Ep'esio 3 - Tachi Ak'õre Pedea

Tachi Ak'õrepa Pablo bɨsima judiorãwẽa jaratea bamẽrá

¹ Mãɨpuru mɨa [mãra k'orea Tachi Ak'õrea ɨt'aa chiidiparima]. Mɨ Pablopɨ. Mãra judiorãwẽa Jesucristo k'orea jaratea bɨ k'orea eda serra bɨma.

² Mɨmá mãrapa minachia k'awa p'anɨma Tachi Ak'õrepa ichi sõpiadepa mɨ bɨsit'a mãrá jarateamẽrá.

³ Ichia naena k'awapiwẽa bada mɨá k'awapisima. Mãɨ k'orea mɨa nãɨ k'art'ade ãpia bɨsima.

⁴ Nãɨ k'art'a eda jara p'anɨne mãrapa k'awadaipɨ Tachi Ak'õrepa Cristo k'orea k'awapiwẽa bada mɨa k'awa bɨt'a.

⁵ Naena Tachi Ak'õrepa ẽpẽrarã́ mãɨ k'awapiwẽa basima, maamina naapae chi ichi pari pedeapataɨrã́ mãɨnepa chi Jesucristopa peedaɨrã́ ichi Jaoredepa mãɨ k'awapisima.

⁶ Ichia k'awapiwẽa bada nãɨt'a: judiorãwẽpa pedea pia Cristo k'orea ĩjãa p'anɨnepa judiorã ome ará Tachi Ak'õrepa teaidepema jitadaipɨ, abarik'a k'ak'uade p'anɨma, mãɨnepa Tachi Ak'õrepa Jesucristodepa teai jarada ará uru p'anɨma.

⁷ Tachi Ak'õrepa ichi sõpiadepa mɨ chi ichi pae mimiaparí bɨsima mãɨ pedea pia Cristo k'orea jarateamẽrá. Ichi jua chaareadepa mãɨya oosima.

⁸ Jõma ẽpẽrarã Tachi Ak'õrenepemarã t'ãena mɨ k'aepe bɨmina, ichi sõpiadepa mɨt'u bɨsima judiorãwẽa chi Cristo k'orea nepia jõk'apɨ́ jarateamẽrá.

⁹ Tachi Ak'õre chi nejõma oodapa mɨ bɨsima jõmãɨrã́ k'awapimẽrá sãmaasã́ oosit'a ichia jua chiwidieda ooi k'ɨ̃risia bada. Mãɨ ooi k'ɨ̃risia bada naena k'awapiwẽa basima.

¹⁰ Naapae ẽpẽrarã Tachi Ak'õrenepemarãnepa Ichia ichi ne ãareaɨne minachia ne k'awa bɨt'a k'awapisima chi jua chaarea berã́ mãɨnepa chi pajãnepema chi atepe k'awa berã́.

¹¹ Mãɨya oosima ichia naenaena Tachi Chipari Jesucristodepa ooi k'ɨ̃risia bada pẽra.

¹² Tachia ara mãɨ Jesucristode ĩjãa p'anɨ pẽra mãɨnepa ichi ome ará p'anɨ pẽra Tachi Ak'õrea ne wap'eawẽa ɨt'aa chiididai p'anɨma.

¹³ Mãɨ k'orea mɨa mãrá nãɨya ũraaruma: mɨ mãra k'orea nãma mĩa bɨmina minachia k'ɨ̃risia paraarãt'ɨ. Mãɨya minachia mĩa bɨma mãra Tachi Ak'õre ome pia p'ananamẽrá.

Pablopa Ep'esodepemarã k'orea Tachi Ak'õrea ɨt'aa chiidida

¹⁴ Mãɨ k'orea mɨ Tachi Pajãnepema Ak'õre k'ĩrari sĩraporode k'obeeparima.

¹⁵ Ichia jõma pajãne be mãɨnepa nãɨ ĩjũane be oosima mãɨnepa ichidepa p'anɨma.

¹⁶ Mɨa ɨt'aa chiidi bɨma ichi Jaoredepa mãɨnepa ichia ne minachia pia bɨdepema mãra sõne jua chaarea p'anapimẽrá. Mãɨya mãra chaarea p'ananaipɨ.

¹⁷ Mãɨnepa ɨt'aa chiidi bɨma ĩjãa p'anɨ pẽra Cristo mãra sõne bamẽrá. Ɨt'aa chiidi bɨma mãra ne ãareaɨne k'ɨ̃rianepa p'ananamẽrá. Mãɨya chaarea p'ananaipɨ minachia k'arra jãa p'anɨ jĩra.

¹⁸ Mãɨne mãrapa jõma ẽpẽrarã Tachi Ak'õrenepemarã ome p'ue k'awadaipɨ chi Cristopa tachi k'ɨ̃ria bɨt'a. Mãɨ jet'ea bɨma, teesoa bɨma, ɨt'ɨ bɨma mãɨnepa eudu bɨma.

¹⁹ Ara tachi k'ɨ̃risiadepa p'ue k'awadak'amina mɨa ɨt'aa chiidi bɨma mãrapa mãɨ k'awadamẽrá. K'awasidara ne ãareaɨne Tachi Ak'õre jĩra p'ananaipɨ.

²⁰ ¡Tachi Ak'õre minachia pia bɨma! Ichi jua chaarea tachi sõne bɨdepa ne waibɨa p'ue ooipɨ, tachia k'ɨ̃risiapataɨ k'aepẽra wa ichiá ɨt'aa chiidipataɨ k'aepẽra.

²¹ Ũpẽarã Tachi Ak'õreneerã, Jesucristo ome p'anɨ pẽra ¡ewaricha Tachi Ak'õrea pia pedeat'ɨ! Mãɨya beese.