Apocalipsi 2 - Tachi Ak'õre Pedea

Cristopa ũpẽarã Ép'eso p'uurudepemarã pae bɨpida

¹ »Chi ũpẽarã Ép'eso p'uurudepema ak'ɨparí Tachi Ak'õrepa ɨt'aripa peeda pae k'art'ade nãɨya bɨse: »Chi juaraari k'ãk'ãi siete uru bɨpa mãɨnepa siete ĩpira nee ooda t'ãena p'ɨrrɨa bɨpa nãɨya jara bɨma:

² »Mãrapa oo p'anɨt'a mɨa k'awa bɨma. Mɨ pae minachia mimia p'anɨt'a mãɨnepa minachia mĩa p'anɨne ãarea choa p'anɨt'a k'awa bɨma. Mãrapa chi nemietá oopataɨrã́ itu oopidak'at'a k'awa bɨma. Eda waapẽarã mãramá wãnak'ari Jesucristopa peesiade apachidama. Maamina mãrapa jĩrak'aua ak'ɨ p'anɨnepa k'awasidama ãchi chi sea bet'a.

³ Mãra mɨ k'orea minachia mĩa p'anɨne jõma choa p'anɨma mãɨnepa sõ edá baedawẽa mɨ pae pia mimia p'anɨma.

⁴ Maamina mɨa mãra k'orea ne ãpia jarai bɨma: mãra naena chi k'ɨ̃ria p'anapatat'a mãɨ waa idi chi k'ɨ̃ria p'anɨwẽma.

⁵ Mãɨpuru mãrapa naa k'ɨ̃ria uru p'anana mãɨne k'ɨ̃risiat'ɨ. Mãicha Tachi Ak'õremá chet'ɨ. Nepia oot'ɨ naena mãrapa oopachida jĩra. Mãra mãicha Tachi Ak'õremá chedaepɨra, mɨa mãra ɨtɨade wãipɨ. Mãɨne mãra ĩpira ãyá bɨipɨ.

⁶ Maamina nãɨ pia oo p'anɨma: chi Nicolade ĩjãa bepa piawẽa oopatat'a mãrapa k'ɨ̃rianak'ama. Mɨa pida k'ɨ̃riak'ama.

⁷ Chi k'ɨɨrɨ pará bɨpa ũrise Tachi Ak'õre Jaorepa ũpẽarã́ jara bɨt'a. Chi nemietá p'uedaadarã́ mɨa pak'uru chok'ae bapiparidepema nejõ itu jõpiipɨ. Mãɨ pak'uru bɨɨrɨ Tachi Ak'õre ĩjũa auk'ará bɨde bɨma.

Cristopa ũpẽarã Esmirna p'uurudepema pae bɨpida

⁸ »Ũpẽarã Esmirna p'uurudepema ak'ɨparí Tachi Ak'õrepa ɨt'aripa peeda pae k'art'ade nãɨya bɨse: »Chi Naa bɨ mãɨnepa K'aadea bɨ, chi mãɨ piu bada ya chok'ae beedapa nãɨya jara bɨma:

⁹ »Mãrapa oo p'anɨt'a mɨa k'awa bɨma. Mãra mĩa p'anɨt'a mãɨnepa nenea k'edet'a k'awa bɨma. Mãɨya p'anɨmina Tachi Ak'õrenepa ɨbɨa p'anɨma. Mɨa k'awa bɨma chi ara ãchi judiorãane apataɨrãpa mãra k'orea k'achia pedeapatat'a. Ãchi Tachi Ak'õrené ẽpẽerãane apatamina tioredé ẽpẽerãpɨ.

¹⁰ Mãra ewari tãaraawẽa bɨde minachia mĩanait'a wap'earãt'ɨ. ¡Ũrit'ɨ! Tiorepa eda mãranepema jɨ̃a nɨbɨipɨ mãɨ wapida ĩjãa p'anɨ k'awayá. Minachia mĩanaipɨ ewari k'ak'o diez ãarea. Mãra peautamisa ĩjãa p'anat'ɨ. Maapae mɨa mãrá poro jũra jɨ̃parí tearude, ewaricha chok'ae bapiipɨ.

¹¹ Chi k'ɨɨrɨ pará bɨpa ũrise Tachi Ak'õre Jaorepa ũpẽarã́ jara bɨt'a. Chi nemietá p'uedada ewaricha Tachi Ak'õrenepema awara p'ananaiwẽma.

Cristopa ũpẽarã Pérgamo p'uurudepema pae bɨpida

¹² »Ũpẽarã Pérgamo p'uurudepema ak'ɨparí Tachi Ak'õrepa ɨt'aripa peeda pae k'art'ade nãɨya bɨse: »Chi k'ĩruuparí nek'o k'ida k'ĩrachu era uru bɨpa nãɨya jara bɨma:

¹³ »Mãrapa oo p'anɨt'a mɨa k'awa bɨma. Mãɨnepa k'awa bɨma ara mãra p'anapatamá tiore chi ichi suak'a beeparí auk'ará bɨde suak'abari bɨt'a. Maamina mãra mɨ paara wapida p'anɨma. Maamina chi tioredepemarãpa ũpẽa Antipa peasidaɨde mɨ k'orea piarã pedeada pẽra, mɨne ĩjãa p'anɨt'a itu bɨdaé pasima.

¹⁴ Maamina mɨa mãra k'orea ne ãpia jarai bɨma. Eda waapẽarã mãranepemarãpa Balaampa jarateada ũri p'anɨma. Balaampa Balác jarateasima sãmaasã́ israel ĩjũanepemarã nemietaade baepiit'a. Juapa oodada sãdorã́ ne k'iuru teada k'opipachima mãɨnepa chi k'ak'uadepa nemietá oopipachima.

¹⁵ Mãɨnepa waapẽarã mãranepemapa Nicolapa jarateada ũri p'anɨma. Mãɨ jarateapataɨ mɨa k'ɨ̃riak'ama.

¹⁶ Mãɨpuru mãicha Tachi Ak'õremá chet'ɨ. Mãɨya oodaepɨra, mɨa tãaraawẽa bɨde mãra ɨtɨade wãipɨ. Mãɨne k'ĩruuparí nek'o mɨ it'aedepa ochia bɨpa mãɨ ẽpẽerã paara k'ĩruuipɨ.

¹⁷ Chi k'ɨɨrɨ pará bɨpa ũrise Tachi Ak'õre Jaorepa ũpẽarã́ jara bɨt'a. Chi nemietá p'uedaadarã́ mɨa maná mẽra bada k'opiipɨ mãɨnepa mawara chak'e t'ot'oa bɨt'a teaipɨ. Mãɨ mawara chak'e bɨde t'ɨ̃ chiwidi bɨ bɨma. Abaɨ pida mãɨ t'ɨ̃ atuama. Maamina chi jitarupuru k'awaipɨ.

Cristopa ũpẽarã Tiatira p'uurudepema pae bɨpida

¹⁸ »Ũpẽarã Tiatira p'uurudepema ak'ɨparí Tachi Ak'õrepa ɨt'aripa peeda pae k'art'ade nãɨya bɨse: »Tachi Ak'õre Warrapa, chi tau t'ɨpɨ urua bɨ jĩra bɨpa, mãɨnepa ichi jĩru bronce t'ɨpɨde torroapidak'ari achiterrea bɨ jĩra bɨpa nãɨya jara bɨma:

¹⁹ »Mãrapa oo p'anɨt'a mɨa k'awa bɨma. Mãra k'ɨ̃ria p'anɨt'a, mɨne ĩjãa p'anɨt'a, mɨ pae oo p'anɨt'a, mãɨnepa ãarea choa p'anɨt'a k'awa bɨma. Ichiaba k'awa bɨma mãrapa naena nepia oo p'anana k'aepẽra, piipará oo p'anɨt'a.

²⁰ Maamina mɨa mãra k'orea ne ãpia jarai bɨma. Chi wẽra Jezabel apataɨpa sea jaratea bɨt'a mãrapa mãɨa itu jarateapi p'anɨma. Ara ichia Tachi Ak'õre pari pedeapariade aparima. Maamina ichia jaratea bɨdepa chi mɨ pae pari mimiapataɨrã seaparima k'ak'uadepa nemietaade nipadamẽrá mãɨnepa ne k'iuru juapa oodada sãdorã́ teada k'odamẽrá.

²¹ Mɨa nɨ basima ichia k'ak'uadepa nemietá ooparí itu bɨk'ari ya Tachi Ak'õremá chemẽrá. Maamina mãɨ nemietá itu bɨi k'ɨ̃riaé pasima.

²² Mãɨpuru mɨa ichi k'ak'ua p'uadepa k'ɨdade bɨipɨ. Mãɨne ãarea chi ichi ome k'ãipataɨrãpa chi ichia nemietá oopari jĩra itu bɨdaepɨra, mɨa mãɨrã minachia mĩapiipɨ.

²³ Ichi warrarã mɨa ãarea piupiipɨ. Mãɨya ũpẽarã ãareaɨrãpa k'awadaipɨ mɨa jõmãɨrã k'ɨ̃risia k'awa bɨt'a. Ichiaba k'awadaipɨ jõmãɨrãpa ãchi sõnepa oo k'ɨ̃ria p'anɨt'a, mɨa mãɨ k'awa bɨt'a. Ara machicha oodada jĩra mɨa ɨtɨaipɨ.

²⁴ Maamina chi eda mãranepema Tiatira p'uurudepemarãpa chi jãɨ wẽrapa jaratea bɨt'a ĩjãanawẽa p'anɨma. Mãɨ awara mãrapa chi “tiorepa ne mẽra uru bɨade” apataɨ, makɨɨ k'awadayá jɨrɨ p'anɨwẽma. Mɨa waa mãrá waa ne awara oopide peeiwẽma.

²⁵ Mãɨyawẽapuru choa p'anat'ɨ mɨne ĩjãa p'anɨnepa aba mɨ cherudea.

^26-27 Chi nemietá p'uedaadarãpa mãɨnepa chi ewaricha mɨa k'ɨ̃ria bɨ oodaadarãpa mɨa mãɨrã bɨk'oaipɨ ãchi p'uurucha chiparirã padamẽrá, mɨ Ak'õrepa mɨ jõmãɨrã chipari bɨda jĩra. Maapae ãchia sõ chupuriadawẽa ãareaɨrã́ jok'ae oopidaipɨ, mãɨya oodamẽrá. Chok'o ãriuta jĩra jõmãɨrã p'uedaipɨ.

²⁸ Mɨa chi ãsã parudepema k'ãk'ãi ãchiá teaipɨ.

²⁹ Chi k'ɨɨrɨ pará bɨpa ũrise Tachi Ak'õre Jaorepa ũpẽarã́ jara bɨt'a.