Gálata 6 - Tachi Ak'õre Pedea

Ara machit'u k'aripa p'anat'ɨ

¹ Ũpẽarã, mãranepema k'awawẽa nemietaade baesira, mãra chi Tachi Ak'õre Jaoredepa p'ɨrrɨa p'anɨpa, waapẽarã k'aepẽra piipará be jĩra k'ɨ̃risiadak'aɨdepa, mãɨ k'aripadai p'anɨma mãicha jĩp'a nipamẽrá. Maamina jĩrak'aua p'anat'ɨ mãra sida abarik'a nemietaade baedaemaapa.

² Nepɨrade p'anɨne chi k'aripat'ɨ. Mãɨya Cristopa oopi bɨt'a mãrapa jõma oodaipɨ.

³ Chi atepewẽa bɨpa ichi chi minachia k'awa bɨ jĩra k'ɨ̃risia bɨpɨra, ara ichi tuaba sea bɨma.

⁴ Abaɨpa oo bɨ ak'ɨdai k'aepẽra ara tachia oo p'anɨt'a ak'ɨi p'anɨma, jĩp'a oo p'anɨt'a k'awadai k'orea. Mãɨya ara tachia oo p'anɨ k'orea arapá baipɨ.

⁵ Tachicha oodai p'anɨt'a jõma jĩp'a oodai p'anɨma.

⁶ Chi pedea ũri bɨpa ichi nepia uru bɨdepema teai bɨma, chi Tachi Ak'õre pedea jarateaparia.

⁷ Ara mãra tuaba searãt'ɨ. Abaɨ pida Tachi Ak'õre p'ue seaiwẽma. K'ɨ̃risiat'ɨ: chi ne uurupa ichia uuda jĩra ara mãɨya baaipɨ.

⁸ Mãɨ k'orea nãɨ k'ak'uapa nemietá oo k'ɨ̃ria bɨ abaɨpa oo bɨpɨra, Tachi Ak'õrepa mãɨ ẽpẽra ɨtɨaipɨ. Maamina Tachi Ak'õre Jaorepa k'ɨ̃ria bɨ abaɨpa oo bɨpɨra, Tachi Ak'õrepa mãɨ ẽpẽra ewaricha ichi ome chok'ae bɨipɨ.

⁹ Mãɨpuru sẽnawẽa nepia oo p'anat'ɨ. Sẽnawẽa p'anɨpɨra, Tachi Ak'õrepa bɨda ewaride tachia nepia atadaipɨ.

¹⁰ Mãɨ k'orea tachia p'ue ooutacha, jõmãɨrã minachia k'aripadai p'anɨma. Chi Jesude ĩjãapataɨrãt'a mãɨya atepe k'aripadai p'anɨma.

Pablopa nãɨ k'art'ade k'aadea bɨda

¹¹ Ak'ɨt'ɨ, ara mɨchi juapa letra tau nepalá nãɨ k'art'ade bɨruma.

¹² Chi mãra k'ak'ua tauchaapi k'ɨ̃ria berãpa mãɨya oopatama, judiorãpa pia ununamẽrá mãɨnepa ãchia Cristo k'urusude piuda k'orea jaratea p'anɨ k'orea mĩapidaemaapa.

¹³ Chi k'ak'ua tauchaadaadarãpa Moisepa bɨda jõma oodak'ama. Maamina ãchia mãra k'ak'ua tauchaapi k'ɨ̃ria p'anɨma, ara ãchi k'ak'ua k'orea pia pedeadai k'orea.

¹⁴ Maamina mɨt'u mãɨya bɨwẽma. Mɨ k'orea mi ãpia pida pia pedeawẽma. Mãɨpari abapuru Tachi Chipari Jesucristo k'urusude piuda k'orea pia pedeaipɨ. Cristo k'urusude piuda pẽra chi nãɨ ĩjũanepemarãpa pia unupataɨ, mɨmá ãarea piusima. Mãɨnepa nãɨ ĩjũane berãmá mɨ piusit'a.

¹⁵ Tachi Ak'õremá k'ak'ua tauchaa bai wa k'ak'ua tauchaawẽa bait'a pia bɨwẽma. Ichimá, ẽpẽra chiwidi oodat'u mãɨ pia bɨma.

¹⁶ Mɨa k'ɨ̃ria bɨma jõma mɨa jara bɨ jĩra ĩjãa be Tachi Ak'õrepa k'ĩra chupuria bai mãɨnepa ne k'ɨ̃risiawẽa bapiit'a. Mãɨ ẽpẽrarã Tachi Ak'õrenepemarãpɨ.

¹⁷ Chi Jesudepema pedea jaratea bɨ k'orea ẽpẽrarãpa mɨ piawẽa oosidama. Mɨ k'ak'ua k'õk'oadada pada ya anik'ari uru bɨma mãɨya unupii k'orea mɨ ichidit'a. Mãɨpuru idiipa waa mɨa k'ɨ̃riawẽma abaɨ pida mɨ waa ooit'a.

¹⁸ Ũpẽarã, mɨa k'ɨ̃ria bɨma Tachi Chipari Jesucristopa ichi sõpiadepa ãarea mãra k'aripa bait'a. Mãɨya beese.