nipapachidama. P'ẽya uriade mãɨnepa yooro uriade p'anapachidama.

³⁹ Jõma mãɨ ẽpẽerãpa Tachi Ak'õrene ĩjãa p'anana pẽra Tachi Ak'õrepa ãchi pia unusima. Maamina chok'ae p'anɨne ichia teai jarada p'ue ãarea jitadaé pasima.

⁴⁰ Tachi Ak'õrepa tachi pae nepia bɨt'a uru bɨ pẽra ichia k'ɨ̃riasima ãchi tachi ome ne ãareaɨne pia p'ananait'a.