Ep'esio 4 - Tachi Ak'õre Pedea

Tachi Ak'õre Jaoredepa ũpẽarã k'ak'ua aba p'anɨma

¹ Mɨ Tachi Chipari k'orea eda serra bɨma. Mɨa mãrá chichupuria idiruma jĩp'a nipadamẽrá. Tachi Ak'õrepa mãra t'ɨ̃sima mãɨya nipadamẽrá.

² Mãra chi atepe be k'ɨ̃risiarãt'ɨ, mãɨpari k'ɨ̃risia piadepa p'anat'ɨ. Ara machi paara k'ɨ̃rianepa choa p'anat'ɨ.

³ Tachi Ak'õre Jaorepa mãra ne k'ɨ̃risiawẽa p'anapi bɨdepa nejõma oot'ɨ piarã ará p'ananamẽrá.

⁴ Tachi k'ak'ua abapuru bɨma. Tachi Ak'õre Jaore abapuru bɨt'a uru p'anɨma. Tachi Ak'õrepa mãra t'ɨ̃sima abarik'a nɨ p'ananamẽrá.

⁵ Tachi Chipari Jesú abapuru bɨma. Tachia abarik'a Jesude ĩjãa p'anɨma. Mãɨnepa ara abarik'a ichi t'ɨ̃nepa porochoasidama.

⁶ Tachi Ak'õre abapuru bɨma. Ichi jõmãɨrã Ak'õrepɨ, jõmãɨrã Chiparipɨ. Jõmãɨrã sõne bɨma mãɨnepa jõmãɨrãnepa ichia oo k'ɨ̃ria bɨt'a ooparima.

⁷ Maamina Cristopa ne oopiparí tea k'ɨ̃ria bada jĩra ichi sõpiadepa tachicha ichi pae ne oodamẽrá nepia awara awará teasima.

⁸ Tachi Ak'õre pedeade nãɨya bɨ bɨma: «Ichi ɨt'aa wãside ichi nek'ĩramá p'uek'oada eda serra bɨde ateesima. Maapae nepia be teasima ẽpẽrarã́».

⁹ Chi ɨt'aa wãsiede a bɨpa ¿k'ãre jara bɨma? Jara bɨma ɨt'aa wãi naena ichi ɨt'ɨpa nãɨ ĩjũa jeeda pará bɨdea chesit'a.

¹⁰ Chi ɨt'ɨpa edá chedat'a mãicha chi pajã atepe ɨt'ɨ pará bɨmá wãsima ne ãarea ichidepa p'ananamẽrá.

¹¹ Ichiapuru chi eda waapẽarã bɨsima ichia peedaɨrã p'ananamẽrá, waapẽarã bɨsima Tachi Ak'õre pari pedeapataɨrã p'ananamẽrá, waapẽarã bɨsima chi pedea pia Cristo k'orea jaratea nipadamẽrá, mãɨnepa waapẽarã bɨsima ũpẽarã ak'ɨpataɨrã mãɨnepa jarateapataɨrã p'ananamẽrá.

¹² Ichia mãɨya bɨsima ẽpẽrarã Tachi Ak'õrenepemarã k'aripadamẽrá, ãchia pida Tachi Ak'õre pae p'ue pia oodamẽrá. Mãɨya jõma Cristo ẽpẽrarã, ichi k'ak'ua apataɨ chaarea waripodoparima,

¹³ aba jõmãɨrã Tachi Ak'õre Warrade ĩjãa p'anɨnepa mãɨnepa k'awa p'anɨnepa ará pia p'aneeutadea. Mãɨne tachi ne ãareaɨne Cristo jĩra p'ananaipɨ.

¹⁴ Mãɨyara waa warra chak'e jĩra p'ananaiwẽma. Warra chak'epa paritua pedeauta ĩjãaparima. Mãɨ awara ẽpẽrarã sea k'awa berãpa jaratea p'anɨnepa seade ĩjãapipatama nãupa japa ãyá ateeru jĩra. Maamina tachi mãɨ japa jĩra p'ananaiwẽma.

¹⁵ Mãɨpari k'ɨ̃rianepa chi piarã pedea ĩjãanai p'anɨma ne ãareaɨne Tachi Chipari Cristo jĩra p'ananai k'orea.

¹⁶ Ichidepa jõma tachi ichi k'ak'uapɨ. Ará ãpua p'anɨma chi k'aripadai k'orea. Tachicha oodai p'anɨ jĩra ooutade jõmãɨrã k'ɨ̃rianepa pia waripododaipɨ.

Chi Cristode chiwidi jĩra p'anɨ sãmaasã́ nipadai p'anɨma

¹⁷ Mãrapa piarã oodamẽrá, mɨa Tachi Chipari t'ɨ̃nepa nãɨ jararuma: waa Tachi Ak'õrene ĩjãanak'apɨɨrã jĩra niparãt'ɨ. Ãchi k'ɨ̃risia piawẽa p'anɨnepa nipapatama.

¹⁸ Ãchi k'ɨ̃risia p'ãrione bɨ pẽra Tachi Ak'õre k'orea k'awadak'ama. Ãchi sõ chaareapa Tachi Ak'õre atua p'anɨ pẽra ichia chok'ae bapiparit'a nea p'anɨma.

¹⁹ Ãchia nemietá oo p'anɨ k'orea p'eradak'ama. Abapuru k'achia oo k'ɨ̃riapatama. Ne ãarea k'ĩra p'era oo p'anɨpa sẽnak'ama.

²⁰ Maamina mãrapa Cristode ĩjãasidaɨde k'awasidama mãɨya p'ananaiwẽa p'anɨt'a.

²¹ Ũpẽarãpa chi piarã pedea Cristo k'orea pia jarateasidama, mãɨnepa piarã mãrapa ichi k'orea ũrinak'ari ĩjãasidama.

²² Ãchia jarateadada nãɨpɨ: Mãrapa naena oo p'anana jĩra waa niparãt'ɨ. Tachi k'ak'ua nemietá ooyá bɨpa sea bɨdepa tachi piawẽa p'aneepiparima. Mãɨ itu bɨt'ɨ, neet'á sore wẽapata jĩra.

²³ Mãɨpari Tachi Ak'õrea mãra k'ɨ̃risia chiwidi itu oopit'ɨ.

²⁴ Mãɨ k'ɨ̃risia chiwidi Tachi Ak'õrepa oosima mãra ichi jĩra p'ananamẽrá. Mãɨpuru p'aru chiwidi jɨ̃ p'anɨ jĩra k'ɨ̃risia chiwididepa nipat'ɨ. Mãɨya mãra Tachi Ak'õre k'ĩrari jĩp'a, pia nipadaipɨ chi piarã pedeapa jara bɨ jĩra.

²⁵ Mãɨpuru sea itu bɨt'ɨ. Abapuru piarãt'a waapẽarã ome pedeat'ɨ, jõma tachi abarik'a k'ak'uadepema pẽra.

²⁶ K'ĩruunaipɨra nemietá oorãt'ɨ. Mãra k'ĩruu p'anɨmisa chi k'ĩruuna ome sõpia pedeat'ɨ ewari k'iui naena.

²⁷ Tiorea itu seapirãt'ɨ.

²⁸ Chi nechɨaparí pada waa nechɨaiwẽa bɨma, mãɨpari ara ichi juapa mimiai bɨma ne uru bai k'orea. Mãɨya ichia uru baipɨ nenea k'ede k'aripai k'orea.

²⁹ Pedea k'achia pedearãt'ɨ. Mãɨpari waapẽarã k'aripadai k'orea abapuru pedea piat'a pedeat'ɨ. Mãɨya chi mãra pedea ũri be pia p'ananaipɨ.

³⁰ Nemietá oo p'anɨpa Tachi Ak'õre Jaore sõp'uapirãt'ɨ. Tachi Ak'õrepa ichi mãrá teasima ichidirã k'awadamẽrá. Ichi Jaore mãra ome baipɨ aba Tachi Ak'õrepa ichi ẽpẽrarã jõma pia bɨi ewaridea.

³¹ Jõma chi mãrapa abaɨ k'orea sõne piawẽa k'ɨ̃risiapataɨ, sõnepa k'ĩruupataɨ, k'ĩruu pedeapataɨ, ɨbɨa k'ĩruu pedeapataɨ, waapẽarã k'orea k'achia pedeapataɨ, mãɨnepa ãarea waapẽarã piawẽa oodai k'ɨ̃risiapataɨ itu bɨt'ɨ.

³² Sõpia p'anat'ɨ. K'ĩra chupuria p'anat'ɨ. Chi mãrapa piawẽa oodada k'ɨ̃risia atuat'ɨ, Tachi Ak'õrepa mãra nemietá Cristodepa k'ɨ̃risia atuada jĩra.