Hebreo 10 - Tachi Ak'õre Pedea

¹ Chi Moisepa bɨdapa ãarea nepia Cristo k'orea cheidepema wawarrea unupi bɨma. Mãɨ nepia chi Moisepa bɨdapa teak'ama. Mãɨpuru ãyocha Tachi Ak'õrea ãnimara paateade wãpataɨrã, mãɨrã chi Moisepa bɨdapa p'ue jĩp'a bɨk'ama.

² Moisepa bɨdapa ãchi piarã jĩp'a bɨdapara, waa ãnimara paateade wãnaiwẽ pasima. Ãnimara paatea p'anɨnepa piarã nemietá newẽa p'aneenaipara, waa ãchi nepɨra pará p'anɨ jĩra k'ɨ̃risiadaiwẽ pasima.

³ Maamina ãyocha ãnimara paateautade, mãɨpa k'ɨ̃risiapiparima ãchia nemietá oopataɨt'a,

⁴ p'ak'a chi ɨmɨk'ĩra oapa mãɨnepa chivo oapa mãɨ nemietá oodada p'ue ãyá bɨk'a pẽra.

⁵ Mãɨ k'orea Cristo nãɨ ĩjũanea cheside ichia Tachi Ak'õrea nãɨya jarasima: «Pɨa ãnimara paateadait'a mãɨnepa ne teadait'a mãɨya k'ɨ̃riawẽma. Maamina pɨa mɨá tachi k'ak'ua teasima mãɨ teamẽrá.

⁶ Ãchia nemietá oodada k'orea ãnimara paateautade mãɨnepa ne teautade pɨ arapaaé pasima.

⁷ Mãɨpuru mɨa jarasima: “Tachi Ak'õre, mɨ nãma bɨma pɨa k'ɨ̃ria bɨt'a ooi k'orea. Pɨ Pedeade mɨ k'orea mãɨya bɨ bɨma”».

⁸ Cristopa naa jarasima Tachi Ak'õrepa k'ɨ̃riawẽma ẽpẽerãpa ãchi nemietá oodada k'orea ãnimara ichiá paateadait'a mãɨnepa ne teadait'a. Moisepa bɨdapa mãɨya oopi bɨmina, Tachi Ak'õre mãɨ k'orea arapá bɨwẽane asima.

⁹ Maapae Cristopa Tachi Ak'õrea nãɨya jarasima: «Mɨ nãma bɨma pɨa k'ɨ̃ria bɨt'a ooi k'orea». Mãɨpa k'awapi bɨma chi Tachi Ak'õrepa naenapema pedea audada pada, mãɨ pedea Cristopa itu bɨsit'a ya chi k'aadeapema pedea audai k'orea.

¹⁰ Tachi Ak'õrepa k'ɨ̃ria bɨt'a Jesucristopa ãarea oosima. Ara ichi itu peapisima. Bari k'ak'o aba mãɨya oodapa tachi ewaricha Tachi Ak'õre pae pia bɨsima.

¹¹ P'aarerãpa ewaricha Tachi Ak'õre pae ne oopatama mãɨnepa ãnimara paateapatama. Maamina mãɨpa nemietá ãyá bɨk'ama.

¹² Maamina Jesucristopa ara ichi itu barimama peapisima, ewaricha nemietá ãyá bɨi k'orea. Maapae Tachi Ak'õre juaraari suak'abari beesima.

¹³ Mãma nɨ bɨma aba Tachi Ak'õrepa ichi chi nek'ĩramá ichi juade bɨrudea.

¹⁴ Cristopa barimama ara ichi itu peapisidepa chi Tachi Ak'õre pae awara bɨdaɨrã jĩp'a bɨsima, mãɨya ewaricha p'ananamẽrá.

¹⁵ Tachi Ak'õre Jaore pida abarik'a tachiá k'awapi bɨma. Nãɨya jarasima:

¹⁶ «Tachi Chiparipa nãɨya jara bɨma: K'aadeapema ewaride mɨa nãɨ pedea chiwidi auipɨ israel ĩjũanepemarã ome: Mɨa Moisepa bɨda ãchi k'ɨ̃risiade mãɨnepa ãchi sõne bɨipɨ».

¹⁷ Mãɨ ɨ̃ari nãɨya jarasima: «Ãchia ne piawẽa oodada mɨa jõma k'ɨ̃risia atuaipɨ. Mãɨnepa ãchia nemietá oodada mɨa waa k'ɨ̃risia baiwẽma».

¹⁸ Cristodepa Tachi Ak'õrepa tachi nemietá ãarea k'ɨ̃risia atuada pẽra, waa tachia nemietá oodada k'orea ichiá ne teadaiwẽa p'anɨma.

Choa p'ananai p'anɨma

¹⁹ Mãɨpuru ũpẽarã, chi Tachi Ak'õre pae k'ɨda jẽesa chi atepe piipará bɨde eda wãuta jĩra Jesucristo oadepa Tachi Ak'õre k'ait'a ne wap'eawẽa wãnai p'anɨma.

²⁰ Mãɨ k'ɨda jẽesa p'aru eatɨa jira bɨ k'õaru jĩra Jesú piusidepa o chiwidi jarisima, chi Tachi Ak'õre orrobariutat'a chok'ae p'ananamẽrá.

²¹ Tachia P'aare minachia k'awa bɨt'a pajãne uru p'anɨma. Ichia Tachi Ak'õre ẽpẽrarã ãarea k'aripaparima.

²² Cristopa tachi k'ɨ̃risia nemietá bada jĩp'a bɨsima tachi sõ ichi oapa ne jĩp'oru jĩra. Tachi Ak'õre k'ĩrari pia bɨsima tachi k'ak'ua pania p'ap'ãrá bɨpa sɨɨda jĩra. Mãɨpuru k'ɨ̃risia aba p'anɨnepa mãɨnepa piarã ĩjãa p'anɨnepa Tachi Ak'õre k'ait'a wãnai p'anɨma.

²³ Tachi Ak'õre pedea auda pẽra tachia nɨ p'anɨt'a mãɨnepa mãɨ k'orea ãareaɨrã́ jara p'anɨt'a mi ãpia pida k'ẽet'aadaiwẽa p'anɨma.

²⁴ Jɨrɨdai p'anɨma sãmaasã́ chi k'aripadait'a pia chi k'ɨ̃rianai k'orea mãɨnepa nepia oodai k'orea.

²⁵ Chi Cristode ĩjãapataɨrã paara ará p'ananait'a itu bɨdaiwẽa p'anɨma chi eda waapẽarãpa itu bɨpata jĩra. Mãɨpari chi k'aripadai p'anɨma pia ĩjãanai k'orea. Tachi Chiparipa ɨtɨai ewari tãaraawẽa bɨde chei k'awa p'anɨ pẽra pia mãɨya oodai p'anɨma.

²⁶ Maamina chi piarã pedea k'awak'ari ara tachia nemietá oo p'ananaipɨra, waa newẽma Tachi Ak'õrea ne teadai k'orea mãɨ nemietá k'ɨ̃risia atuamẽrá.

²⁷ Chi mãɨya oo bɨpa abapuru ne wap'eadepa nɨi bɨma Tachi Ak'õrepa ichi ɨtɨait'a. Mãɨ ewaride Tachi Ak'õrepa ãarea chi nek'ĩramá t'ɨpɨ tau urua nɨbɨde jirak'oaipɨ ewaricha mãma paa tuananamẽrá.

²⁸ Naena abaɨpa Moisepa bɨda itu bɨsira, mãɨne ẽpẽra umeepa wa ũpea p'anɨpa piarã mãɨya bɨade a jarasidara, ichi abaeda k'ĩra chupuriadawẽa peapachidama.

²⁹ Mãɨpa ¿sãmaasã́ k'ɨ̃risia p'anɨma? ¿Tachi Ak'õrepa chi ichi Warra itu bɨpataɨ atepe ɨtɨaiwẽk'ãra? Tachi Ak'õrepa ichi Warra oadepa pedea chiwidi ausima tachi ichi pae pia bɨi k'orea. Mãɨyara chi Tachi Ak'õre Warra oa ãrina piawẽa bɨade apataɨrã ¿ichia atepe ɨtɨaiwẽk'ãra? Mãɨ awara Tachi Ak'õre Jaorepa ichi sõpiadepa tachi k'aripa bɨma. Mãɨyara chi Tachi Ak'õre Jaore k'orea mietá bɨade apataɨrã ¿ichia atepe ɨtɨaiwẽk'ãra?

³⁰ Tachia k'awa p'anɨma Tachi Ak'õrepa nãɨya jarasit'a: «Mɨapuru mãɨrã ɨtɨaipɨ. Ãareaɨrã́ teaipɨ ara ãchia nemietá oodada jĩra». Mãɨnepa nãɨya jarasima: «Tachi Chiparipa ichi ẽpẽerã ɨtɨak'oaipɨ».

³¹ Minachia mietá bɨma, chi Tachi Ak'õre chok'ae bɨ juade bait'a tachi nemietá k'orea.

³² K'ɨ̃risiat'ɨ mãrapa naa chi piarã pedea k'awasidaɨde sãmaasã́ p'anasit'a. Mãɨ ewaride mãra minachia mĩanana ãarea choasidama.

³³ Edaɨde ẽpẽerãpa Cristo k'orea k'achia pedeasidama mãɨnepa mãra mĩapisidama. Ichiaba edaɨde mãra tachi ũpẽarã Cristo k'orea mĩa p'anɨrã paara minachia mĩasidama.

³⁴ Chi Cristo k'orea eda serrasidaɨde mãrapa k'ĩra chupuriasidama. Mãɨnepa mãrapa ne uru beada arapá chi ĩjãanak'apɨɨrã́ itu ẽemaripisidama, k'awa p'anɨ pẽra mãɨ k'aepẽra nepia jõk'apɨ́ pajãne uru p'anɨt'a.

³⁵ Mãɨpuru mãrapa Tachi Ak'õrene ĩjãa p'anɨt'a itu bɨrãt'ɨ. Ĩjãa p'ananaipɨra, Tachi Ak'õrepa pajãne nepia minachia teaipɨ.

³⁶ Mãrapa ãarea choadai p'anɨma. Mãɨya chi Tachi Ak'õrepa k'ɨ̃ria bɨt'a oodak'ari ichia teai jarada ãarea jitadaipɨ.

³⁷ Tachi Ak'õre pedeade nãɨya bɨ bɨma: «Chi chei bɨ tãaraawẽa bɨde cheipɨ. Piarã tãaraaiwẽma.

³⁸ Chi mõré jĩp'a bɨ mɨne ĩjãa bɨdepa chok'ae baipɨ. Maamina chi ichia ĩjãa bɨt'a itu bɨsira, mɨa ichi pia unuiwẽma».

³⁹ Chi eda waapẽarãpa Tachi Ak'õrene ĩjãa p'anɨ itu bɨdak'ari ãchi atuadaipɨ. Maamina tachi mãɨ ẽpẽerã jĩra p'anɨwẽma, mãɨpari Tachi Ak'õrene ĩjãa p'anɨnepa ewaricha chok'ae p'ananaipɨ.