Colosense 2 - Tachi Ak'õre Pedea

¹ Mɨa k'ɨ̃ria bɨma mãrapa nãɨ k'awadai: mɨ minachia mimia bɨma mãra Colosadepemarã, ũpẽarã Laodicea p'uurudepemarã mãɨnepa jõma ũpẽarã mɨ ununak'aɨ sida k'aripai k'orea.

² Mɨa k'ɨ̃ria bɨma jõmãɨrã sõpiapiit'a, k'ɨ̃ria p'anɨnepa ará pia p'ananai, mãɨnepa piarã k'ɨ̃risia k'awa uru p'anɨnepa pia p'ananai. Mãɨya Tachi Ak'õrepa naena k'awapiwẽa bada k'awadaipɨ. Mãɨ Cristopɨ.

³ Ichiapuru Tachi Ak'õre k'ɨ̃risiat'a k'ɨ̃risiapiipɨ mãɨnepa ne minachia k'awapiipɨ. Mãɨ k'ɨ̃risiat'a mãɨnepa ne k'awa p'anɨt'a minachia pia p'anɨma.

⁴ Jõma mãɨ mɨa jara bɨma mi ãpia pida piarã jĩra jara bɨdepa mãra seapidaemaapa.

⁵ Mɨ mãra ome bɨwẽmina k'ɨ̃risiadepa mãra ome bɨma. Mɨa k'awa bɨma mãra ará pia p'anɨt'a mãɨnepa Cristode minachia ĩjãa p'anɨt'a. Mãɨ k'orea arapá bɨma.

Chiwidi jĩra p'aneenaipɨ Cristode

⁶ Mãrapa Tachi Chipari Jesucristode ĩjãanana pẽra ichidepa nipat'ɨ.

⁷ Ichidepa chaarea p'anat'ɨ k'arra minachia jita p'anɨ jĩra mãɨnepa te pia ooda jĩra. Ichide minachia ĩjãa p'anat'ɨ ũpẽarãpa jarateadada jĩra, mãɨnepa ewaricha Tachi Ak'õrea machi sõpia p'anɨane at'ɨ.

⁸ Jĩrak'aua p'anat'ɨ mi abaɨa pida mãra seapidaemaapa chi pari k'ɨ̃risiapiparidepa mãɨnepa seaparí k'ɨ̃risiadepa. Jõma makɨɨ chõarãenapema k'ɨ̃risiat'a jaore chaarearã nãɨ ĩjũanepemapɨ. Mãɨ pedea Cristo k'oreawẽpɨ.

⁹ Cristo, ẽpẽra k'ak'uade bɨt'a, mãɨ piarã Tachi Ak'õrepɨ.

¹⁰ Mãra Cristo ẽpẽrarã pẽra ichidepa nejõma uru p'anɨma Tachi Ak'õre ome pia p'ananai k'orea. Ichi chi chaarea berã chi Poro Chaareapɨ.

¹¹ Mãra ichi ẽpẽrarã pẽra k'ak'ua tauchaadada jĩra p'anɨma. Maamina ẽpẽra juapa oodawẽma. Mãɨpari jara bɨma tachi k'ak'uapa nemietá ooyá bɨdepema k'aripasima. Mãɨ k'ak'ua tauchaada Cristopa oosima.

¹² Tachi Ak'õrepa ichi jua chaareadepa Cristo chok'ae p'irabaripisima. Mãrapa Tachi Ak'õre mãɨya jua chaarea bɨ ĩjãanana pẽra porochoasidaɨde unupisidama Cristo ome t'ɨbarisidaɨt'a mãɨnepa Tachi Ak'õrepa mãra ichi ome chok'ae p'irabaripisidaɨt'a.

¹³ Naena mãra piu p'anasidama, ĩjãanawẽa p'anasidepa nemietá oopachida pẽra. Mãɨne tachi k'ak'uapa nemietá ooyá bɨ oopachidama. Maamina Tachi Ak'õrepa mãra Cristo ome chok'ae bɨsima. Jõma tachia nemietá oodada ichia k'ɨ̃risia atuasima.

¹⁴ Piarã nemietá oo p'anɨ k'orea tachi, Tachi Ak'õrea tee pará p'anasidama. Mãɨpuru Moisepa bɨdade bɨ bɨma tachi piudai p'anɨ. Maamina Cristo k'urusude piuside Tachi Ak'õrepa mãɨ tee p'anana ãarea k'ɨ̃risia atuasima.

¹⁵ Mãɨpuru Tachi Ak'õrepa jõma tachia ununak'aɨ chi jua chaarea berã p'uesima. Mãɨ ooda ichia jõmãɨrã́ k'awapisima.

¹⁶ Mãɨpuru mãrapa k'opataɨ k'orea mãɨnepa topataɨ k'orea ẽpẽrarãpa k'achia pedeadaipɨra, ãchi pedea ĩjãarãt'ɨ. Mãrapa arapaapataɨ ewari ak'ɨdak'a, jedek'o chiwidi ak'ɨdak'a mãɨnepa mimianak'apɨ́ ewari ak'ɨdak'a k'orea ãchia k'achia pedeadaipɨra, ĩjãarãt'ɨ.

¹⁷ Tachi Ak'õrepa jõma makɨɨ ooi bada tau t'aua unupi basima. Maamina ichia ooi bada Cristodepa jõma oosima.

¹⁸ Mãɨ k'orea abaɨ pida mãrapa nepia pajãne atadaiwẽane adaipɨra, ĩjãarãt'ɨ. Chi mãɨya pedeapataɨrã sea nipapatama waapẽarã k'aepẽra k'aepe be jĩra. Ãchia Tachi Ak'õrepa ɨt'aripa peedaɨrã minachia k'ɨ̃riapatama. K'ãmok'araa jĩra ununana minachia jarateapatama. Tachi k'ak'uapa ne piawẽa ooyá bɨdepa ẽpẽra minachia k'awa bɨ jĩra paritua k'ɨ̃risiapatama.

¹⁹ Ãchi Tachi Chipari Cristo ome p'anɨwẽma. Maamina Cristo ẽpẽrarãpa ichidepa nejõma uru p'anɨma ichi ome ará pia p'ananai k'orea. Ichidepa tachi waripatama Tachi Ak'õrepa waripi bɨ jĩra.

²⁰ Mãra Cristo ome ará piusida pẽra chi nãɨ ĩjũanepema jaore chaarearãne ĩjãanaiwẽa p'anɨma. Mãɨ ¿k'ãre k'orea waidi mãɨ k'ɨ̃risia ĩjãa p'anɨma nãɨ ĩjũanepemarãpa ĩjãapata jĩra?

²¹ Nãɨya jarapatama: «Jãkɨɨ t'õmarirãt'ɨ, k'o ajororãt'ɨ, jita ajororãt'ɨ».

²² Jõma mãɨ ẽpẽrarãpa ãchia k'ɨ̃risiadepa jarateapatama. Mãɨ k'ɨ̃risia k'aade wãnaiwẽa p'anɨma jõma tachia k'odada mãɨnepa todada jõpari pẽra.

²³ Piarã mãɨ k'ɨ̃risiat'a ne k'awapari jĩra bɨma. Ãchia jarapatama ara tachi tuaba ne oo p'anɨnepa Tachi Ak'õre ome p'ue pia p'ananai p'anɨ, waapẽarã k'aepẽra k'aepea nipadai p'anɨ, mãɨnepa ara tachi tuaba tachi k'ak'ua p'uapii p'anɨnepa minachia mĩa p'ananai p'anɨ. Maamina jõma makɨɨpa tachi k'ak'uapa nemietá ooyá bɨ jõpik'ama.