Apocalipsi 3 - Tachi Ak'õre Pedea

Cristopa ũpẽarã Sardi p'uurudepema pae bɨpida

¹ »Chi Sardi p'uurudepema ũpẽarã ak'ɨparí Tachi Ak'õrepa ɨt'aripa peeda pae k'art'a nãɨya bɨse: »Chi Tachi Ak'õre k'ĩrari jaore siete uru bɨpa mãɨnepa k'ãk'ãi siete uru bɨpa nãɨya jara bɨma: »Mãrapa oo p'anɨt'a mɨa k'awa bɨma. Ẽpẽerãpa jara p'anɨma mãrapa Tachi Ak'õre minachia ĩjãa p'anɨ pẽra chok'ae bet'a. Maamina piarã ara mãrapa Tachi Ak'õrene ĩjãanawẽa p'anɨ pẽra chi piudaadarãpɨ.

² ¡Jĩrak'aua p'anat'ɨ! Mɨa unu bɨma mãrapa oo p'anɨ Tachi Ak'õre k'ĩrari jĩp'a bɨwẽt'a. Mãrapa nepia oo p'anɨt'a perá jõma itu bɨmaa p'anɨma. Maamina chi ãareawẽa bɨt'a mãicha jõma oot'ɨ.

³ Chi piarãpẽa pedea mãrapa ũrinana k'ɨ̃risia p'anat'ɨ. Mãɨne pia ĩjãat'ɨ. Nemietá itu bɨdak'ari Tachi Ak'õremá chet'ɨ. Mãra taujĩra p'ananaepɨra mɨ cheipɨ mãra ɨtɨai k'orea chi nechɨaparí atua nɨbɨde chepari jĩra.

⁴ Maamina mãra Sardidepemarã chi eda ãpia p'anɨnepema waidi nemietaade nipadawẽma, mãra neet'á jayoapidawẽa p'anɨ jĩra. Mɨ ome pia p'ananai k'orea p'anɨ pẽra, neet'á t'ot'oa jɨ̃nak'ari mɨ ome ará nipadaipɨ.

⁵ Nemietá p'uedaadapa ara mãɨ jĩra neet'á t'ot'oa bɨt'a jɨ̃naipɨ. Ãchi t'ɨ̃ chi ewaricha chok'ae p'ananai k'art'ade eda bɨ bɨ pẽra mɨa ãchi t'ɨ̃ wẽpapiiwẽma. Maawẽapuru mɨ Ak'õre k'ĩrari, mãɨnepa ichi pae pari mimiapataɨrã pajãnepema k'ĩrari ãchi mõréane aipɨ.

⁶ Chi k'ɨɨrɨ pará bɨpa ũrise Tachi Ak'õre Jaorepa ũpẽarã́ jara bɨt'a.

Cristopa ũpẽarã P'iladelp'ia p'uurudepema pae bɨpida

⁷ »Chi P'iladelp'ia p'uurudepema ũpẽarã ak'ɨparí Tachi Ak'õrepa ɨt'aripa peeda pae k'art'ade nãɨya bɨse: »Ichi chi Tachi Ak'õre Paepuru Bɨ mãɨnepa chi Piarã Pedea Aba Bɨ, chi Daví p'uuru minachia k'awa bɨpɨ. Chi ichia ewaru mi ãpia pida p'ue serraiwẽma. Ichia serraru mi ãpia pida p'ue ewaiwẽma.

⁸ Nãɨya jara bɨma: »Mãrapa oo p'anɨt'a mɨa k'awa bɨma. ¡Ũrit'ɨ! Eda wãpataɨ mɨa mãra naa ewa nɨbɨsima. Mãɨ abaɨ pida p'ue serraiwẽma. Mãra ãpia chaareawẽa p'anɨmina mɨ pedea minachia ĩjãa p'anɨma. Mɨ itu bɨdawẽa p'anɨma.

⁹ ¡Ũrit'ɨ! Mãra jĩru k'ait'a mɨa tioredé ẽpẽerã sĩraporode k'op'aneepiipɨ. Ãchi Tachi Ak'õrené ẽpẽerãane apatamina mãɨyawẽma. Ãchi chi sea p'anɨma. K'awadaipɨ mɨa mãra k'ɨ̃ria bɨt'a.

¹⁰ Mãra mɨ k'orea minachia mĩa p'anɨt'a ãarea choa p'anɨma mɨa jarada jĩra. Mãɨpuru nãɨ ĩjũanepemarã minachia mĩanai ewari cherude mɨa mãra ak'ɨipɨ. Mãɨ ewaride mɨa jõma nãɨ ĩjũane tuanurã minachia mĩapiipɨ, sãmaasã́ oodai k'awayá.

¹¹ Mɨ tãaraawẽa bɨde cheipɨ. Mãɨpuru choa p'anat'ɨ mɨne ĩjãa p'anɨnepa. Mãɨya abaɨ pida mãra porode jũra jɨ̃parí ẽemariiwẽma.

¹² Nemietá p'uedaadá mɨa Tachi Ak'õre te jĩru jĩra bɨipɨ. Mãɨya mãɨ tedepema ãyá ewariaba pida wãnaiwẽma. Ãchi tau bɨɨrɨde mɨ Ak'õre t'ɨ̃ bɨipɨ ichidirã k'awapiyá. Ichiaba ãchi tau bɨɨrɨde mɨ Ak'õre p'uuru t'ɨ̃ bɨipɨ mãmanepemarã k'awapiyá. Mãɨ Jerusalén P'uuru chiwidi apataɨ pajãnepa mɨ Ak'õre bɨmãɨpa cheipɨ. Mãɨnepa ãchi tau bɨɨrɨde mɨ t'ɨ̃ chiwidi bɨipɨ mõré k'awapiyá.

¹³ Chi k'ɨɨrɨ pará bɨpa ũrise Tachi Ak'õre Jaorepa ũpẽarã́ jara bɨt'a.

Cristopa ũpẽarã Laodicea p'uurudepema pae bɨpida

¹⁴ »Chi Laodicea p'uurudepema ũpẽarã ak'ɨparí Tachi Ak'õrepa ɨt'aripa peeda pae k'art'ade nãɨya bɨse: »Chi Piarãpẽa Pedea apataɨpa Tachi Ak'õre k'orea piarã jõma arí jaraparima. Ichidepa Tachi Ak'õrepa nejõma oosima. Ichia nãɨya jara bɨma:

¹⁵ »Mãrapa oo p'anɨt'a mɨa k'awa bɨma. Mɨ itu bɨdawẽa p'anɨma maamina mãra sõnepa mɨ ome wãnawẽa p'anɨma. Mãɨya pania k'õresã́ jĩra p'anɨwẽma mãɨnepa pania wãsia jĩra p'anɨwẽma. Sõnepa piarã k'aade wãnaepɨra, mɨmá pia bai pasima mɨ ome nipadaiwẽt'a.

¹⁶ Maamina mãra pania jɨ̃jɨ̃aria bɨ jĩra p'anɨma; mɨ itu bɨdawẽmina, mãra sõnepa mɨ ome nipadawẽa p'anɨma. Mãɨpuru mɨa mãra iataipɨ, mɨ it'aedepa pania jɨ̃jɨ̃aria bɨ k'ũmaru jĩra.

¹⁷ Ara machi ɨbɨarãane a p'anɨma, ne ãarea uru p'anɨane a p'anɨma, mãɨnepa mãɨ ne ãpia pida newẽawẽa bɨade a p'anɨma. Maamina atua p'anɨma ara machi chichupuria p'anɨt'a, piawẽa p'anɨt'a, nenea p'anɨt'a, tau p'ãrio p'anɨt'a mãɨnepa ãk'adá p'anɨt'a.

¹⁸ Mãɨpuru mɨa mãrá nãɨya ũraaruma: nee chi ichiera t'ɨpɨde torbarida, mãɨ mɨnepa atat'ɨ. Mãɨya mãra piarã ɨbɨa padaipɨ. Mãɨnepa p'aru t'ot'oa be mɨnepa atat'ɨ jɨ̃nai k'orea. Mãɨya mãra ãk'adá p'anana k'orea k'ĩra p'eradaiwẽma. Mãɨnepa mɨnepa nẽará atat'ɨ mãra taude t'aadak'ari pia ununamẽrá.

¹⁹ Chi mɨa k'ɨ̃ria bɨ ẽpẽerã ɨtɨak'ari ũraaparima, mɨ pedea oodamẽrá. Mãɨpuru ya mɨmá chedak'ari machi sõnepa piarã mɨ ome nipat'ɨ.

²⁰ ¡Ũrit'ɨ! Mɨ tede eda wãpataɨde bɨma. Awaraɨdepa t'ɨ̃ bɨma mãrapa ewadak'ari mɨ itu eda wãpidamẽrá. Parituapa mɨ pedea ũrik'ari chi eda wãpataɨ ewaipɨra, mɨ eda wãk'ari ichi ome nek'oipɨ.

²¹ Mɨa nemietá p'ueda pẽra mɨ Ak'õre ome ichi suak'a beeparí auk'ará bɨde suak'abari beesima. Ara mãɨ jĩra nemietá p'uedaadarã mɨ suak'a beeparí auk'ará bɨde mɨ ome suak'abari beepiipɨ.

²² Chi k'ɨɨrɨ pará bɨpa ũrise Tachi Ak'õre Jaorepa ũpẽarã́ jara bɨt'a».