Apocalipsi 17 - Tachi Ak'õre Pedea

Chi wẽra k'achia bɨ Juanpa ununa

¹ Chi Tachi Ak'õrepa ɨt'aripa peedaɨrãnepema aba bɨpa chi p'arat'u jãjoa be siete uru bada mɨmá chek'ari maapae nãɨya jarasima: «Wãnama. Mɨa unupiipɨ sãmaasã́ Tachi Ak'õrepa chi wẽra k'achia bɨt'a ɨtɨait'a. Mãɨ “wẽra chi to minachia berãk'á suak'abari baparipɨ”.

² Nãɨ ĩjũanepema poro jũra jɨ̃parí jɨ̃ p'anɨrãpa ichi ome nemietá oopachidama. Mãɨnepa mãɨ wẽrapa nemietá oo bɨt'a unu p'anɨ pẽra, ichiaba nãɨ ĩjũanepemarãpa ara mãɨya oopachidama ãchi uvabapa piu p'anɨ jĩra».

³ Ara mãɨne Tachi Ak'õre Jaoredepa bɨde Tachi Ak'õrepa ɨt'aripa peedapa mɨ ĩjũa pania newẽa bɨdea ateesima. Mãma mɨa unusima wẽra ãnimara mietá mãɨnepa p'urea bɨ ɨ̃rɨ suak'abari bɨt'a. Chi ãnimara k'ak'uade t'ɨ̃ miak'ãe bɨ basima. Mãɨpa Tachi Ak'õre k'orea k'achia pedea basima. Poro siete mãɨnepa k'achu diez uru basima.

⁴ Mãɨ wẽrapa neet'á chi arena k'ĩra mãɨnepa p'urea bɨt'a jɨ̃ basima. Nee ooda auk'ará be, mawara neepɨa be mãɨnepa ne achiterrea be jɨ̃ basima. P'arat'u jãjoa bɨ nee ooda ichi juade uru basima. Mãɨ p'arat'u jãjoa bɨ nejõma Tachi Ak'õrepa k'ɨ̃riak'aɨ mãɨnepa jõma mãɨ wẽrapa k'ĩra p'era oo bɨpa ipiru basima.

⁵ Ichi tau bɨɨrɨde t'ɨ̃ aba tachia ũrinak'apɨ́ bɨ uru basima. Nãɨya bɨ basima: «Mɨ Babilonia chi p'uuru minachia bɨpɨ. Mɨ wẽrarã k'achiarã naepɨ, mãɨnepa chi ãarea nãɨ ĩjũane Tachi Ak'õrepa k'ɨ̃riak'apɨ́ naepɨ».

⁶ Mãɨ ak'ɨside k'awasima mãɨ wẽra ẽpẽerã Tachi Ak'õreneerã oa torudepa piu basit'a, chi Jesude ĩjãapataɨrã peadada oapa. Mɨa mãɨ wẽra unuk'ari, waa k'awa k'ɨ̃risiawẽa beesima.

⁷ Mãɨne Tachi Ak'õrepa ɨt'aripa peedapa mɨá nãɨya idisima: «¿K'ãre k'orea k'awa k'ɨ̃risiawẽa bɨma? Mãɨ wẽra k'orea tachia ũrii p'anɨt'a mãɨnepa chi ãnimara mietá bɨ chi mãɨ ɨ̃rɨ suak'abari bɨ k'orea mɨa k'awapiipɨ. Ichiaba chi ãnimara poro siete uru bɨ mãɨnepa k'achu diez uru bɨ k'orea k'awapiipɨ.

⁸ Chi pɨa ununa ãnimara mietá bɨ naena chok'ae bada, idiapae newẽma, maamina ewariaba chi uria minachia bɨdepa cherude, Cristopa mãɨ ɨtɨaipɨ. Nãɨ ĩjũanepemarãpa mãɨ ãnimara unuutade k'awa k'ɨ̃risiadawẽa p'aneenaipɨ. Nãɨ ĩjũa ooi naena ãchi t'ɨ̃ chi ewaricha chok'ae p'ananai k'art'ade bɨwẽa basima.

⁹ »Chi pɨa ununa ũrii k'orea ne minachia k'awa bai bɨma. Chi ãnimara poro siete p'anɨ mãɨpa jara k'ɨ̃ria p'anɨma chi eya k'ak'o siete. Mãɨ siete eya ɨ̃rɨ chi wẽra nemietá bɨ suak'abari bɨma.

¹⁰ Ichiaba mãɨ poro siete p'anɨ jara k'ɨ̃ria bɨma poro jũra jɨ̃parí jɨ̃ p'anɨrã k'ak'o siete p'anɨ. Mãɨ siete poro jũra jɨ̃parí jɨ̃ p'anɨrãnepema joesoma piusidama. Chi mãɨrãnepema abapa ẽpẽerã ichi juade wapida uru bɨma. Mãɨnepa chi abaɨ waidi chewẽa bɨma. Maamina ichi cherude poro jũra jɨ̃parí jɨ̃ bɨ beeimina tãaraa baiwẽma.

¹¹ Chi ãnimara mietá bɨ naena bada maamina waa newẽma, mãɨt'u awara poro jũra jɨ̃parí jɨ̃ bɨ cheit'a jara k'ɨ̃ria bɨma. Ichi mãɨ siete poro jũra jɨ̃parí jɨ̃ p'anɨrãnepemapɨ. Cristopa ichi ewaricha ɨtɨaipɨ.

¹² »Chi pɨa k'achu diez ununa jara k'ɨ̃ria bɨma poro jũra jɨ̃parí jɨ̃ p'anɨrã diez p'anɨt'a. Ãchi waidi poro jũra jɨ̃parí jɨ̃ p'anɨrã padawẽma. Maamina chi ãnimara mietá bɨ poro jũra jɨ̃parí jɨ̃ bɨ parude ãchi sida poro jũra jɨ̃parí jɨ̃ p'anɨrã padaipɨ. Maamina tãaraanaiwẽma.

¹³ Mãɨ diez poro jũra jɨ̃parí jɨ̃ p'anɨrãpa abarik'a k'ɨ̃risia p'ananaipɨ. Ãchi tua mãɨnepa ãchi jua chaarea bɨt'a chi ãnimara juade bɨdaipɨ. Chi ãnimarapa jararut'a ãchia oodaipɨ.

¹⁴ Mãɨne ãchi Oveja Chak'e ome k'ĩruunaipɨ. Maamina chi Oveja Chak'epa ãchi p'ueipɨ ichi jõmãɨrã poro jũra jɨ̃parí jɨ̃ p'anɨrã k'aepẽra chi Atepe Bɨ pẽra, mãɨnepa jõmãɨrã chiparirã k'aepẽra chi Atepe Bɨ pẽra. P'uerude chi ichide minachia ĩjãa p'anɨ ichi ome p'ananaipɨ. Ãchi t'ɨ̃k'ari maapae jɨrɨ atasima».

¹⁵ Maapae Tachi Ak'õrepa ɨt'aripa peedapa mɨá nãɨya jarasima: «Wẽra k'achia bɨ suak'abari bɨmá pɨa to wawaria unusima. Mãɨ to wawaria p'anɨrãpa jara k'ɨ̃ria bɨma p'uurucha, ĩjũacha mãɨnepa pedeacha.

¹⁶ Chi pɨa diez k'achu ununapa mãɨnepa chi ãnimara mietá bɨpa mãɨ wẽra k'achia bɨ unuamaanaipɨ. Mãɨpuru jõma ichia uru bɨt'a ẽemarinaipɨ. Ãarea ãk'adá bɨdaipɨ. Ãchia ara chi wẽra k'ak'ua k'odaipɨ mãɨnepa paa peedaipɨ.

¹⁷ Tachi Ak'õrepa mãɨ diez poro jũra jɨ̃parí jɨ̃ p'anɨrã sõne bɨsima ichia k'ɨ̃ria bɨ jĩra oodamẽrá. Mãɨ k'orea abarik'a k'ɨ̃risia uru p'ananak'ari ãchi ãnimara mietá bɨ juade bɨdaipɨ aba Tachi Ak'õrepa jarada jõma mãɨyarunea.

¹⁸ Chi pɨa ununa wẽra k'achia bɨ p'uuru waibɨa bɨ jara k'ɨ̃ria bɨma. Mãɨ p'uurudepema poro jũra jɨ̃parí jɨ̃ bɨpa chi waapẽarã tuachadepema poro jũra jɨ̃parí jɨ̃ p'anɨrã ichi juade uru bɨma».