Hebreo 1 - Tachi Ak'õre Pedea

Tachi Ak'õre Warra chi atepe bɨma

¹ Naenaena Tachi Ak'õrepa tachi chõarãenapemarã́ bari k'ak'o minachia wawariadepa pedeapachima. Chi ichi pari pedeapataɨrãnepa mãɨya oosima.

² Maamina nãɨ k'aadeapema ewaride ichi Warradepa tachiá pedeasima. Ichi Warradepa Tachi Ak'õrepa ne ãarea oosima mãɨnepa ichi bɨsima ne ãarea uru bamẽrá.

³ Ichi Warrapa Tachi Ak'õre k'ĩrawãrea achiterrea unupiparima. Ichiapuru Tachi Ak'õre sãmaasã́ bɨt'a k'awapiparima. Ichi pedea jua chaarea bɨdepa ne ãarea ooda ichi juade ara mãɨya uru bɨma. Ichia tachi nemietá oodada sɨɨk'ari Tachi Ak'õre chi auk'ará bɨ juaraari pajãne suak'abari beesima.

⁴ Mãɨya Tachi Ak'õrepa ichi chi ɨt'aripa peedaɨrã k'aepẽra atepe bɨsima. Tachi Ak'õrepa ichi t'ɨ̃ bɨda mãɨ ãchi t'ɨ̃ bɨda k'aepẽra atepe piipará bɨsima.

⁵ Chi ichia ɨt'aripa peeda abaɨa nãɨya jaraé pasima: «Pɨ mɨ Warrapɨ. Idi pɨ mɨ Warraade aruma». Mãɨnepa ãchi k'orea nãɨya jaraé pasima: «Mɨ ichi ak'õre paipɨ, mãɨnepa ichi mɨ warra paipɨ».

⁶ Mãɨ awara Tachi Ak'õrepa ichi Warra aba bɨt'a nãɨ ĩjũanea peeside nãɨya jarasima: «Ãarea Tachi Pajãnepema Ak'õrepa ɨt'aripa peedaɨrãpa ichiá pia pedeadai p'anɨma».

⁷ Tachi Ak'õrepa ɨt'aripa peedaɨrã k'orea ichi pedeade nãɨya bɨ bɨma: «Tachi Ak'õrepa ichi ɨt'aripa peedaɨrã oosima nãu jĩra p'ananamẽrá. Ãchi oosima t'ɨpɨ urua jĩra p'ananamẽrá».

⁸ Maamina ichi Warra k'oreapuru Tachi Ak'õrepa nãɨya jarasima: «Tachi Ak'õre, pɨ ewaricha ne ãareaɨrã chiparipɨ. Pɨ p'uuru jĩp'a bapiparima.

⁹ Pɨa k'ɨ̃riaparima ẽpẽerã jĩp'a p'ananait'a. Nemietá unuemaaparima. Mãɨpuru Tachi Ak'õre, pɨ Ak'õrepa ãarea pɨ ome p'anɨ k'aepẽra pɨt'a chi atepe bɨsima. Mãɨya pɨ minachia arapaapisima».

¹⁰ Mãɨnepa nãɨya jarasima: «Tachi Chipari, naenaena pɨa nãɨ ĩjũa oosima mãɨnepa pɨchi juadepa pajã oosima.

¹¹ Jõma mãɨ jõipɨ maamina pɨ ara mãɨya baipɨ. Jõma mãɨ chota paipɨ p'aru sore papari jĩra.

¹² P'aru sore ẽrak'ari chiwidi jɨ̃pari jĩra pɨa jõma mãɨ ãyá bɨk'ari chiwidi ooipɨ. Maamina pɨ ara pɨchit'u bɨma. Pɨ piuk'ama».

¹³ Tachi Ak'õrepa mi ãpia pida Ichia ɨt'aripa peedá jaraé pasima: «Mɨ juaraari suak'abari beese aba mɨa pɨchi nek'ĩramá pɨchi juade bɨrudea».

¹⁴ Mãɨyara ¿Tachi Ak'õrepa ɨt'aripa peedaɨrã k'airãma? Mãɨrã ãarea Tachi Ak'õre pae p'anɨẽra, ãchi peeparima chi ichia k'aripai bɨɨrã mãɨrã ak'ɨ p'ananamẽrá.