Apocalipsi 9 - Tachi Ak'õre Pedea

¹ Mãɨya nak'ari abaɨ Tachi Ak'õrepa ɨt'aripa peedapa ichi ãnimara k'achu chaasima. Mãɨne mɨa k'ãk'ãi nãɨ ĩjũanea baesit'a unusima. Mãɨne abaɨpa chi k'ãk'ãiya chi uria minachia bɨdepema eda wãpataɨ ewaparit'a teasima.

² Chi uria minachia bɨdepema eda wãpataɨ ewaside, chi uriadepa ɨt'aa jɨ̃ara minachia chesima mãɨ mẽa nejarra paauta jĩra. Mãɨ jĩarãnepa ãarea chi ɨmata mãɨnepa pajã p'ãriosima.

³ Mãɨne chi jɨ̃aranepa sisi minachia ũumari chesidama nãɨ ĩjũanea. Tachi Ak'õrepa chi sisi jua chaarea beepik'oasima ẽpẽerã k'aadamẽrá tusõrepa k'aaru jĩra.

⁴ Chi sisia jarasima ne k'irú mãɨnepa pak'uru ãrirãapadade asima. Maawẽapuru aba ẽpẽerã ãchi tau bɨɨrɨde chi Tachi Ak'õrene tauchaawẽa beada k'aapik'oasima.

⁵ Tachi Ak'õrepa chi sisia ẽpẽerã peapadade aé pasima, maawẽapuru jedek'o k'ak'o joesomapuru p'uapipadaade asima. Mãɨ chi tusõrepa k'aada jĩra p'ua basima.

⁶ Mãɨ ewaride chi ẽpẽerãpa piudai jɨrɨdaipɨ, maamina piudaiwẽma. Mãɨ piarã piuda k'ɨ̃ria p'anɨmina, mãɨ piudaiwẽma.

⁷ Mãɨ sisi mũra jĩra beasima k'ĩruune wãpataɨ ateewãpataɨ jĩra. Ãchi porode jũra jɨ̃parí nee ooda jĩra bɨt'a jɨ̃ p'anasima. Ẽpẽra k'ĩra jĩra p'anasima.

⁸ Ãchi puda ẽpẽra wẽra puda jĩra beasima. Ãchi k'ida imama k'ida jĩra beasima.

⁹ Ãchi k'ak'uade ne chaarea bɨ jiorro ooda jɨ̃ p'anasima. Ãchi ĩk'arra jĩk'ua basima mũrapa ãchi carro minachia pɨrabari k'ĩruune ateewãuta jĩra.

¹⁰ Ãchi tu tusõre tu k'umia bɨ jĩra beasima. Ãchi tudepa k'aauta p'ue jedek'o k'ak'o joesoma ãarea ẽpẽerã p'uapidayá p'anasima.

¹¹ Mãɨ sisi poro jũra jɨ̃parí jɨ̃ bɨpa chi uria minachia bɨ ak'ɨparima. Ichi t'ɨ̃ hebreo pedeade Abadón apatama. Griego pedeade Apolión apatama.

¹² Chi naapema minachia mĩanai jarada jõsima, maamina mãicha ume p'anɨma.

¹³ Mãɨya nak'ari abaɨ Tachi Ak'õrepa ɨt'aripa peedapa ichi ãnimara k'achu chaasima. Mãɨne chi Tachi Ak'õre k'ĩrari incienso k'era paateapataɨ nee ooda k'achu k'ĩmari p'anɨnepa abaɨ pedea bɨt'a mɨa ũrisima.

¹⁴ Chi pedeadapa chi Tachi Ak'õrepa ɨt'aripa chi ãnimara k'achu chaadá nãɨya jarasima: «Chi Tachi Ak'õrepa ɨt'aripa peedaɨrã k'ĩmari p'anɨ ẽrase chi to waibɨa bɨ Éup'rate apataɨmá jɨ̃ nɨbɨt'a».

¹⁵ Ara mãɨne ichia mãɨ k'ĩmari p'anɨ ẽrasima chi nãɨ ĩjũane be perá estarik'a pait'ea k'enanamẽrá. Tachi Ak'õrepa ãchi uru basima ara mãɨ ãyone, ara mãɨ jedek'ode, ara mãɨ ewaride mãɨya k'enanamẽrá.

¹⁶ Mãɨne mɨa ũrisima abaɨpa jara bɨt'a chi papaká be chi mũrane wãpataɨrã dosciento millón p'anɨt'a.

¹⁷ Chi mũra mɨa k'ãmok'araade ununa nãɨya beasima: ãchi poro imama poro jĩra beasima. Ichi it'aedepa azup're, nãri mãɨnepa t'ɨpɨ urua che nɨbasima. Chi mãɨ ãchi ɨ̃rɨ suak'abari p'ananapa ãchi k'ak'uade ne chaarea bɨ jɨ̃ p'anasima. Mãɨ ne chaarea bɨ p'urea t'ɨpɨ tau jĩra basima, zap'iro mawara chi p'ap'ãrá k'ĩrajá basima mãɨnepa azup're mawara k'uará basima.

¹⁸ Chi mũra ok'arradepa t'ɨpɨ urua chedapa, nãri chedapa mãɨnepa azup're chedapa chi nãɨ ĩjũane be perá estarik'a pait'ea k'enasima.

¹⁹ Mãɨ mũra chi mesãrá chi it'aede mãɨnepa chi tude beasima. Ãchi tu taama jĩra beasima. Mãɨ chi tu poro pará bɨdepa ẽpẽerã k'aadak'ari maapae peapachidama.

²⁰ Chi ẽpẽerã mãɨ mãɨya badadepa piudadawẽpa wapida ãchia nemietá oodai mãɨnepa tiorerãne ĩjãanai itu bɨdaé pasima. Juapa oodada sãdo itu bɨdaé pasima: chi nee ooda, p'arat'a ooda, bronce ooda, mawara ooda mãɨnepa pak'uru ooda mãɨrã ãarea itu bɨdaé pasima. Mãɨrã ãstu ununak'ama, ũrinak'ama, mãɨnepa wãnak'ama.

²¹ Mãɨnepa ẽpẽra mĩa peapataɨ, waapẽarã nɨɨpataɨ, tachi k'ak'uadepa nemietá oopataɨ mãɨnepa nechɨapataɨ itu bɨdaé pasima.