Colosense 3 - Tachi Ak'õre Pedea

Ne ɨt'aripema jɨrɨdai p'anɨma

¹ Mãra Cristo ome chok'ae p'irabaridada pẽra ne ɨt'aripema jɨrɨ p'anat'ɨ. Mãma Cristo Tachi Ak'õre juaraari suak'abari bɨma.

² Ne ɨt'aripemarã k'orea k'ɨ̃risia p'anat'ɨ. Nãɨ ĩjũanepema k'orea k'ɨ̃risia p'anarãt'ɨ.

³ Mãɨya p'ɨrrɨadai p'anɨma, Cristo ome piudak'ari, ichi ome chok'ae p'anɨ pẽra. Mãɨ waapẽarã k'awadak'ama. Maamina Cristo Tachi Ak'õre ome chok'ae bɨ pẽra, mãra sida Tachi Ak'õre ome chok'ae p'anɨma.

⁴ Mãra Cristo k'orea chok'ae p'anɨ pẽra ara ichi mãicha unupirude mãra ichi ome p'ananaipɨ. Mãɨne ichi jĩra k'ĩrawãrea p'ananaipɨ.

Cristo k'orea tachi chiwidi p'aneenana

⁵ Mãɨpuru jõma nãɨ ĩjũanepema k'ɨ̃risia mãra sõne bɨ itu bɨt'ɨ. Awaraɨ ome k'ãirãt'ɨ, ne k'ĩra p'era oorãt'ɨ, mãra k'ak'uapa nemietá ooyá bɨ oorãt'ɨ, k'ɨ̃risia k'achia k'ɨ̃risiarãt'ɨ, mãɨnepa ne minachia uru p'ananai k'ɨ̃ria p'anarãt'ɨ. Chi ne minachia k'ɨ̃ria uru bɨt'a juapa oodada sãdo ĩjãa bɨ jĩra bɨma.

⁶ Jõma mãɨ k'achia k'orea Tachi Ak'õrepa ichide ĩjãanak'apɨɨrã ɨtɨaipɨ.

⁷ Mãra sida naena mãɨya nipapachidama.

⁸ Maamina naapae jõma nãɨ itu bɨt'ɨ: mãra sõnepa k'ĩruupataɨ, k'ĩruu pedeapataɨ, waapẽarã́ piawẽa oopataɨ, waapẽarã́ k'achia pedeapataɨ mãɨnepa pedea k'achia jarapataɨ.

⁹ Waapẽarã́ sea oorãt'ɨ. Mãra chi ẽpẽra naena p'ananat'a itu bɨsidama, tachia neet'á sore wẽapata jĩra. Mãɨnepa mãrapa nemietá oopachidaɨt'a itu bɨsidama.

¹⁰ Neet'á chiwidi jɨ̃uta jĩra mãra chiwidi p'aneesidama ara Tachi Ak'õre jĩra p'ananamẽrá. Mãɨ awara mãra pia oopodoutama ichi jĩra p'aneenamẽrá mãɨnepa ichi pia k'awadamẽrá.

¹¹ Tachi Ak'õrepa mãɨya ooda pẽra ichi k'ĩrari griego judio ome abarik'a p'anɨma. K'ak'ua tauchaa bɨ k'ak'ua tauchaawẽa bɨ ome abarik'a p'anɨma. Tua awaraɨdepema, ne atua bɨ ẽpẽra ome abarik'a p'anɨma. Chi chipari pae pari mimiaparí, mãɨ chi chipari pae pari mimiak'apɨ́ ome abarik'a p'anɨma. Cristo chi atepe piipará bɨma. Ichi jõmãɨrã sõne bɨma.

¹² Tachi Ak'õrepa mãra k'ɨ̃rianepa jɨrɨ atasima ichi pae pia p'ananamẽrá. Mãɨpuru waapẽarã k'ĩra chupuria p'anat'ɨ. Ẽpẽra pia p'anat'ɨ. Mãra chi atepe be k'ɨ̃risiarãt'ɨ. Jõmãɨrã ome k'ɨ̃risia piadepa p'anat'ɨ. Ara machi paara choa p'anat'ɨ.

¹³ Jõmãɨrã ome choa k'awa p'anat'ɨ. Abaɨpa piawẽa oosira mãɨ piawẽa ooda k'ɨ̃risia atuat'ɨ. Mãrapa piawẽa oodada Tachi Chiparipa k'ɨ̃risia atuada jĩra mãra pida k'ɨ̃risia atuat'ɨ.

¹⁴ Mãɨ awara jõmãɨrã ome chi k'ɨ̃ria tuanat'ɨ. Mãɨya mãra jõmãɨrã ome tausia pia tuananaipɨ.

¹⁵ Tachi Ak'õrepa mãra t'ɨ̃sima k'ak'ua aba bɨ jĩra p'ananamẽrá. Cristopa nek'ĩramariwẽa p'anapi bɨma, mãra sõne. Mãɨpa k'awapiipɨ k'ãre oodai p'anɨ. Mãɨya p'anat'ɨ. Mãɨnepa Tachi Ak'õrea sõpia p'anɨane at'ɨ.

¹⁶ Pedea Cristo k'orea mãra sõne uru p'anat'ɨ. Jõma Tachi Ak'õre k'ɨ̃risiadepa chi jarateat'ɨ mãɨnepa chi k'aripat'ɨ pia ĩjãanai k'orea. Tachi Ak'õre pedeade bɨ bɨt'a k'arit'ɨ, ũpẽarãpa k'aripataɨ mãɨnepa Tachi Ak'õre Jaorepa k'aripiparí Tachi Ak'õrea k'arit'ɨ. Sõnepa Tachi Ak'õrea sõpia p'anɨane a p'anɨnepa k'arit'ɨ.

¹⁷ Mãra pedeautade mãɨnepa ne ooutade jõma oot'ɨ Tachi Chipari Jesupa k'ɨ̃ria bɨ jĩra. Ichidepa Tachi Pajãnepema Ak'õrea sõpia bɨade at'ɨ.

Ũpẽarã ãchi tiidapemarã ome sãmaasã́ p'ananai p'anɨ

¹⁸ Wẽrarã, mãra k'ima pedea ũrit'ɨ. Tachi Chipari Jesú ome p'anɨ pẽra mãɨya oodai p'anɨma.

¹⁹ Ɨmɨk'ĩrarã, ara machi k'imarã k'ɨ̃ria p'anat'ɨ. Ãchi ome k'ĩruu p'anarãt'ɨ.

²⁰ Warrarã, mãra ak'õrerã pedea ĩjãat'ɨ Tachi Chiparipa mãɨ pia unu bɨẽra.

²¹ Ak'õrerã, mãra warrarã k'ĩruupirãt'ɨ, k'ĩra piawẽa bɨpidaemaapa.

²² Chi chipari pae pari mimiapataɨrã, mãra chipari nãɨ ĩjũanepemapa oopirut'a jõma oot'ɨ. Maamina ichia ak'ɨmaa bɨde puru oorãt'ɨ, ichi ome pia p'ananai k'orea. Mãɨpari Tachi Ak'õre wap'ea p'anɨ pẽra sõpiadepa jõma oot'ɨ.

²³ Jõma mãrapa oo p'anɨt'a chok'eadepa oot'ɨ Tachi Chipari pae oo p'anɨ jĩra. Maamina mãɨya oorãt'ɨ ẽpẽrarãpa mãra pia ununamẽrá.

²⁴ Mãra Tachi Chipari Cristo pae pari mimiapataɨrãpɨ. Mãrapa k'awa p'anɨma ichi pae pia oo p'anɨ pẽra, ichia mãrá chi ne atadai p'anɨt'a teaipɨ.

²⁵ Maamina chi piawẽa oo bɨ Tachi Ak'õrepa ɨtɨaipɨ. Ichia jõmãɨrã abarik'a ɨtɨaparima.