Gálata 2 - Tachi Ak'õre Pedea

Jesucristopa peedaɨrãpa Pabloa pia pedeadada

¹ Catorce ãyo pak'ari mɨ Bernabé ome mãicha Jerusalenea wãsima. Tito sida wãsima.

² Mɨ wãsima Tachi Ak'õrepa k'awapida pẽra mãmá wãi bɨt'a. Mãma bɨde mɨa abapuru ũpẽarã chi atepe k'awapataɨrã́ jarasima chi pedea pia Cristo k'orea mɨa judiorãwẽmá sãmaasã́ jaratea bɨt'a. Mãɨya oosima mɨa oo bɨt'a ãchia pia unu p'anɨ k'awai k'orea.

³ Mãɨne Tito mɨ ome bɨ judiowẽmina, ãchia jaradaé pasima ichi k'ak'ua tauchaai basit'a.

⁴ Mãɨnepema pedeasidama chi eda waapẽarã ũpẽarã piarãwẽpa jarapachida pẽra. Mãɨrã ũpẽarã jĩra p'ananapa ak'ɨ p'anapachidama tachi chi Moisepa bɨdadepema ãyá wãsida k'awa. Jesucristode ĩjãanai k'aepẽra, chi Moisepa bɨdat'a mãicha oopi k'ɨ̃ria p'anasidama, chi mãɨ bɨda pae pari mimiapataɨrã jĩra p'anasi pẽra.

⁵ Maamina ãchia jaradada taipa mi ãpia pida ĩjãanaé pasima, mãrapa pedea pia Cristo k'orea chi piarãt'a ewaricha uru p'ananamẽrá.

^6-7 Chi atepe k'awa p'anɨane apataɨ ũpẽarãpa k'ɨ̃risia awara jaradaé pasima mɨa jarateamẽrá. Mãɨpari k'awasidama Tachi Ak'õrepa mɨ peesit'a, chi pedea pia Cristo k'orea judiorãwẽmá jarateamẽrá Pedro judiorãmá peeda jĩra. (Ãchi chi atepe k'awa p'anɨane apatamina mɨa mãɨ minachia k'ɨ̃risiak'ama, Tachi Ak'õrepa tachi k'ĩra awara unuk'a pẽra).

⁸ Piarã Tachi Ak'õrepa Pedro ichia peeda bɨsima, judiorãmá jarateamẽrá. Ara mãɨ Tachi Ak'õrepa mɨ ichi peeda bɨsima judiorãwẽmá jarateamẽrá.

⁹ Ũpẽarã chi atepe k'awa p'anɨrã Santiagopa, Pedropa mãɨnepa Juanpa k'awasidama Tachi Ak'õrepa ichi sõpiadepa piarã mɨ judiorãwẽmá peesit'a. Mãɨne ãchi mɨ ome mãɨnepa Bernabé ome arapá jua jitasidama k'awapidai k'orea abarik'a k'ɨ̃risia uru p'anɨt'a. Ãchia jarasidama taipa judiorãwẽmá jaratea p'ananait'a, mãɨnepa ãchia judiorãmá jaratea p'ananait'a.

¹⁰ Abapuru taiyá jarasidama ũpẽarã nenea k'ede k'aripadamẽrá. Mãɨ mɨmá minachia pia basima mãɨya oo k'ɨ̃ria bada pẽra.

Pablopa Pedro ɨtɨada

¹¹ Ewariaba Pedro Antioquía p'uurudea ũpẽarã ak'ɨde wãsima. Mãma jõmãɨrã ũpẽarã k'ĩrari mɨa ichi ɨtɨasima, ichia piarã piawẽa ooda pẽra.

¹² Nãɨya piawẽa oosima: chi eda waapẽarã ũpẽarã judiorã Santiago bɨmãɨpa Antioquía p'uurudea wãsidama. Ãchi chedai naena Pedro ũpẽarã judiorãwẽ ome nek'opachima, maamina mãɨ ũpẽarã judiorã chedak'ari ichi waa ũpẽarã judiorãwẽ ome nek'oé pasima. Mãɨpari awara beesima. Wap'easima chi jarapachidapa chi judiorãwẽ k'ak'ua tauchaadai p'anɨane a p'anana k'orea.

¹³ Mãɨne waapẽarã ũpẽarã judiorã pida chi judiorãwẽ itu bɨsidama Pedropa piarãwẽenepa oo bɨ jĩra. Mãɨya oo p'anɨ pẽra Bernabé pida ara mãɨya piawẽa oosima.

¹⁴ Maamina mɨa unusima ãchi piarã chi pedea pia Cristo k'orea jara bɨ jĩra nipadawẽa p'anasit'a. Mãɨpuru mɨa Pedro jõmãɨrã ũpẽarã k'ĩrari nãɨya ɨtɨasima: «Pɨ judiomina, judio jĩra bak'ama. Mãɨpari judiowẽ jĩra baparima. Mãɨ ¿k'ãre k'orea judiorãpa oopataɨ, pɨa ũpẽarã judiorãwẽa oopi bɨma?»

¹⁵ Judiorãwẽpa Moisepa bɨda nea p'anɨ pẽra tachi judiorãpa ãchi nemietá oopataɨrãne apatama. Tachi t'õnaananepa judiorã pẽra mãɨ Moisepa bɨda uru p'anɨma.

¹⁶ Maamina tachia k'awa p'anɨma Tachi Ak'õrepa ẽpẽra aba pida bɨwẽma chi jĩp'a be paara, mãɨ Moisepa bɨda oo bɨ pẽra. Mãɨpari Jesucristopa mãɨ bɨda jĩra jõma ooda k'orea, Tachi Ak'õrepa tachi bɨparima chi jĩp'a be paara. Mãɨpuru tachia pida Jesucristode ĩjãasidama, mãɨnepa Jesucristode ĩjãa bɨ k'orea mãɨya chi jĩp'a be paara p'anapatama, Ichia mãɨ bɨda jĩra jõma ooda k'orea. Piarã Moisepa bɨda oo p'anɨnepa Tachi Ak'õrepa tachi bɨk'ama chi jĩp'a be paara.

¹⁷ Tachia jɨrɨsidama Cristodepa Tachi Ak'õrepa tachi chi jĩp'a be paara bɨmẽrá. Mãɨpuru waapẽarãmá, tachi nemietá oopataɨrãpɨ, chi Moisepa bɨda amaanana pẽra. Mãɨyara ¿Cristopa tachiá nemietá oopi bɨk'ãra? ¡Mãɨyawẽma!

¹⁸ Mɨa Moisepa bɨda itu bɨk'ari, ya mãicha ĩjãa baipɨra, mɨt'u nepɨrade beeipɨ mãɨ bɨda itu bɨsi pẽra.

¹⁹ Naena mɨ Moisepa bɨdadepa basima. Maamina mãɨ Moisepa bɨdadepema mɨ piusima. Mãɨya mɨ Tachi Ak'õre pae chok'ae beesima.

²⁰ Mɨ Cristo ome ará k'urusude barijira bɨsidama. Mãɨpuru ara mɨnepa bɨwẽma, mãɨpari Cristot'a mɨ sõne bɨma. Nãɨ k'ak'uade chok'ae bɨmisa, mɨ Tachi Ak'õre Warra Jesudepa baipɨ. Ara mãɨ Jesupa ichi Ak'õrepa oopi bɨt'a oopachi pẽra, mɨ k'ɨ̃riasima mãɨnepa mɨ k'orea ara ichi itu peapisima.

²¹ Tachi Ak'õrepa ichi sõpiadepa oodat'a mɨa itu bɨwẽma. Moisepa bɨda oo p'anɨnepa chi jĩp'a be paara p'ananaipara, Cristo pari piui pasima.