Apocalipsi 4 - Tachi Ak'õre Pedea

Chi ɨt'aripemarãpa Tachi Ak'õre k'ɨ̃ria p'anana

¹ Mãɨya nak'ari mɨa k'ãmok'araa jĩra unusima pajãne eda wãpataɨ ewa nɨbɨt'a. Mãɨne mɨa ãnimara k'achu pedea jĩra naena ũri badapa jarasima: «Nãma ɨt'aa chese. Mɨa pɨá unupiipɨ nãɨ ewari cherude chi mãɨ ne bai bɨt'a».

² Ara mãɨne mɨ Tachi Ak'õre Jaorede beek'ari, suak'a beeparí auk'ará bɨt'a pajãne unusima. Mãɨ ɨ̃rɨ aba suak'abari basima.

³ Chi mãɨne suak'abari bada jaspe mawara jĩra achiterrea basima mãɨnepa k'oralina jĩra. Chi suak'a beeparí auk'ará bɨ ik'idá iuma jũra uru basima. Chi iuma esmeralda mawara jĩra achiterrea basima.

⁴ Mãɨnepa veinticuatro suak'a beeparí auk'ará p'anɨt'a jũra p'anasima. Chi mãɨ ɨ̃rɨ suak'a p'anasima chi chõarã 24 p'anɨt'a. Ãchi neet'á t'ot'oa beasima. Mãɨnepa poro jũra jɨ̃parí nee ooda jɨ̃ p'anasima.

⁵ Ara mãɨya bɨde mãmãɨpa chi tachi Ak'õre suak'a beeparí auk'ará bɨ estarik'aɨpa pa wiwiraasima, mãɨ pa ɨɨrɨa nɨbeesima, mãɨnepa ɨbɨa minachia jĩk'ua bae nɨbeesima. Mãɨ chi suak'a beeparí naa laap'ara k'ak'o siete urua nɨbasima. Mãɨ Tachi Ak'õre naa chi siete p'anɨ jaorerã mãɨ laap'ararãpɨ.

⁶ Mãɨ chi suak'a beeparí auk'ará bɨ naa p'usa jĩra p'ap'ãrá basima. Mãɨ tot'á vidrio jĩra basima. Chi suak'a beeparí juaraari, juawieri, ãpɨtea, mãɨnepa ichi k'ĩrari ẽpẽra jĩra k'ĩmari chok'ae p'anɨt'a p'anasima. Ãchi tau k'ak'ua ãarea bae beasima, ãchi p'echude mãɨnepa ep'alatade.

⁷ Aba imama jĩra basima. Aba p'ak'a jĩra basima. Aba ẽpẽra k'ĩra uru basima. Mãɨnepa aba nejõpɨ́ wãamarimaa bɨ jĩra basima.

⁸ Chi mãɨrã ãchi k'ak'awá ĩk'arra sei uru beasima. Ãchi k'ak'ua ãarea tau pará beasima. Chi ĩk'arra ek'ari pida tau ãarea beasima. Ãst'á mãɨnepa teamasi pida sẽnawẽa pedeadepa nãɨya jarapachidama: «Minachia pia bɨma, minachia pia bɨma, minachia pia bɨma Tachi Chipari, chi Ne Ãarea P'ue Bɨ Tachi Ak'õre». Ichipɨ, ichi naena basima mãɨnepa ichi chei bɨpɨ.

^9-10 Chi Tachi Ak'õre ewaricha chok'ae bɨ chi ichi suak'a beeparí auk'ará bɨde suak'a bɨma. Ara mãɨne chi ẽpẽra jĩra chok'ae bepa jara p'anɨma ichi auk'ará bɨma, ichiá pia pedea p'anɨma mãɨnepa ichiá sõpia p'anɨane a p'anɨma. Mãɨ jarautacha chi chõarã 24 p'anɨpa Tachi Ak'õre naa sĩraporode k'op'aneenak'ari chi ewaricha chok'ae bɨa pia bɨade apatama. Ãchi poro jũra jɨ̃pataɨ wẽanak'ari chi suak'a beeparí auk'ará bɨ taade bɨdak'ari nãɨya jarapatama:

¹¹ Tachi Chipari, Tachi Ak'õre, pɨ pia bɨma jõmãɨrãpa minachia pia bɨade adamẽrá, pɨ wap'eadamẽrá mãɨnepa ãarea p'ue ooyade adamẽrá. Pɨa nejõma ooda pẽra pia bɨma jõmãɨrãpa mãɨya jaradaipɨ. Piarã pɨa k'ɨ̃riana pẽra nejõma oosima mãɨnepa nejõma pɨdepa bɨma.