Apocalipsi 22 - Tachi Ak'õre Pedea

Chi to tachi chok'ae p'anapii k'orea bɨda

^1-2 Mãɨya nak'ari Tachi Ak'õrepa ɨt'aripa peedapa to p'ap'ãrá bɨt'a mɨá unupisima. Tot'á basima vidrio jĩra. Mãɨ paniapa tachi chok'ae p'anapiparima. Tachi Ak'õre mãɨnepa chi Oveja Chak'e suak'a beeparí auk'ará bɨdepa mãɨ to p'uurudepema o jet'ea bɨ esa wea bɨma. To ik'idacha pak'uru nejõ tachi chok'ae p'anapiparí basima. Mãɨ pak'uru jedek'ocha chaupari pẽra, ãyone bari k'ak'o doce teaparima. Chi k'irú nẽará jĩra bɨma, tuachadepemarã k'ak'ua pia p'ananamẽrá.

³ Chi Tachi Ak'õrepa mietá bayade a badat'a chi p'uurude nea baipɨ. Tachi Ak'õre mãɨnepa chi Oveja Chak'e suak'a beeparí auk'ará bɨ chi p'uurude baipɨ. Mãma chi Tachi Ak'õre pae pari mimiapataɨrãpa ichiá pia pedeadaipɨ.

⁴ Ichi k'ĩra ununaipɨ mãɨnepa ichi t'ɨ̃ ãchi tau bɨɨrɨde bɨ uru p'ananaipɨ.

⁵ Mãma waa k'iu baiwẽma. Tachi Ak'õre Chiparipa ɨnaapii bɨ pẽra, ĩpirawẽa mãɨnepa ɨmatawẽa ẽpẽerã pia p'ananaipɨ. Ewaricha ãchi ichi ome ará chi poro jũra jɨ̃parí jɨ̃ p'anɨrã p'ananaipɨ.

Cristo tãaraawẽa bɨde chei k'orea bɨda

⁶ Maapae Tachi Ak'õrepa ɨt'aripa peedapa mɨá jarasima: «Jõma nãɨ pedea piarãpɨ mãɨnepa piarã mãɨne p'ue ĩjãanai p'anɨma. Tachi Chiparipa chi ichi pari pedeapataɨrã́ pedeapiparima. Ichiapuru ichi ɨt'aripa peeda peesima chi ichi pae pari mimiapataɨrã́ k'awapimẽrá tãaraawẽa bɨde k'ãre mãɨyait'a».

⁷ Jesupa jarasima: «¡Ũrit'ɨ, mɨ isapea cheipɨ! Chi nãɨ k'art'ade Tachi Ak'õre pari pedeaparí pedea bɨda ĩjãa bɨt'a minachia pia bɨma».

⁸ Mɨ Juanpɨ. Mãɨ ãarea unusima mãɨnepa ũrisima. Mãɨya nak'ari mɨ Tachi Ak'õrepa ɨt'aripa peeda jĩru k'ait'a sĩraporode bedabari k'obeesima pia pedeai k'orea. Mãɨya oosima ichia jõma mãɨ unupida pẽra.

⁹ Maamina ichia jarasima: «Jãɨya oorãse, mãɨpari Tachi Ak'õreapuru pia pedease. Mɨ Tachi Ak'õre pae pari mimiaparipɨ ara pɨ jĩra, ũpẽarã Tachi Ak'õre pari pedeapataɨrã jĩra, mãɨnepa jõma nãɨ k'art'ade jara bɨ ĩjãa be jĩra».

¹⁰ Mãɨnepa jarasima: «Nãɨ k'art'ade bɨ bɨma Tachi Ak'õre pari pedeaparí pedeat'a. Mãɨ mẽra uru barãse tãaraawẽa bɨde ãarea mãɨyai pẽra.

¹¹ Chi nemietá oo bɨt'a itu bɨse ichi waa k'achiade bamẽrá. Chi ne ãareaɨne Tachi Ak'õrepa k'ɨ̃riak'apɨ́ oo bɨt'a itu bɨse ichi mãɨne bamẽrá. Maamina chi jĩp'a oo bɨt'a itu bɨse ewaricha jĩp'a oo bamẽrá. Mãɨnepa chi Tachi Ak'õre pae pia bɨt'a, ewaricha Tachi Ak'õre pae pia bai bɨma.

¹² »¡Ũrit'ɨ, mɨ isapea cheipɨ! Cherude mɨa jõmãɨrã́ ne teade eneemeeipɨ ãchia oodada jĩra.

¹³ Mɨ chi Alp'apɨ mãɨnepa chi Omegapɨ. Mãɨpa jara bɨma mɨ chi Naapemapɨ mãɨnepa chi K'aadeapemapɨ.

¹⁴ »Minachia pia p'anɨma chi neet'á pia sɨɨ uru bet'a. Ãchi p'uurude eda wãnai p'anɨma nejõ tachi chok'ae p'anapiparí jõnai k'orea.

¹⁵ Maamina chi nemietá oopataɨrã, chi ẽpẽra nɨɨpataɨrã, chi k'ĩranejasia oopataɨrã, chi mĩa peapataɨrã, chi juapa oodada sãdode ĩjãapataɨrã, mãɨnepa seajarapataɨrã ãarea awara tuaneenaipɨ.

¹⁶ »Mɨ Jesupɨ. Tachi Ak'õrepa ɨt'aripa peeda peesima mãɨ ãarea ũpẽarã becha jaramẽrá. Mɨ Davidepa chedapɨ, chi ichidepa t'õnapɨ. Mɨ chi ãsã parudepema k'ãk'ãi minachia jẽrat'ĩupariade apatama».

¹⁷ Tachi Ak'õre Jaorepa mãɨnepa chi Oveja Chak'e k'ima atai bɨ pida nãɨya jara p'anɨma: «¡Chese!» Chi mãɨ ũri bɨpa jarai bɨma: «¡Chese!» Chi opisia bɨ chei bɨma, chi pania tachi chok'ae p'anapiparí tomẽrá. Chi mãɨ pania to k'ɨ̃ria bɨpa pari toi bɨma.

¹⁸ Chi nãɨ k'art'ade bɨ bɨma Tachi Ak'õre pari pedeaparí pedeat'a. Chi nãɨ k'art'ade bɨ bɨ ũri berã́ mɨa jararuma: abaɨpa nãɨ k'art'ade bɨ bɨ k'ĩra awara jaraipɨra, Tachi Ak'õrepa chi nãɨ k'art'ade minachia mĩapiyá bɨdapa ara mãɨya minachia mĩapiipɨ.

¹⁹ Mãɨnepa abaɨpa chi nãɨ k'art'ade bɨ bɨdepema pedea aba ãyá bɨipɨra, Tachi Ak'õrepa ichiá chi nejõ tachi chok'ae p'anapiparidepema itu jõpiiwẽma mãɨnepa Tachi Ak'õre p'uurude eda itu wãpiiwẽma. Mãɨ nejõ k'orea, mãɨnepa mãɨ p'uuru k'orea nãɨ k'art'ade bɨ bɨma.

²⁰ Ãarea nãɨ k'art'ade bɨ bɨt'a Jesupa piarãane a bɨma. Nãɨya jara bɨma: «¡Piarã mɨ isapea cheipɨ!» Pia bɨma isapea cheit'a. ¡Chese tai Chipari Jesú!

²¹ Mɨa k'ɨ̃ria bɨma Tachi Chipari Jesupa ichi sõpiadepa jõma mãra k'aripa bait'a. Mãɨya beese.