Apocalipsi 6 - Tachi Ak'õre Pedea

Chi siete k'art'ade k'ara bada mãɨnepema sei oet'ada

¹ Mãɨne mɨa unusima chi Oveja Chak'epa chi k'art'ade k'ara bada aba oet'asit'a. Mãɨnepa chi ẽpẽra jĩra chok'ae be k'ĩmari p'anɨnepema chi abaɨpa nãɨya jara bɨt'a ũrisima: «¡Chese!» Chi pedea pa pedea jĩra basima.

² Mãɨ mãmá ak'ɨside, mũra t'ot'oa bɨt'a unusima. Chi mãɨ mũra ɨ̃rɨ suak'abari bɨpa sia jĩra bɨt'a uru basima. Abaɨpa ichiá poro jũra jɨ̃parí teasima. Ara mãɨne waapẽarã jõma p'uek'ari, mãicha waapẽarã jõma p'ueyá wãsima.

³ Mãɨya nak'ari chi Oveja Chak'epa mãicha chi k'art'ade k'ara bada aba oet'aside, chi ẽpẽra jĩra chok'ae be k'ĩmari p'anɨnepema chi abaɨpa nãɨya jara bɨt'a ũrisima: «¡Chese!».

⁴ Mãɨ mãmá ak'ɨside mũra p'urea bɨt'a unusima. Abaɨpa k'ĩruuparí nek'o waibɨa bɨt'a teasima chi mũra ɨ̃rɨ suak'abari bɨa. Tachi Ak'õrepa ichiá chi nãɨ ĩjũane ẽpẽerã ará sõpia p'anɨrã nemietá itu oopisima ara ãstu chi jõ nɨbamẽrá mãɨ k'ĩruupik'a nɨbɨdepa.

⁵ Mãɨya nak'ari chi Oveja Chak'epa mãicha chi k'art'ade k'ara bada aba oet'aside, chi ẽpẽra jĩra chok'ae be k'ĩmari p'anɨnepema chi abaɨpa nãɨya jara bɨt'a ũrisima: «¡Chese!». Mãmá ak'ɨside mũra p'aimá bɨt'a unusima. Mãɨ mũra ɨ̃rɨ suak'abari bɨpa ne chaapataɨ ichi juade uru basima.

⁶ Mãɨne mɨa chi ẽpẽra jĩra k'ĩmari chok'ae p'anɨ t'ãenaɨpa abaɨpa pedea bɨt'a ũrisima. Mãɨpa chi mũra ɨ̃rɨ suak'abari bɨa nãɨya jarasima: «Chi trigo itu pia chaupirãse. Mãɨya trigo libra ume netoi k'orea ẽpẽra ewari aba mimiai bɨma. Cebada sida itu pia chaupirãse. Mãɨya cebada sei libra netoi k'orea ẽpẽra ewari aba mimiai bɨma. Maamina olivojõ mãɨnepa uvajõ itu pia chaupise, mãɨya olivo taa mãɨnepa uvaba uru p'ananamẽrá».

⁷ Mãɨya nak'ari chi Oveja Chak'epa mãicha chi k'art'ade k'ara bada aba oet'aside, chi ẽpẽra jĩra chok'ae be k'ĩmari p'anɨnepema chi abaɨpa nãɨya jara bɨt'a ũrisima: «¡Chese!».

⁸ Mãmá ak'ɨside mũra k'uará bɨt'a unusima. Chi mũra ɨ̃rɨ suak'abari bɨa «Chi Piuda» apatama. Chi ichi ome p'ɨrrɨa bɨa «Chi Piudaadarã P'anapataɨ» apatama. Tachi Ak'õrepa ãchiá chi k'ĩmarinepema abaabá ãarea peapade asima nãɨ ĩjũa ãareaɨne. Mãɨ ẽpẽerã peadayade asima ãchia k'ĩruupik'a p'anɨnepa, jarradepa, k'ɨdade p'anɨnepa ichiaba chi ãnimararã mietá p'anɨrãnepa.

⁹ Mãɨya nak'ari chi Oveja Chak'epa mãicha chi k'art'ade k'ara bada aba oet'aside mɨa unusima chi Tachi Ak'õre pedea jaratea p'anɨ k'orea peadaadarã jaore. Ãchi chi Tachi Ak'õre pae ne paateapataɨ pajãne bɨk'á p'anasima.

¹⁰ Nãɨya ɨbɨa jarasidama: «Jõmãɨrã Chipari, pɨ minachia pia bɨma, mãɨnepa pɨ pedea piarãpẽapɨ. ¿Sãapae pɨa chi jãɨ ĩjũanepemarã nepɨra ak'ɨk'ari maapae ɨtɨaima, tai peadada k'orea?»

¹¹ Mãɨrã́ neet'á t'orroa bɨt'a teasima mãɨ jɨ̃namẽrá. Maapae nãɨya jarasima: «Pik'ã́ nɨ p'ananot'ɨ jõma chi mãra ũpẽarã Cristo pae pari mimiapataɨrã peautadea, ẽpẽerãpa ara mãra peadada jĩra».

¹² Mãɨya nak'ari chi Oveja Chak'epa mãicha chi k'art'ade k'ara bada aba oet'aside mãɨne iurumia minachia ɨbɨa chesima. Chi ɨmata p'ãriosima, ẽpẽerã piuutade neet'á p'aimá tachia jɨ̃pata jĩra. Mãɨnepa chi jedek'o p'urea oa jĩra k'obeesima.

¹³ Chi ɨt'aripa k'ãk'ãi ĩjũanea baesidama, higojõ chichiak'á nãupa ɨbɨa p'õat'ɨrupa baepiru jĩra.

¹⁴ K'art'a ará pɨra bɨ jĩra, chi pajã wẽpasima. Mãɨnepa chi eya ãarea, mãɨnepa chi p'usade ĩjũa ãpia p'ɨrra beada chi naa ichi beadamá p'aneenaé pasima.

¹⁵ Maapae chi nãɨ ĩjũanepema chi poro jũra jɨ̃parí jɨ̃ be, chi ãchieri be, chi papaká be, chi ɨbɨa be, chi chaarea be, chi chipari pae pari mimiapataɨrã mãɨnepa chi chipari pae pari mimianak'á be eya uria bɨde mãɨnepa p'ẽya uria be t'ãena mĩrusidama.

¹⁶ Nãɨya jarasidama: «Eya, mawara, tai ɨ̃rɨ baet'ɨ. Tai mẽrat'ɨ chi suak'a beeparí auk'ará bɨde suak'abari bɨa tai unupiemaapa, mãɨnepa chi Oveja Chak'ea ɨtɨapiemaapa.

¹⁷ Chi ichia tachi ɨtɨai ewari waibɨa bɨ cheipɨ. ¿K'aipa mãɨ choaima?»