Apocalipsi 7 - Tachi Ak'õre Pedea

Chi Tachi Ak'õre pae mimiapataɨrã tau bɨɨrɨde tauchaada

¹ Mãɨya nak'ari mɨa Tachi Ak'õrepa ɨt'aripa peedaɨrã k'ĩmari unusima. Chi nãɨ ĩjũane bai nɨp'anasima tejã ik'idá ãchi k'ak'awá bai nɨp'anɨ jĩra. Ãchia chi nãua jãrap'et'apidaé pasima, nãɨ ĩjũane, chi p'usade ni pak'urude pida.

² Tachi Ak'õrepa ãchiá jua chaarea teasima nãɨ ĩjũa mãɨnepa p'usa ãrinamẽrá. Mãɨne mɨa unusima chi abaɨ Tachi Ak'õrepa ɨt'aripa peeda chi ɨmata ochiaparidepa cherut'a. Mãɨpa chi chok'ae bɨ Tachi Ak'õre señal bɨpari uru basima. Ichia Tachi Ak'õrepa ɨt'aripa peedaɨrã k'ĩmari p'anɨa nãɨya jĩk'ua jarasima:

³ «Nãɨ ĩjũa ãrirãt'ɨ, chi p'usa sida, ni pak'uru sida mãɨ taipa chi Tachi Ak'õre pae mimiapataɨrã ãarea ãchi tau bɨɨrɨde tauchaautadea».

⁴ Mãɨne mɨa ũrisima chi Tachi Ak'õrené tauchaa be jõmasã́ p'anɨt'a. 144 mil p'anasidama. Mãɨ ãarea Israeldepemarãnepa chedada pasima.

⁵ Israel warra Judadepa chedada doce mil p'anasidama. Rubenepa chedada doce mil p'anasidama. Gadepa chedada doce mil p'anasidama.

⁶ Aserdepa chedada doce mil p'anasidama. Nep'talidepa chedada doce mil p'anasidama. Manasedepa chedada doce mil p'anasidama.

⁷ Simeonepa chedada doce mil p'anasidama. Levidepa chedada doce mil p'anasidama. Isacaradepa chedada doce mil p'anasidama.

⁸ Zabulonepa chedada doce mil p'anasidama. Josedepa chedada doce mil p'anasidama. Mãɨnepa Benjaminepa chedada doce mil p'anasidama.

Ẽpẽerã chok'ará Tachi Ak'õre k'ĩrari be

⁹ Mãɨya nak'ari mãicha k'ãmok'araa jĩra mɨa ẽpẽerã minachia nɨbɨt'a unusima. Abaɨ pida ãchi p'ue joisiadaé pasima. Ĩjũachapema, p'uuruchapema, ẽpẽerã awaraɨrãchapema mãɨnepa pedeachapema mãma tuanasidama. Ãarea neet'á t'ot'oa jɨ̃ beasima, mãɨnepa ãchi sõpia p'anɨnepa ãchi juade meme k'irú uru p'anasima. Ãchi bai nɨp'anasima chi suak'a beeparí auk'ará bɨ naa mãɨnepa chi Oveja Chak'e k'ede naa.

¹⁰ Mãɨne ãareaɨrãpa nãɨya ɨbɨa jarasidama: «¡Tai Ak'õre chi nãɨ suak'a beeparí auk'ará bɨde suak'abari bɨpa mãɨnepa chi Oveja Chak'epa tai k'aripasidama!»

¹¹ Mãɨne chi ẽpẽra jĩra k'ĩmari chok'ae p'anɨ mãɨnepa chi chõarã veinticuatro p'anɨ chi suak'a beeparí auk'ará bɨmá jũra p'anasima. Chi Tachi Ak'õrepa ɨt'aripa peedaɨrã ãarea ãchi ik'idá jũra bai nɨp'anasima. Mãɨne ãarea sĩraporode k'op'aneesidama, mãɨnepa chi suak'a beeparí auk'ará bɨ naa ãchi tau bɨɨrɨ ĩjũane k'op'aneenak'ari maapae Tachi Ak'õre minachia k'ɨ̃riasidama.

¹² Nãɨya jarasidama: «¡Mãɨya beese! Ewaricha Tachi Ak'õrea pia pedeadai p'anɨma ichi chi atepe bɨ pẽra, ichi chi k'ɨ̃risia atepe bɨẽra, ichia ne ãarea p'uepari pẽra, mãɨnepa minachia jua chaarea bɨ pẽra. Ichiá sõpia bɨade adai p'anɨma mãɨnepa minachia pia bɨade adai p'anɨma. ¡Mãɨya beese!»

¹³ Maapae chõarã veinticuatro p'anɨnepema abaɨ pida mɨá ɨt'aa chiidisima: —¿Jãɨrã neet'á t'ot'oa jɨ̃ bet'a k'aima? ¿Sãmãɨpa chesidama?

¹⁴ Mɨa p'anoosima: “Pɨapuru k'awa bɨma”. Mãɨne ichia jarasima: —Nãɨ ẽpẽerã chi k'aadeapema ewari minachia nemietá bɨdepema k'aripasima. Chi Oveja Chak'e oadepa ãchi neet'á t'ot'oa sɨɨ p'anasidama.

¹⁵ Mãɨpuru Tachi Ak'õre suak'a beeparí auk'ará bɨ k'ĩrari p'anɨma. Ãst'á mãɨnepa teamasi pida Tachi Ak'õre tede ichi pae ne oopatama. Mãɨ suak'a beeparí auk'ará bɨde suak'abari bɨ ãchi ome baipɨ.

¹⁶ Ewariaba pida waa jarrapisidaiwẽma mãɨnepa waa opisiadaiwẽma. Ɨmatapa mãɨya waa paaiwẽma mãɨnepa chi pisia sida waa ãchi ɨ̃rɨ baiwẽma.

¹⁷ Chi suak'a beeparí auk'ará bɨde Oveja Chak'epa ãchi ak'ɨ baipɨ. Ãchi ateewãipɨ chi pania tachi chok'ae bapiparí t'ɨ nɨbɨmá mãɨ todamẽrá. Mãɨ ewaride Tachi Ak'õrepa ãchi tauba ãarea p'oapiipɨ.