Apocalipsi 21 - Tachi Ak'õre Pedea

Ĩjũa chiwidi mãɨnepa pajã chiwidi

¹ Mãɨya nak'ari mɨa pajã chiwidi mãɨnepa ĩjũa chiwidi unusima. Mãɨne nãɨ ĩjũa mãɨnepa pajã sida neé pasima. Ichiaba p'usa sida neé pasima.

² Mãɨnepa mɨa unusima Tachi Ak'õre p'uuru, chi Jerusalén chiwidi apataɨ, Tachi Ak'õre bɨmãɨpa pajãnepa edá cherut'a. Mãɨ p'uuru pia basima wẽra k'ima atarude minachia k'ak'apia bɨ jĩra.

³ Maapae mɨa ũrisima abaɨpa Tachi Ak'õre suak'a beeparí auk'ará bɨmãɨpa nãɨya jĩk'ua pedearut'a: «¡Ũrit'ɨ! Idi Tachi Ak'õre ẽpẽerã t'ãena bɨma. Ichi ãchi ome baipɨ. Mãɨne ãchi ichi ẽpẽerã p'ananaipɨ. Piarã ichit'a ãchi Ak'õre paipɨ mãɨnepa ãchi ome baipɨ.

⁴ Ãchi tauba ichia ãarea p'oapiipɨ. Jõma naena bada jõna pẽra waa piudaiwẽma, waa jẽanaiwẽma, waa sõk'achiadaiwẽma mãɨnepa waa sõp'uadaiwẽma».

⁵ Maapae chi suak'a beeparí auk'ará bɨde suak'abari bɨpa nãɨya jarasima: «Mɨa ne ãarea chiwidi oo bɨma». Mãɨnepa nãɨya jarasima: «Chi mɨa jaramaa bɨt'a k'art'ade bɨse piarã pedea pẽra mãɨnepa mãɨne p'ue ĩjãanai p'anɨ pẽra».

⁶ Ichiaba ichia mɨá nãɨya jarasima: «Mɨa ooi badat'a jõma oosima. Mɨ chi Alp'apɨ mãɨnepa chi Omegapɨ. Mãɨpa jara bɨma mɨ chi Naapemapɨ mãɨnepa chi K'aadeapemapɨ. Paritua opisia bɨpɨra, mɨa pania wea bɨt'a pari topiipɨ. Mãɨ paniapa tachi chok'ae p'anapiparima.

⁷ Nemietá p'uedaadarãpa jõma mãɨ atadaipɨ warrapa chi ak'õrené atapari jĩra. Mɨ ãchi Tachi Ak'õre paipɨ mãɨnepa mɨ warrarã p'ananaipɨ.

⁸ Maamina chi mɨ ome wãnai k'orea wap'eapataɨrã, chi mɨne ĩjãanak'apɨɨrã, chi mɨa k'ɨ̃riak'at'a oopataɨrã, chi mĩa peapataɨrã, chi k'ĩranejasia oopataɨrã, chi ẽpẽra nɨɨpataɨrã, chi juapa oodada sãdode ĩjãapataɨrã mãɨnepa chi seajarapataɨrã azup're t'ɨpɨ urua nɨbɨde minachia mĩa p'ananaipɨ. Mãɨ chi bari k'ak'o ume piusiade apatama».

Jerusalén chiwidi

⁹ Maapae Tachi Ak'õrepa ɨt'aripa peedaɨrã p'arat'u jãjoa be siete uru p'anananepema aba mɨmá chesima. Mãɨ Tachi Ak'õrepa ɨt'aripa peedaɨrãpa ãchi p'arat'u jãjoa bede ne siete uru p'ananapa nãɨ ĩjũane be k'aadea minachia mĩapisidama. Chi mɨmá chedapa nãɨya jarasima: «Wãnama. Mɨa chi Oveja Chak'epa k'ima atait'a unupiipɨ».

¹⁰ Ara mãɨne Tachi Ak'õre Jaoredepa bɨde ichia mɨ eya minachia ɨt'ɨ bɨmá ateewãsima. Mãma unupisima Tachi Ak'õre p'uuru chiwidi Jerusalén apataɨ Tachi Ak'õre bɨmãɨpa pajãnepa edá cherut'a.

¹¹ Tachi Ak'õre k'ĩrawãrea achiterrea bɨpa mãɨ p'uuru jẽrat'ĩu basima. Urua basima mawara pia bɨ neepɨa bɨ jĩra, jaspe mawara jĩra. Tot'á basima vidrio jĩra.

¹² Mãɨ p'uuru ɨt'ɨ mawarapa audu jũk'a basima. Eda wãpataɨ doce p'anasidama. Eda wãpataɨcha Tachi Ak'õrepa ɨt'aripa peeda aba basima. Mãɨ awara Israel warrarã doce p'anana t'ɨ̃ eda wãpataɨcha aba bɨ basima.

¹³ Chi ɨmata ochiaparieri eda wãpataɨ ũpea p'anasidama, chi ɨmata baeparieri eda wãpataɨ ũpea p'anasidama, chi k'ĩrari eda wãpataɨ ũpea p'anasidama, mãɨnepa chi ãpɨte eda wãpataɨ ũpea p'anasidama.

¹⁴ Mãɨ p'uuru audu jũk'a bɨ doce mawara ɨ̃rɨ basima. Mawaracha chi Oveja Chak'epa doce peedaɨrã t'ɨ̃ aba bɨ basima.

¹⁵ Tachi Ak'õrepa ɨt'aripa peeda mɨ ome pedea badapa ĩjũa chaapataɨ nee ooda uru basima. P'uuru, chi eda wãpataɨ, p'uuru audu jũk'a bɨ sida chaai k'orea uru basima.

¹⁶ Mãɨ ĩjũa chaapataɨpa Tachi Ak'õrepa ɨt'aripa peedapa p'uuru chaasima. Chi p'uuru chaada ãarea abarik'a basima. Chi teesoa, chi jet'ea sida abarik'a basima. Chi chaada 2.200 kilómetro basima. Chi teesoa, chi ɨt'ɨ, chi jet'ea sida ãarea abarik'a basima.

¹⁷ Maapae chi p'uuru audu jũk'a bɨ sida chaasima. Chi chaada jua chaama 144 basima. Nãɨ ĩjũanepemarãpa chaapata jĩra Tachi Ak'õrepa ɨt'aripa peedapa chaasima.

¹⁸ Mãɨ p'uuru ãarea nee chi chiarapa ooda pasima. Mãɨ vidrio tot'á bɨ jĩra basima. Chi p'uuru audu jũk'a bɨ jaspe mawarapa k'ada pasima.

¹⁹ Mãɨ audu jũk'a bɨ doce mawara ɨ̃rɨ basima. Mãɨ mawara ãarea pia beasima. Chi naapema jaspe mawara pasima. Mãɨ ɨ̃ari zap'iro mawara pasima. Mãɨ ɨ̃ari ágata mawara pasima. Mãɨ ɨ̃ari esmeralda mawara pasima.

²⁰ Mãɨ ɨ̃ari ónice mawara pasima. Mãɨ ɨ̃ari cornalina mawara pasima. Mãɨ ɨ̃ari crisólito mawara pasima. Mãɨ ɨ̃ari berilo mawara pasima. Mãɨ ɨ̃ari topacio mawara pasima. Mãɨ ɨ̃ari crisopraso mawara pasima. Mãɨ ɨ̃ari jacinto mawara pasima. K'aadea amatista mawara pasima.

²¹ Mãɨ p'uurude eda wãpataɨ doce p'anɨ ne achiterrea be ooda pasima. Mãɨ mawara achiterrea be abapuru ooda pasima. Chi o p'uuru esa bɨ nee chiarapa ooda pasima. Mãɨ tot'á basima vidrio jĩra.

²² Mãɨ p'uurude Tachi Ak'õre te minachia bɨt'a mɨa unué pasima newẽ pẽra. Tachi Chipari, chi Ne Ãarea P'ue Bɨ Tachi Ak'õre k'ĩrari mãɨnepa Oveja Chak'e k'ĩrari ẽpẽerãpa pia pedeadaipɨ ichi te atepe bɨde oopachida jĩra.

²³ Ɨmata mãɨnepa jedek'o newẽa mãɨ p'uuru ɨnaa baparima, Tachi Ak'õre achiterreapa mãɨ ɨnaa bapipari pẽra, mãɨnepa chi Oveja Chak'epa jẽrat'ĩu bapipari pẽra.

²⁴ Mãɨ p'uuru ɨnaapa tuacha ɨnaa p'ananaipɨ jõmãɨrã chi ɨnaane nipadamẽrá. Mãɨnepa tuachadepema poro jũra jɨ̃parí jɨ̃ p'anɨrãpa nepia uru p'anɨt'a chi p'uurudea ateewãnaipɨ.

²⁵ Mãma waa ewari teamasi nea pai pẽra, mãɨ p'uurude eda wãpataɨ ewaricha ewa nɨbaipɨ.

²⁶ Ãarea tuachadepemarãpa nepia uru p'anɨt'a mãɨ p'uurudea ateewãnaipɨ.

²⁷ Maamina ãarea chi Tachi Ak'õrepa pia unuk'apɨ́ chi p'uurude eda p'ue ateewãnaiwẽma. Chi nemietá oopataɨrã mãɨnepa chi seajarapataɨrã eda wãnaiwẽma. Abapuru chi ewaricha chok'ae p'ananai k'art'ade chi t'ɨ̃ bɨ berã mãɨrã p'ue eda wãnaipɨ. Mãɨ k'art'a chi Oveja Chak'epa uru bɨma.