Apocalipsi 8 - Tachi Ak'õre Pedea

Chi k'art'a k'ara bada k'aadea oet'aada

¹ Chi Oveja Chak'epa chi k'aadea k'art'a k'ara bada oet'aside, chi pajã miká k'ĩup'ea beesima.

² Mãɨya nak'ari mɨa chi Tachi Ak'õrepa ɨt'aripa peedaɨrã ichi naa bai nɨp'anɨt'a unusima. Ãnimara k'achu siete ãchiá teasima.

³ Mãɨne mãicha Tachi Ak'õrepa ɨt'aripa peeda chek'ari chi Tachi Ak'õre suak'a beeparí auk'ará bɨ naa bai nɨbeesima. Ichi juade p'arat'u jãjoa nee ooda aba uru basima chi incienso k'era pai k'orea. Abaɨpa ichiá incienso k'era minachia teasima Tachi Ak'õre pae paamerá, chi Tachi Ak'õre ẽpẽerã ɨt'aa chiidimaa p'anɨmisa. Ara mãɨne ichia incienso k'era chi k'era paapataɨ ɨ̃rɨ paasima.

⁴ Chi ichi juade p'arat'u nee oodade incienso k'era paada nãri ɨt'aa chi p'iumá Tachi Ak'õremá wã nɨbasima, chi ẽpẽerãpa ɨt'aa chiididada paara.

⁵ Mãɨpuru chi Tachi Ak'õrepa ɨt'aripa peeda chi p'arat'u jitak'ari, ok'ĩtau chi incienso k'era paapataɨde jɨrɨp'ek'ari maapae chi p'arat'u ipirupisima. Chi ok'ĩtau ĩjũane bat'ak'oasima. Mãɨpa pa ɨbɨa baesima, pa minachia ɨrɨterrea wã nɨbeesima, pa wiwirá bae nɨbeesima mãɨnepa nãɨ ĩjũa ore nɨbeesima.

Tachi Ak'õrepa ɨt'aripa peedaɨrãpa ãnimara k'achu chaadada

⁶ Maapae chi Tachi Ak'õrepa ɨt'aripa peedaɨrã siete p'anɨpa oosidama ãchi ãnimara k'achu siete p'anɨ chaadai k'orea.

⁷ Chi naa bɨpa ichi ãnimara k'achu chaasima. Mãɨnepa t'ɨpɨ oa pará ará p'uerada nãɨ ĩjũanea baesima. Mãɨpa nãɨ ĩjũa mãɨnepa pak'uru perá estarik'a pait'ea paawãsima. Mãɨnepa sirua ãarea paawãsima.

⁸ Mãɨya bak'ari mãɨ ɨ̃aripema Tachi Ak'õrepa ɨt'aripa peedapa ichi ãnimara k'achu chaasima. Ara mãɨne eya minachia urua bɨ chi p'usadea bat'a peesima. Mãɨpa p'usa perá estarik'a pait'ea oa papisima.

⁹ Mãɨne perá estarik'a pait'ea chi ãnimara p'usade beada piusidama, mãɨnepa perá estarik'a pait'ea chi p'ãp'orro mãma nɨbada ãrisima.

¹⁰ Mãɨya nak'ari abaɨ Tachi Ak'õrepa ɨt'aripa peedapa ichi ãnimara k'achu chaasima. Ara mãɨne k'ãk'ãi waibɨa bɨt'a ĩpira jĩra urua bɨt'a ɨt'aripa baechesima. Perá estarik'a pait'ea toeda mãɨnepa chi to ek'aripa t'ɨ nɨbɨmá baesima.

¹¹ Mãɨ k'ãk'ãi t'ɨ̃ nãɨpɨ: “Asia Bɨ”. Chi baedamá chi pania ãarea asia beesima. Mãɨ panianepa ẽpẽerã minachia piusidama.

¹² Mãɨya nak'ari abaɨ Tachi Ak'õrepa ɨt'aripa peedapa ichi ãnimara k'achu chaasima. Ara mãɨne perá estarik'a pait'ea chi jedek'o mãɨnepa chi ɨmata estarik'a p'ãriosima. Mãɨnepa chi k'ãk'ãi sida perá ichiaba estarik'a p'ãriosidama. Mãɨpuru chi ewari mãɨnepa teamasi perá estarik'a pait'ea p'ãriosima.

¹³ Mãɨne mɨa ɨt'aa ak'ɨside ũrisima nejõpɨ́ ɨt'ɨ wãamarimaa bɨpa jĩk'ua jara bɨt'a: «¡Sõk'achiadaipɨ! ¡Sõk'achiadaipɨ! ¡Sõk'achiadaipɨ! Chi nãɨ ĩjũane tuanurã ẽpẽerã sõk'achiadaipɨ, Tachi Ak'õrepa ɨt'aripa peedaɨrã chi k'aadea ũpea p'anɨpa ãchi ãnimara k'achu chaautade».