Apocalipsi 19 - Tachi Ak'õre Pedea

Pajãne p'anɨrãpa Tachi Ak'õrea pia pedeadada

¹ Mãɨya nak'ari mɨa pajãne chok'ará nãɨya pedea p'anɨt'a ũrisima. «¡Tachi Ak'õrea pia pedeadai p'anɨma! Ichiapuru ẽpẽerã k'aripa bɨma. Ichit'a chi atepe bɨma mãɨnepa chi jua chaarea bɨma.

² Ara ichi piarãpẽanepa ãarea jĩp'a ɨtɨaparima. Wẽra nemietá ooparí pada chi mãɨ t'ɨ̃ p'oa bada ɨtɨasima, nemietá oo bɨdepa ãarea nãɨ ĩjũanepemarã́ abarik'a nemietá oopida pẽra. Tachi Ak'õrepa mãɨ wẽra ɨtɨasima, chi ichi pae pari mimiapataɨrã k'enana k'orea».

³ Mãicha nãɨya jĩk'ua jarasidama: «¡Tachi Chiparia pia pedeadai p'anɨma! Jãɨ p'uuru paawãmaa bɨ nãri ewaricha nɨbaipɨ».

⁴ Mãɨne chi veinticuatro chõarã mãɨnepa ẽpẽra jĩra k'ĩmari chok'ae p'anɨ sĩraporode bari k'op'aneesidama Tachi Ak'õre k'ɨ̃rianai k'orea. Tachi Ak'õre ichi suak'a beeparí auk'ará bɨde suak'abari bɨde ãchia nãɨya pia pedeasidama: «¡Mãɨya beese! ¡Tachi Chiparia pia pedeadai p'anɨma!»

⁵ Mãɨnepa mɨa ũrisima Tachi Ak'õre suak'a beeparí auk'ará bɨdepa abaɨpa nãɨya pedearut'a: «¡Jõma chi Tachi Ak'õre pae pari mimiapataɨrãpa, Tachi Ak'õrea pia pedeat'ɨ! ¡Machi, chi Tachi Ak'õre wap'ea berãpa, ichiá pia pedeat'ɨ! ¡Chi atepe berãpa mãɨnepa chi k'aepea berã pida pia pedeat'ɨ!»

Oveja Chak'e miak'ãipataɨ ewari

⁶ Maapae chok'ará jĩk'ua pedea p'anɨ mɨa ũrisima. Mãɨ to pedea jĩra pũa nɨbɨ jĩra basima mãɨnepa pa pedea minachia baeru jĩra basima. Ãchia nãɨya jara tuanasidama: «¡Tachi Chipari pia bɨma! ¡Tachi Chipari chi Ne Ãarea P'ue Bɨpɨ! ¡Ichit'a jõmãɨrã Chiparipɨ!

⁷ ¡Arapaadaipɨ! ¡Arapaadaipɨ! Ichit'a chi Atepe bɨade adaipɨ, chi Oveja Chak'e miak'ãipataɨ ewari cheda pẽra. Ichi k'ima pai bɨ k'ak'apiasima.

⁸ Tachi Ak'õrepa lino p'aru t'ot'oa ũucho ũuchoa bɨdepa ichi k'ak'apiapisima». (Mãɨ lino p'arupa jara k'ɨ̃ria bɨma chi ẽpẽerã Tachi Ak'õrenerãpa ne jĩp'a oopataɨ).

⁹ Tachi Ak'õrepa ɨt'aripa peedapa mɨá jarasima: «K'art'ade nãɨya bɨse: “¡Oveja Chak'e miak'ãipataɨ ewari nek'opataɨmá chi t'ɨ̃naanãɨrã minachia pia p'anɨma!”» Mãɨnepa jarasima: «Mãɨ piarã pedea Tachi Ak'õrepa jaradapɨ».

¹⁰ Ara mãɨne mɨ chi Tachi Ak'õrepa ɨt'aripa peeda jĩru k'ait'a sĩraporode bedabari k'obeesima ichiá pia pedeai k'orea. Maamina ichia mɨá jarasima: «Jãɨya oorãse, mãɨpari Tachi Ak'õreapuru pia pedease. Mɨ Tachi Ak'õre pae pari mimiaparipɨ, pɨ jĩra mãɨnepa chi Jesupa jarateada ĩjãa berã jĩra». Jesupa jarateada Tachi Ak'õre Jaorepa chi ichi pari pedeapataɨrã́ pedeapiparima.

Chi mũra t'ot'oa ɨ̃rɨ cheda

¹¹ Mãɨya nak'ari mɨa unusima pajãne eda wãpataɨ ewa nɨbɨ. Mãɨya bɨde mũra t'ot'oa bɨt'a chesima. Mãɨ mũra ɨ̃rɨ suak'abari bɨt'a Chi Ichia Jarada Jĩra Abarik'a Oo Bɨade apatama mãɨnepa Chi Piarãane apatama. Ichia ẽpẽerã nepɨra jĩp'a ak'ɨparima mãɨnepa jĩp'a oo bɨdepa chi nek'ĩramá ome k'ĩruuparima.

¹² Ichi tau t'ɨpɨ jĩra urua basima. Poro jũra jɨ̃parí minachia jɨ̃ basima. Ichi porode t'ɨ̃ bɨ uru basima maamina abaɨ pida mãɨ t'ɨ̃ k'awaé pasima; ichiapuru mãɨ k'awa basima.

¹³ Ichi anamari jɨ̃ bɨ oade bek'eadat'a jɨ̃ basima. Ichi t'ɨ̃ «Tachi Ak'õre Pedeaade» apatama.

¹⁴ Ichi k'aade chi pajãnepema papaká berã mũra t'ot'oa ɨ̃rɨ cheepɨrɨsidama. Ãchi neet'á lino p'aru t'ot'oa jɨ̃ p'anasima. Mi ãpia pida jayoawẽa beasima.

¹⁵ Ichi it'aedepa k'ĩruuparí nek'o p'eedea bɨt'a ochiasima, mãɨnepa tuacha p'uei k'orea. Sõ chupuriadawẽa ãareaɨrã́ jok'ae oopiipɨ. Uva pertɨaru jĩra ãchi ɨtɨaipɨ, ichia Tachi Ak'õre chi Ne Ãarea P'ue Bɨpa k'ĩruu bɨdepa mãɨya ɨtɨai bɨ pẽra.

¹⁶ Ichi anamari jɨ̃ bɨde ichi mak'ara ɨ̃rɨ nãɨ t'ɨ̃ bɨ uru bɨma: «Jõmãɨrã poro jũra jɨ̃parí jɨ̃ p'anɨrã k'aepẽra ichit'u chi Atepe Bɨpɨ» ichiaba «Jõmãɨrã chiparirã k'aepẽra ichit'u chi Atepe Bɨpɨ».

¹⁷ Maapae mɨa unusima Tachi Ak'õrepa ɨt'aripa peeda ɨmata ɨ̃rɨ bai nɨbɨt'a. Ichia jõma ne mik'ia k'opataɨ ɨt'ɨ wãamaripataɨrã́ nãɨya jĩk'ua jarasima: «Ará posoa chet'ɨ chi Tachi Ak'õrepa nek'opataɨ oo bɨmá.

¹⁸ Mãma k'odaipɨ poro jũra jɨ̃parí jɨ̃ bɨ piudaadarã, papaká berã chi minachia k'awa p'anɨrã piudaadarã, chi jua chaarea berã piudaadarã, mũra k'iuru mãɨnepa chi mũra ɨ̃rɨ wãpataɨ piudaadarã. Ãarea ẽpẽerã piudaadarã k'odaipɨ: chi chipari newẽa mimiapataɨrã piudaadarã, chi chipari pae pari mimiapataɨrã piudaadarã, chi k'aepe k'ede piudaadarã, mãɨnepa chi atepe berã piudaadarã k'odaipɨ».

¹⁹ Maapae mɨa unusima ãnimara mietá bɨ, nãɨ ĩjũanepema poro jũra jɨ̃parí jɨ̃ p'anɨrã, mãɨnepa jõma ãchi papaká berã ará p'anɨt'a. Ará tuanasidama chi mũra ɨ̃rɨ suak'abari bɨ ome, mãɨnepa chi ichi ome p'anɨ papaká berã ome k'ĩruunai k'orea.

²⁰ K'ĩruutade chi mũra ɨ̃rɨ suak'abari bɨpa chi ãnimara mietá bɨ mãɨnepa chi Tachi Ak'õre pari pedeaparí chi piarãpẽawẽma bɨt'a jitasima. Mãɨ chi piarã Tachi Ak'õre pari pedeapariwẽpa chi ãnimara mietá bɨ t'ɨ̃nepa ẽpẽerãpa ne p'ue oodak'apɨ́ waibɨa bet'a oopachima. Mãɨya chi ẽpẽerãpa chi ãnimara mietá bɨa itu tauchaapidaadarã ãarea seapachima. Ichiaba chi mãɨ ãnimara jĩra bɨ juapa oodada sãdo minachia k'ɨ̃rianaanat'a seapachima. Chi mũra ɨ̃rɨ suak'abari bɨpa mãɨ ãnimara mietá bɨ mãɨnepa chi Tachi Ak'õre pari pedeaparí chi piarãpẽawẽma bɨt'a chok'ae p'anɨ senia azup're paara t'ɨpɨ urua bɨdea jirat'aasima.

²¹ Chi k'ĩruuparí nek'o ichi it'aedepa ochia bɨpa waapẽarã ãarea k'enasima. Maapae jõma chi ne mik'ia k'opataɨ ɨt'ɨ wãamaripataɨrã mãɨ k'iuru k'o p'anɨpa jãwaasidama.