Apocalipsi 5 - Tachi Ak'õre Pedea

Chi Oveja Chak'e Juanpa ununa

¹ Mãɨnepa mɨa unusima ichi suak'a beeparí auk'ará bɨde suak'a bɨt'a ichi juaraari k'art'a porok'ok'oa pɨrada uru basima. Ara mãɨ k'art'a pɨrada k'ĩracha ne bɨ basima. Mãɨ k'ara bɨde eda k'ara basima k'araparí siete bɨdepa, abaɨ pida mãɨ ewapiemaapa.

² Mãɨne mɨa Tachi Ak'õrepa ɨt'aripema peeda jua chaarea bɨt'a unusima. Ɨbɨa pedea bɨdepa idisima: «¿K'ai pia bɨma nãɨ k'art'a k'ara nɨbɨ oet'aak'ari ewait'a?»

³ Maamina ẽpẽra aba pida newẽ pasima mãɨ k'art'a ewak'ari ya eda jarai k'orea. Pajãne, ĩjũane, mãɨnepa ni chi piudaadarã p'anapataɨmá newẽ pasima.

⁴ Mãɨne mɨ minachia jẽasima mãɨ ẽpẽra pia aba pida newẽ pasi pẽra, mãɨ k'art'a oet'aak'ari eda jarait'a.

⁵ Maamina chi veinticuatro chõarãnepema abaɨpa mɨa mãɨya jarasima: «Waa jẽarãse. Ak'ɨse, Davidepa cheda aba bɨma. Mãɨ chi Imama apataɨ Judadepa chedapa Tachi Ak'õre nek'ĩramá p'uesima. Ichiapuru chi k'ara nɨbɨ siete p'anɨt'a nãɨ k'art'ade p'ue ewaipɨ».

⁶ Mãɨne chi suak'a beeparí auk'ará bɨ taade, chi ẽpẽra jĩra k'ĩmari chok'ae p'anɨ mãɨnepa chi chõarã cuatro p'anɨ estarik'a mɨa Oveja Chak'e bai nɨbɨt'a unusima. Ichi chi peasida jĩra basima. K'achu siete uru basima. Mãɨnepa tau siete uru bɨma. Mãɨ tau siete p'anɨpa jara k'ɨ̃ria p'anɨma chi Tachi Ak'õre naa jaore k'ak'o siete p'anɨt'a. Tachi Ak'õrepa ãchi ãarea nãɨ ĩjũane p'ueparima.

⁷ Mãɨne chi Oveja Chak'e chi Tachi Ak'õre suak'a beeparí auk'ará bɨmá wãk'ari, maapae ichi juaraarapa chi k'art'a jitasima.

⁸ Mãɨ k'art'a jitak'ari chi ẽpẽra jĩra k'ĩmari chok'ae berã mãɨnepa chi chõarã veinticuatro berã ichi naa sĩraporode bari k'op'aneesidama. Ãchi k'ak'awá arpa uru p'anasima mãɨnepa p'arat'u jãjoa bɨ nee ooda uru p'anasima. Chi p'arat'u jãjoa bɨ ãchia incienso k'era ipiru uru p'anasima. Chi incienso k'era jara k'ɨ̃ria bɨma chi ẽpẽerã Tachi Ak'õrenerãpa ichiá ɨt'aa chiidi p'anɨt'a.

⁹ Chi chõarã veinticuatro p'anɨpa mãɨnepa chi ẽpẽra jĩra chok'ae berãpa nãɨ k'ari chiwidit'a k'arisidama: «Pɨ pia bɨma mãɨ k'art'a jitak'ari chi k'ara nɨbɨ oet'ait'a, pɨ peasida pẽra. Chi mãɨ oa pɨa ãrisidepa ẽpẽerã Tachi Ak'õre pae atasima. Ẽpẽerã awaraɨcha, pedeacha, p'uurucha mãɨnepa ĩjũacha mãɨrãnepema eda waapẽarã atasima.

¹⁰ Pɨa ãchi bɨsima p'aarerã Tachi Ak'õrené p'ananamẽrá. Mãɨnepa nãɨ ĩjũane ichi ome poro jũra jɨ̃parí jɨ̃ p'anɨrã p'ananaipɨ».

¹¹ Mãɨya bɨde mɨa chi Tachi Ak'õrepa peedaɨrã ɨt'aripema k'ari p'anɨ ũrisima. Minachia p'anɨẽra mɨa p'ue joisiaé pasima. Ãchi chi Tachi Ak'õre suak'a beeparí auk'ará bɨt'a, chi ẽpẽra jĩra chok'ae berã mãɨnepa chi veinticuatro chõarã p'anɨt'a jũra p'anasima.

¹² Nãɨya jĩk'ua k'ari p'anasidama: «¡Chi Oveja Chak'e peadada minachia pia bɨma! Ãareaɨrãpa pia pedeadai p'anɨma ichit'a mãɨ ichia ãarea jõma p'ue bɨẽra, mãɨnepa ãarea uru bɨẽra, mãɨnepa ãarea k'awa bɨẽra mãɨnepa jua chaarea bɨẽra. Ichit'u chi atepe bɨade a jaradai p'anɨma mãɨnepa chi piipará bɨade a jaradai p'anɨma».

¹³ Mãɨne mɨa ũrisima jõma Tachi Ak'õrepa ooda pajãne bepa, nãɨ ĩjũane bepa, piudaadarã jaorepa, p'usade be pida nãɨya k'ari p'anɨ: «Ãareaɨrãpa pia pedeadai p'anɨma ewaricha chi Tachi Ak'õre suak'a beeparide auk'ará bɨde suak'a bɨa mãɨnepa chi Oveja Chak'e k'edea. Chi atepe pia bɨade adai p'anɨma, minachia auk'ará bɨade adai p'anɨma, mãɨnepa ichi juade nejõma p'ue uru bait'a pia bɨade adai p'anɨma».

¹⁴ Maapae chi ẽpẽra jĩra k'ĩmari chok'ae berãpa nãɨya jarasidama: «Pia bɨma mãɨya bait'a». Ara mãɨne chi chõarã veinticuatro p'anɨ sĩraporode k'op'aneenak'ari chi ewaricha chok'ae bɨa pia pedeasidama.