Gálata 4 - Tachi Ak'õre Pedea

Tachi Ak'õre warrarãpɨ

¹ Mɨa jara bɨt'a nãɨ jĩra bɨma: warrapa ichi ak'õrené neet'á ãarea jitai bɨmina, ichi k'aepe bɨmisa, ichi ak'õre pae pari mimiaparí jĩra bɨma.

² Chi k'aepe bɨ warra ichi ak'ɨpataɨrã juade bɨma, mãɨnepa ichi ak'õrené neet'á atai bɨt'a, chi waapẽarãpa ak'ɨpatama aba chi ak'õrepa jarada ewaridea.

³ Ara mãɨ jĩra Cristode ĩjãanai naena tachi warra chak'e jĩra p'anasima. Mãɨ ewaride tachia chi nãɨ ĩjũanepema jaore chaarearãne ĩjãa p'anasidama, chi chipari pae pari mimiaparí jĩra.

⁴ Maamina Tachi Ak'õrepa jarada ewari paside ichi Warra nãɨ ĩjũanea peesima. Mãɨ Warra wẽrapa t'õsima, ichiaba Moisepa bɨda ooi basima.

⁵ Tachi Ak'õrepa ichi peesima tachi mãɨ Moisepa bɨda juade beada k'aripak'ari ichi warrarã bɨi k'orea.

⁶ Mãra Tachi Ak'õre warrarã pẽra ichi Warra Jaore peesima mãra sõne bamẽrá. Ichi Jaore tachi sõne bɨpa «¡Mɨ Ak'õre!» aparima, tachi Ichi warrarã k'awadamẽrá.

⁷ Mãɨpuru waa mãra chipari pae pari mimiapataɨrãwẽma, mãɨpari Tachi Ak'õre warrarãpɨ. Tachi Ak'õre warrarã pẽra ichi warrarã pae uru bɨt'a atadaipɨ.

Pablo ũpẽarã k'orea sõ pará bada

⁸ Naena mãrapa Tachi Ak'õre atua p'anasidaɨde chi piarãwẽ ak'õrene ĩjãa p'anasidama, ãchi pae pari mimiapataɨrã jĩra.

⁹ Maamina idiapae mãrapa Tachi Ak'õre k'awa p'anɨma. Jĩp'a jaraideepara, Tachi Ak'õrepa mãra k'awa bɨma. Mãɨya ¿k'ãre k'orea chi nãɨ ĩjũanepema jaore chaarearãne mãicha ĩjãa k'ɨ̃ria p'anɨma, chi chipari pae pari mimiapataɨrã jĩra? Mãɨpa k'aripak'ama.

¹⁰ Mãrapa wawaria ewari, jedek'o mãɨnepa ãyo ak'ɨpatama Tachi Ak'õrepa pia unumẽrá.

¹¹ Mãɨpuru mɨa k'ɨ̃risia bɨma mɨ pari mãrá jarateasit'a.

¹² Ũpẽarã, mɨ mãra jĩra bai k'orea, Moisepa bɨda itu bɨsima. Mãɨpuru mɨa mãrá chichupuria idiruma mɨ jĩra mãɨ Moisepa bɨdade p'anapidaemaapa. Naena mãrapa mɨ k'achia oodaé pasima, mãɨpari mɨ ome pia p'anasima.

¹³ K'awa p'anɨma mɨa mãramá pedea pia Cristo k'orea naa jarade wãside, mɨ k'ɨdade bada pẽra mãramá jaratea beesit'a.

¹⁴ K'ɨdade beedamina mãrapa mɨ itu bɨdaé pasima mãɨnepa jeret'aadaé pasima. Mãɨpari mãrapa mɨá pia pedeasidama Tachi Ak'õrepa ɨt'aripa peedá mãrapa pia pedeauta jĩra mãɨnepa Jesucristoa pia pedeauta jĩra.

¹⁵ ¿K'ãasãasima mãra naena arapá p'ananat'a? Mɨa piarã jararuma mãrapa p'ue oodaipara, ara machi tau noet'ai pasima mɨá teadai k'orea.

¹⁶ Mɨa piarãpẽa pedeadepa ɨtɨa bɨ pẽra ¿mɨ mãra ome chi nek'ĩramá paik'ãra?

¹⁷ Mãra t'ãena chi piawẽa jarateapataɨrãpa nejõma oo p'anɨma mãrapa ãchi pedea ĩjãanamẽrá. Maamina ãchia mãɨya oodak'ama mãra k'aripadai k'orea. Mãra taidepa ãyá atee k'ɨ̃ria p'anɨma sõnepa ãchi ome p'ananamẽrá.

¹⁸ Piarã pia bɨma ewaricha k'ɨ̃risia pia sõnepa ĩjãa p'ananait'a. Maamina mãɨya p'ananaiwẽa p'anɨma mɨ aba mãra ome bɨdeepuru. Mãɨpari mɨ newẽne pida mãɨya ĩjãanai p'anɨma.

¹⁹ Ũpẽarã, mãra mɨ warrarã jĩra p'anɨpɨ. Mɨ mãicha mãra k'orea minachia mĩa bɨma wẽra warra t'õrune p'ua bɨ jĩra. Mɨ mãɨya minachia mĩa baipɨ aba mãra Cristo jĩra p'aneeutadea.

²⁰ ¡Mɨ ara nãɨena mãra ome badapara k'awai pasima sãmaasã́ mãra ome pedeai bɨt'a! Mɨa piarã atua bɨma mãra k'orea sãmaasã́ k'ɨ̃risiait'a.

Sara mãɨnepa Agar k'orea Pablopa k'awapida

²¹ Chi Moisepa bɨda juade p'ananai k'ɨ̃ria p'anɨrãpa mɨá p'anoot'ɨ: ¿Moisepa bɨdade bɨ bɨ atua p'anɨk'ãra?

²² Nãɨya bɨ bɨma: Abrahanpa warra ume uru basima. Chi Sara pae pari mimiaparí wẽra Agarpa warra aba t'õsima. Chi abaɨ warra chi chipari pae pari mimiak'apɨ́ Sarapa t'õsima.

²³ Chi Sara pae pari mimiaparí wẽrapa warra t'õsima, Abrahanpa mãɨya k'ɨ̃riana pẽra. Maamina chi k'imarãpa t'õna chi Tachi Ak'õrepa teai jarada pasima.

²⁴ Chi mãɨ bɨda ne jara bɨdapa nãɨya ũripii bɨma: Tachi Ak'õrepa pedea auda ume p'anɨma. Mãɨ pedea auda ume p'anɨt'a Sara mãɨnepa Agar jĩra p'anɨma. Tachi Ak'õrepa pedea auda aba Sinaí eyade teasima. Mãɨ pedea auda, chi chipari pae pari mimiaparí wẽra Agar jĩra bɨma, chi mãɨ pedea auda ĩjãa berã chipari pae pari mimiapataɨrã jĩra p'anɨ pẽra.

²⁵ Chi Sinaí eya Arabia tuade bɨ Agar jĩra bɨma, chi mãɨ eyade teada Moisepa bɨdade ĩjãa berã, chipari pae pari mimiapataɨrã jĩra p'anɨ pẽra. Mãɨnepa chi nãɨ ĩjũanepema Jerusalén p'uuru, Agar jĩra bɨma mãɨ p'uurudepemarã chipari pae pari mimiapataɨrã jĩra p'anɨ pẽra.

²⁶ Maamina chi pajãnepema Jerusalén p'uuru Sara jĩra bɨma mãɨ p'uurudepemarã chipari pae pari mimiapataɨrã jĩra p'anɨwẽ pẽra. Mãɨya p'anɨma Moisepa bɨdade ĩjãa p'anɨwẽ pẽra. Tachi mãmapema pẽra Sara warrarã jĩra p'anɨma.

²⁷ Tachi Ak'õre pedeade nãɨya bɨ bɨma: «Pɨ, Wẽra warra t'õk'apɨ́, arapaase. Chi warra t'õrune p'ua unuk'apɨ́, minachia arapaase. Wẽra ɨmɨk'ĩrapa itu bɨdapa warrarã atepe unu baipɨ, wẽra ɨmɨk'ĩra ome bada k'aepẽra».

²⁸ Isá t'õsima Tachi Ak'õrepa Abrahaná mãɨya jarada pẽra. Ũpẽarã, Isá jĩra, tachi Tachi Ak'õre warrarã p'aneesidama ichia mãɨya jarada pẽra.

²⁹ Abrahán ewaride Ismael, chi paritua warra jĩra t'õnapa piawẽa oopachima Isaat'a, chi Tachi Ak'õre Jaore jua chaareadepa t'õnat'a. Ara mãɨ jĩra idiapae pida Moisepa bɨdade berãpa Cristode ĩjãa be piawẽa oopatama.

³⁰ Maamina Tachi Ak'õre pedeade nãɨya bɨ bɨma: «Chi chipari pae pari mimiaparí wẽra mãɨnepa ichi warra ãyá jeret'aase. Chi chipari pae pari mimiaparí wẽra warrapa ichi ak'õrepa uru bɨ p'ue ataiwẽma. Mãɨpari chi chipari pae pari mimiapariwẽ wẽra warrapa mãɨ ataipɨ».

³¹ Mãɨpuru ũpẽarã, tachi chi chipari pae pari mimiaparí wẽra warrarã jĩra p'anɨwẽma. Mãɨpari chi chipari pae pari mimiapariwẽ warrarã jĩra p'anɨma.