Colosense 4 - Tachi Ak'õre Pedea

¹ Chiparirã, jĩp'a oot'ɨ chi mãra pae pari mimiapataɨrã ome. Mãra pida mãra Chipari pajãne uru p'anɨt'a k'awa p'anɨma.

² Ewaricha Tachi Ak'õrea ɨt'aa chiidi p'anat'ɨ. Ɨt'aa chiidiutade tau ɨbɨa p'anat'ɨ mãɨnepa Tachi Ak'õrea sõpia p'anɨane at'ɨ.

³ Tai k'orea ɨt'aa chiidit'ɨ Tachi Ak'õrepa eda wãpataɨ ewaru jĩra chi Cristo k'orea naena k'awapiwẽa bada itu jarateapimẽrá. Mãɨ jaratea bɨ k'orea mɨ eda jɨ̃a nɨbɨ uru p'anɨma.

⁴ Ɨt'aa chiidit'ɨ mɨa pia jarateamẽrá mɨa ooi bɨ jĩra.

⁵ Cristode ĩjãanak'apɨɨrã t'ãena k'ɨ̃risia k'awa p'anɨnepa nipat'ɨ. Ewaricha jɨrɨt'ɨ ichi k'orea ãchiá k'awapidai k'orea.

⁶ Pedea piadepa pedeat'ɨ jõmãɨrãpa pia ũrinamẽrá. Mãɨya Cristo k'orea chiidiutade mãrapa k'awa p'ananaipɨ sãmaasã́ p'anoonai p'anɨ.

Pablopa nãɨ k'art'ade k'aadea bɨda

^7-8 Tachia k'ɨ̃ria p'anɨ ũpẽa Tík'ik'o mɨa mãramá peeruma mɨ k'orea k'awadamẽrá mãɨnepa sõpiadamẽrá. Ichia mɨ ome Tachi Chiparipa oo bɨ ne ãareaɨne pia oo bɨma. Ichia tai k'orea mãrá ãarea nepɨrɨipɨ.

⁹ Tík'ik'o ome ũpẽa Onésimo peeruma. Ichia ne ãareaɨne jĩp'a oo bɨma mãɨnepa taipa ichi k'ɨ̃ria p'anɨma. Tik'ik'opa mãɨnepa Onésimo pida mãrá nepɨrɨdaipɨ jõma nãma sãmaasã́ nɨbɨt'a.

¹⁰ Ũpẽa Aristarco mɨ ome eda jɨ̃a nɨbɨma. Ichia mãrá pia bapade a jara peeruma. Bernabé meme warra Marcopa pia bapade a jara peeruma mãrá. Ichi k'orea mɨa naena k'art'ade bɨsima. Ichi mãramá wãipɨra, ichiá pia pedeat'ɨ.

¹¹ Mãɨnepa ũpẽa Jesú, Justo apataɨpa pia bapade a jara peeruma mãrá. Ũpẽarã judiorãnepema mãɨ ũpea p'anɨpa nãma mɨ k'aripa jaratea p'anɨma Tachi Ak'õrepa ichidirã ichi juade ua bɨ k'orea. Mãɨ ũpẽarã k'orea mɨ sõpia baparima.

¹² Chi mãra p'uurudepema Epap'rapa pia bapade a jara peeruma mãrá. Ichi Jesucristo pae pari mimiaparipɨ. Ichia ewaricha Tachi Ak'õrea ɨt'aa chiidi baparima mãra ne ãareaɨne choa p'ananamẽrá, minachia ĩjãa p'ananamẽrá mãɨnepa jõma Tachi Ak'õrepa oopi k'ɨ̃ria bɨ k'awadak'ari oodamẽrá.

¹³ Mɨa jararuma: ũpẽa Epap'ra piarã mimia bɨma mãra k'aripai k'orea, jõma ũpẽarã Laodicea p'uurudepemarã mãɨnepa Hierápoli p'uurudepemarã k'aripai k'orea.

¹⁴ Ũpẽa nẽará teaparí Lucapa pia bapade a jara peeruma mãrá. Ichi taipa k'ɨ̃ria p'anɨma. Ũpẽa Dema pida pia bapade a jara peeruma mãrá.

¹⁵ Tachi ũpẽarã Laodicea p'uurudepemarã́ pia p'anapade a jara peeruma. Tachi ũpẽawẽra Ninp'a mãɨnepa jõmãɨrã Cristode ũpẽarã ichi tede ará nɨbeepataɨrã́ pia p'anapade a jara peeruma.

¹⁶ Mãrapa nãɨ k'art'a eda jaradak'ari ũpẽarã Laodicea p'uurudepemarã́ pida eda jarapit'ɨ. Mãra pida chi k'art'a mɨa ãchimá tea peeda eda jarat'ɨ.

¹⁷ Ũpẽa Ark'ipoa jarat'ɨ: «Tachi Chiparipa oopi bɨ ãarea oo base».

¹⁸ Mɨ Pablopɨ. Ara mɨchi juapa bɨruma mɨa tea peerut'a ãchi arapá p'ananamẽrá. Mɨ eda jɨ̃a nɨbɨ uru p'anɨ k'orea Tachi Ak'õrea ɨt'aa chiidi p'anat'ɨ. Mɨa k'ɨ̃ria bɨma Tachi Ak'õrepa ichi sõpiadepa mãra k'aripa bamẽrá.