Ep'esio 2 - Tachi Ak'õre Pedea

Tachi Ak'õrepa Jesucristodepa tachi k'aripada

¹ Naena mãra piu p'anasidama, ĩjãanawẽa p'anasidepa nemietá oopachida pẽra.

² Mãɨya p'ɨrrɨasidama chi nãɨ ĩjũanepema k'ɨ̃risiat'a ĩjãa p'anana pẽra mãɨnepa jaore mietaarã chi minachia k'awa bɨde ĩjãa p'anana pẽra. Nãɨ ewaride ichia chi Tachi Ak'õre pedea ĩjãanak'apɨɨrã ichi juade uru bɨma.

³ Naena jõma tachi ãchi jĩra p'ɨrrɨasidama chi nãɨ k'ak'uapa nemietá ooyá bɨt'a oo p'anana pẽra. Nãɨ k'ak'uapa nemietá oo k'ɨ̃ria bɨt'a mãɨnepa tachia nemietá ooyá k'ɨ̃risia bɨt'a oo p'anasidama. Mãɨ nemietá pẽra Tachi Ak'õrepa ichi k'ĩruupidepa tachi ɨtɨai basima ãarea nemietá oopataɨrã ɨtɨapari jĩra.

⁴ Maamina Tachi Ak'õrepa minachia k'ĩra chupuriaparima. Ichia tachi minachia k'ɨ̃ria bɨ pẽra

⁵ nemietaade piu p'anana Cristo ome ará chok'ae bɨsima. Tachi Ak'õrepa ichi sõpiadepa mãra k'aripasima.

⁶ Jesucristo ome ará p'anɨ pẽra Tachi Ak'õrepa tachi chok'ae p'irabaripisima mãɨnepa mãɨ ome ará pajãne suak'abari beepisima.

⁷ Mãɨ jõma oosima k'aadeapema ewaride ichi sõpia minachia bɨt'a unupii k'orea. Mãɨnepa tachi chi Jesucristo ome p'anɨrã k'aripasima.

⁸ Jesude ĩjãanana pẽra Tachi Ak'õrepa ichi sõpiadepa mãra k'aripasima. Ara machidepa k'aripadaé pasima, maawẽapuru Tachi Ak'õrepuru pari k'aripasima.

⁹ Mãrapa pia oo p'anɨ k'orea Tachi Ak'õrepa k'aripaé pasima. Mãɨya mi ãpia pida ara tachi k'orea p'ue pia pedeadaiwẽma.

¹⁰ Tachi Ak'õrepa tachi Jesucristodepa chiwidi oosima nepia oo p'ananamẽrá. Mãɨ nepia ichia naena bɨsima tachia oodamẽrá.

Cristodepa judiorã mãɨnepa judiorãwẽ Tachi Ak'õre ome pia p'aneenana

¹¹ Mãɨ k'orea k'ɨ̃risiat'ɨ mãra judiorãwẽnepa t'õnana pẽra, judiorãpa mãrá chi «k'ak'ua tauchaadawẽa beade» apachidama. Ara ãchi chi «k'ak'ua tauchaa beade» apachidama, maamina abapuru nãɨ k'ak'uade k'ĩra awara p'anɨma.

¹² Nãɨ k'ɨ̃risiat'ɨ: mãra naena Cristo newẽa p'anasit'a mãɨnepa Israeldepemarãwẽ pasit'a. Tachi Ak'õre ãchi ome pedea auside ichia mãrá mi ãpia pida teai jaraé pasima. Mãɨ awara mãra sãmaasã́ pia p'ananaiwẽa p'anasidama mãɨnepa nãɨ ĩjũane Tachi Ak'õre newẽa p'anasima.

¹³ Maamina naapae Jesucristo ome p'anɨ pẽra, mãra chi naena t'ɨmɨa beada Tachi Ak'õrepa Cristo oadepa ichi k'ait'a enemeesima.

¹⁴ Piarã Cristopa tachi ne k'ɨ̃risiawẽa beepisima. Ichia judiorã, judiorãwẽ ome ará bɨsima p'uuru aba beemẽrá. Ichi piudadepa tachi awara p'anana ará bɨsima.

¹⁵ Moisepa bɨdapa ne minachia wawaria oopipachima mãɨ judiorã, judiorãwẽ ãchi k'ak'awá p'ananamẽrá. Maamina Cristo piudadepa mãɨ Moisepa bɨda ãyá bɨsima, ne k'ɨ̃risiawẽa ará p'ananamẽrá mãɨnepa p'uuru chiwidi aba bɨde tuanamẽrá.

¹⁶ Ichi k'urusude piudadepa p'uuru ume bada p'uuru aba ook'ari umea Tachi Ak'õre ome pia bɨsima. Mãɨya tachi awara p'anana ichia ará pia bɨsima.

¹⁷ Cristo chesima, chi pedea pia Tachi Ak'õre ome ne k'ɨ̃risiawẽa bai k'orea, mãrá jarai k'orea, chi Tachi Ak'õrenepema t'ɨmɨa p'ananamá mãɨnepa chi Tachi Ak'õre k'ait'a p'ananamá.

¹⁸ Cristodepa tachi umeepa abarik'a tachi Pajãnepema Ak'õremá naa p'ue chedaipɨ, ichi Jaore aba bɨdepa.

¹⁹ Mãɨpuru mãra judiorãwẽ waa ẽpẽerã tua awaraɨdepemarã jĩra p'ananaiwẽma, mãɨpari Tachi Ak'õre p'uurudepemarã ome ará p'anɨma; mãra ẽpẽrarã Tachi Ak'õrenepemarãpɨ.

²⁰ Mãra mawara te jĩra p'anɨma. Jesupa peedaɨrã mãɨnepa Tachi Ak'õre pari pedeapataɨrã mãɨ te jĩru mawara jĩra p'anɨma. Mãɨ tedepema mawara chi piipará bɨ, Jesucristopɨ.

²¹ Ichidepa, mawara ará p'ã bɨ jĩra, te pia oopodopatama, Tachi Chipari pae pia beemẽrá.

²² Cristo ome p'anɨ pẽra mãra sida jõma ẽpẽrarã Tachi Ak'õrenepemarã paara, te aba bɨ jĩra p'anɨma. Mãɨ tede Tachi Ak'õre ichi Jaoredepa baparima.