Gálata 1 - Tachi Ak'õre Pedea

Nãɨ k'art'ade Pablopa naa bɨda

¹ Mɨ Pablopɨ, Jesucristopa peedapɨ. Ẽpẽrarãpa mɨ jɨrɨ atadaé pasima Jesucristopa peeda bamẽrá. Mãɨpari Jesucristopa mãɨnepa ichi Ak'õrepa, ichi piu bada chok'ae p'irabaripidapa mɨ mãɨya bɨsidama.

² Mɨa nãɨ k'art'a bɨruma ũpẽarã Galacia tuadepemarã pae. Jõma ũpẽarã mɨ ome p'anɨrãpa k'ɨ̃ria p'anɨma,

³ Tachi Pajãnepema Ak'õrepa mãɨnepa Tachi Chipari Jesucristo ãchi sõpiadepa mãra k'aripa p'ananait'a ne k'ɨ̃risiawẽa p'ananamẽrá.

⁴ Chi mãɨ Jesucristopa ara ichi tachi nemietá k'orea itu peapisima nãɨ ewari mietaadepema k'aripai k'orea. Mãɨya oosima Tachi Pajãnepema Ak'õrepa k'ɨ̃riana pẽra.

⁵ Ewaricha ichiá pia pedeadai p'anɨma. Mãɨya beese.

Pedea pia Cristo k'orea abapuru bɨma

⁶ Mɨa k'awa k'ɨ̃risiawẽma sãmaasã́ mãrapa ɨ̃apachia Tachi Ak'õre jãɨya itu bɨsidat'a. Ichia mãra t'ɨ̃sima Cristo sõpiadepa k'aripai k'orea, maamina mãrapa chi eda waapẽarãpa pedea pia jĩra jara p'anɨt'a minachia ũri p'anɨma.

⁷ Piarã chi pedea pia waa awara newẽma. Maamina chi eda waapẽarãpa mãrá piawẽa k'ɨ̃risiapipatama pedea pia Cristo k'orea piawẽa jaratea p'anɨ pẽra.

⁸ Parituapa pedea pia Cristo k'orea taipa mãrá jarateadada awara jarateaipɨra, Tachi Ak'õrepa ichi ewaricha ɨtɨaipɨ; taipa wa Tachi Ak'õrepa ɨt'aripa peeda pida awara jarateadaipɨra, tai sida Tachi Ak'õrepa ewaricha ɨtɨaipɨ.

⁹ Taipa naa jaradada mɨa mãicha jararuma: mãrapa pedea pia Cristo k'orea ĩjãanana abaɨpa mãɨ awara jarateaipɨra, Tachi Ak'õrepa ichi jõpiipɨ.

¹⁰ Mãɨya jara bɨdepa mɨa jɨrɨwẽa bɨma ẽpẽrarãpa mɨ pia ununait'a, mãɨpari k'ɨ̃ria bɨma Tachi Ak'õrepuru mɨ pia unuit'a. Cristode ĩjãai naena mɨa jɨrɨ bapachima ẽpẽrarãpa mɨ pia ununait'a. Wapida mãɨya oo bɨpara, mɨ Cristo pae pari mimiaparí paiwẽ pasima.

Jesucristopa Pablo t'ɨ̃na

¹¹ Ũpẽarã, k'awat'ɨ pedea pia Cristo k'orea mɨa mãrá jarateada ẽpẽra k'ɨ̃risiadepemawẽma.

¹² Mãɨ pedea mɨa mi ãpia pida ẽpẽranepa k'awaé pasima. Mi ãpia pida ẽpẽrapa mɨá jarateaé pasima. Mãɨpari Jesucristopa mɨá k'awapisima.

¹³ Mãrapa ũrisidama mɨ sãmaasã́ nipasit'a judiorãpa jarateapataɨ jõma oo baside. K'awa p'anɨma mɨa Tachi Ak'õreneerã ẽpẽrarã minachia piawẽa oopachit'a. Jõma jõpi k'ɨ̃ria basima.

¹⁴ Judiorãpa jarateapataɨ mɨa atepe k'awaru pasima mɨ aɨk'aɨrã k'aepẽra, tai chõarãenapemarãpa oopataɨ minachia oopachideepuru.

¹⁵ Maamina mɨ t'õi naena Tachi Ak'õrepa mɨ jɨrɨ atasima, mãɨnepa ichi piadepa mɨ t'ɨ̃sima ichi pae pari mimiaparí bamẽrá. Ichia k'ɨ̃risiada jĩra,

¹⁶ ichi Warra mɨá k'awapisima judiorãwẽa ichi k'orea jaramẽrá. Mãɨne mɨa abaɨmá pida idié pasima sãmaasã́ ooi bɨ k'awai k'orea.

¹⁷ Mãɨnepa chi mɨ naa Jesucristopa peedaɨrã́ Jerusalenea idide wãé pasima. Mãɨpari mɨ Arabia tuadea wãsima. Mãɨya nak'ari Damasco p'uurudea jĩitea wãsima.

¹⁸ Ãyo ũpea pak'ari mɨ Jerusalenea wãsima Pedro k'awai k'orea. Mãma ewari k'ak'o quince ichi ome basima.

¹⁹ Pedro awara Jesucristopa peedaɨrãnepema abapuru Tachi Chipari ũpẽa Santiago unusima. Waapẽarã mɨa unué pasima.

²⁰ Tachi Ak'õre k'ĩrari mɨa mãrá jararuma: mɨa mɨ k'orea bɨrut'a seawẽma.

²¹ Jerusalenea wãk'ari mɨ Siria tuadea mãɨnepa Cilicia tuadea wãsima.

²² Cristode ĩjãa be Judea tuadepemarãpa mɨ ununak'a pasima.

²³ Ãchia abapuru ũripachidama ũpẽarãpa nãɨya jara p'anɨt'a: «Chi tachi piawẽa ooi k'orea ẽp'ẽ badapa, idiapae jaratea nima, jõmãɨrãpa Cristode ĩjãanamẽrá. Naena mãɨ ichia jõpi k'ɨ̃ria basima».

²⁴ Mãɨpuru mɨ k'orea ãchia Tachi Ak'õrea pia pedeasidama.