Ep'esio 5 - Tachi Ak'õre Pedea

Tachi Ak'õre warrarã sãmaasã́ p'ananai p'anɨ

¹ Tachi Ak'õrepa ichi warrarã minachia k'ɨ̃ria bɨma. Mãɨpuru mãra ichi jĩra p'anat'ɨ.

² Jõmãɨrã k'ɨ̃riat'ɨ Cristopa tachi k'ɨ̃ria bɨ unupida jĩra. K'ɨ̃rianepa tachi k'orea ara ichi itu peapisima Tachi Ak'õrea ãnimara paatearu jĩra. Tachi Ak'õrepa mãɨ pia unusima.

³ Mãra ẽpẽrarã Tachi Ak'õrenepemarã pẽra wẽra awaraɨ ome k'ãinaiwẽa p'anɨma, k'ĩra p'erapiparide nipadaiwẽa p'anɨma, mãɨnepa ne waapẽarãné k'ɨ̃rianaiwẽa p'anɨma. Mãɨ k'orea mi ãpia pida pedeadaiwẽa p'anɨma.

⁴ Pedea mietá, nepɨra piawẽa, mãɨnepa pedea mietaadepa nepɨrɨrãtɨ, mãɨya pedeait'a pia bɨwẽ pẽra. Mãɨpari Tachi Ak'õrea sõpia bɨade at'ɨ.

⁵ Mãrapa k'awa p'anɨma k'ima awaraɨ ome k'ãipataɨ, k'ĩra p'erapiparide nipapataɨ mãɨnepa nejõma k'ɨ̃riapataɨ chi Cristo mãɨnepa Tachi Ak'õrepa teadayade adada p'ue jitadaiwẽma. Nejõma k'ɨ̃ria bait'a, juapa oodada sãdode ĩjãa bɨ jĩra bɨma, Tachi Ak'õre k'aepẽra, chi ichia k'ɨ̃ria bɨt'a atepe ĩjãa bɨ pẽra.

⁶ Abaɨ pida seadepa nemietá oodai p'anɨane aipɨra, itu seapirãt'ɨ. Nemietá oo p'anɨ k'orea Tachi Ak'õrepa chi ichi pedea ĩjãawẽa be ɨtɨaipɨ.

⁷ Mãɨpuru nemietá oopataɨrã ome abarik'a oorãt'ɨ.

⁸ Naena mãra p'ãrionepema pasima, maamina idiapae Tachi Chipari ome p'anɨ pẽra mãra ɨnaanepemarãpɨ. Mãɨpuru ɨnaanepema warrarã jĩra nipat'ɨ.

⁹ Ɨnaane nipadaipɨra sõpia p'ananaipɨ, jĩp'a oodaipɨ mãɨnepa piarãnepa nipadaipɨ.

¹⁰ Tachi Chiparipa pia unu bɨt'a k'awadai k'orea jɨrɨt'ɨ.

¹¹ P'ãrionenemarãpa nemietá oopatadepa nepia be chek'ama. Mãɨpuru abarik'a oorãt'ɨ, mãɨpari k'awapit'ɨ ãchia nemietá oopataɨ.

¹² Piarã ãchia nemietá mẽra oopataɨ, tachi p'eradai p'anɨma mãɨ k'orea pedeadai k'orea.

¹³ Maamina ne ãarea ɨnaane bɨutade sãmaasã́ bɨ unupipatama,

¹⁴ ɨnaane ãarea unupata pẽra. Mãɨ k'orea nãɨya jarapatama: «Ɨ̃rɨmase pɨ k'ãi bɨ. Nemietaade piu bada p'irabarise. Maapae Cristopa pɨ ɨnaane bɨipɨ».

¹⁵ Mãɨpuru jĩrak'aua p'anarãt'ɨ. Atua be jĩra p'anarãt'ɨ, mãɨpari mãra k'ɨ̃risiadepa p'anarãt'ɨ.

¹⁶ Mãrapa ne p'ue ooutacha pia oot'ɨ, nãɨ ewaride ẽpẽrarãpa ne ãarea nemietá oopata pẽra.

¹⁷ K'ɨ̃risiawẽa be jĩra p'anarãt'ɨ, mãɨpari minachia k'awat'ɨ k'ãre Tachi Chiparipa oopi bɨt'a.

¹⁸ It'uapa piu niparãt'ɨ. Mãɨpa nemietá atepe oopiparima. Piu nipadai k'aepẽra Tachi Ak'õre Jaoredepa p'anat'ɨ.

¹⁹ Tachi Ak'õre pedeade bɨ bɨt'a, ũpẽarãpa k'aripataɨ mãɨnepa Tachi Ak'õre Jaorepa k'aripiparí k'arit'ɨ, chi ara machi paara sõpia p'aneepidai k'orea. Tachi Chiparia sõnepa k'arit'ɨ pia pedeadai k'orea.

²⁰ Tachi Chipari Jesucristo t'ɨ̃nepa ewaricha tachi Pajãnepema Ak'õrea nejõma k'orea sõpia bɨade at'ɨ.

Tachi k'ima ome sãmaasã́ p'ananai p'anɨ

²¹ Cristo wap'ea p'anɨnepa ara mastu chi ĩjãat'ɨ.

²² Wẽrarã, mãra k'ima pedea ũrit'ɨ, mãrapa ara Tachi Chipari Cristo pedea ũripata jĩra.

²³ Ɨmɨk'ĩra ichi k'ima chiparipɨ. Ara mãɨ jĩra Cristo ichi ẽpẽrarã Chiparipɨ mãɨnepa ichi ẽpẽrarã ichi k'ak'ua jĩra p'anɨma. Ichi ãchi K'aripaparipɨ.

²⁴ Cristo ẽpẽrarãpa ichi pedea oopata jĩra wẽrapa ichi k'ima pedea ãarea ĩjãa bai bɨma.

²⁵ Ɨmɨk'ĩrarã, ara machi k'imarã k'ɨ̃ria p'anat'ɨ Cristopa tachi k'ɨ̃ria bɨt'a unupida jĩra. Ichi k'ɨ̃ria bɨdepa tachi k'orea ara ichi itu peapisima.

²⁶ Ichia mãɨya oosima tachi Tachi Ak'õre pae pia bɨi k'orea. Ichi pedeapa tachi nemietá sɨɨsima paniapa sɨɨda jĩra.

²⁷ Jõma mãɨ oosima tachi ichi pae minachia pia bɨi k'orea, jayoawẽa, asosoawẽa, mãɨnepa mi ãpia pida paritua mietaawẽa. Ichia k'ɨ̃ria basima tachi ichi pae pia p'ananait'a, k'achia p'ananayane a jarawẽa.

²⁸ Ara mãɨ jĩra ɨmɨk'ĩrapa ichi k'ima minachia k'ɨ̃ria bai bɨma ara ichi k'ak'ua k'ɨ̃ria bɨ jĩra. Ɨmɨk'ĩrapa ichi k'ima k'ɨ̃ria bɨpɨra, ara ichi k'ɨ̃ria bɨma.

²⁹ Abaɨ pida ara ichi k'ak'ua unuemaak'ama, mãɨpari pia nek'o bɨdepa minachia ak'ɨparima. Ara mãɨ jĩra Cristopa ichi ẽpẽrarã ak'ɨparima,

³⁰ ichi k'ak'ua jĩra p'anɨ pẽra.

³¹ Tachi Ak'õre pedeade nãɨya bɨ bɨma: «Mãɨ k'orea ɨmɨk'ĩrapa chi ak'õre mãɨnepa chi nae ameek'ari ichi k'ima ome ará beeipɨ. Mãɨya k'ak'ua aba bɨ jĩra p'ananaipɨ».

³² Mãɨ pedeapa k'ɨ̃risia minachia bɨ k'awawẽa p'anana k'awapi bɨma. Mɨa jara bɨma Cristo ichi ẽpẽrarã ome ará p'anɨnepema.

³³ Mãɨ k'orea k'awapi bɨmina machicha mãra k'ima k'ɨ̃ria p'ananai p'anɨma ara machi k'ɨ̃ria p'anɨ jĩra. Mãɨnepa wẽrapa ichi k'ima wap'ea bai bɨma.