Apocalipsi 16 - Tachi Ak'õre Pedea

Chi k'aadeapema bari k'ak'o siete mĩapii bɨ

¹ Mãɨne chi abaɨpa chi Tachi Ak'õre te pajãne bɨdepa jĩk'ua pedea bɨt'a mɨa ũrisima. Chi Tachi Ak'õrepa ɨt'aripa peedaɨrã siete p'anɨa nãɨya jarasima: «Chi p'arat'u jãjoa siete p'anɨne ne eda be weade wãt'ɨ ĩjũanea, Tachi Ak'õre k'ĩruupi bɨdepa nãɨ ĩjũa ɨtɨait'a mãɨya unupidai k'orea».

² Ara mãɨne Tachi Ak'õrepa ɨt'aripa peeda aba wãk'ari maapae chi p'arat'u jãjoa bɨde eda bɨt'a ĩjũanea wea peesima. Chi ãnimara mietá bɨ t'ɨ̃ tau bɨɨrɨde wa juade bɨ uru be mãɨnepa chi ãnimara jĩra bɨ juapa oodada sãdo minachia k'ɨ̃riapataɨrã, ãchi aida mietá miak'ãe jitak'oasidama.

³ Mãɨya nak'ari chi abaɨ Tachi Ak'õrepa ɨt'aripa peeda chi p'arat'u jãjoa bɨde uru bada p'usadea wea peesima. Mãɨnepa chi p'usa oa pasima. Ẽpẽra peadada oa jĩra beesima. Mãɨne chi ne p'usade chok'ae beada ãarea piusidama.

⁴ Mãɨya nak'ari chi abaɨ Tachi Ak'õrepa ɨt'aripa peedapa toedá mãɨnepa chi to ek'aripa t'ɨ nɨbɨdea ãarea wea peesima. Mãɨpa ãarea oa pasima.

⁵ Mãɨne mɨa ũrisima chi Tachi Ak'õrepa ɨt'aripa peedapa, chi pania ãarea ua bɨpa nãɨya jara bɨt'a: «¡Pɨt'u chi Tachi Ak'õre piarãpẽapɨ! Pɨ idi bɨma, mãɨnepa naena basima. Pɨ jĩp'a bɨẽra, ẽpẽerã ãarea ɨtɨasima.

⁶ Ãchia pɨ ẽpẽerã mãɨnepa chi pɨ pari pedeapataɨrã oa ãripisidama. Mãɨpuru idi pɨa ãchiá oa topimaa bɨma ãchia nemietá oodada jĩra».

⁷ Mãɨne chi mãɨ incienso k'era ɨt'ari bɨ paateapataɨdepa mɨa ũrisima abaɨpa nãɨya jara bɨt'a: «Tai Chipari, tai Ak'õre chi ne ãarea p'ue bɨ, pɨa ara pɨ piarãpẽanepa ãarea jĩp'a ɨtɨaparima».

⁸ Mãɨya nak'ari abaɨ Tachi Ak'õrepa ɨt'aripa peeda ichi p'arat'u jãjoa bɨde uru bada chi ɨmata ɨ̃rɨ wea peesima. Mãɨpa ɨmata ɨbɨa jẽrat'ĩupisima ẽpẽerã paamẽrá.

⁹ Tachi Ak'õre k'orea k'achia pedeapachidama ãchi pisiapa minachia paa bɨdepa, mãɨ ichiapuru minachia mĩapi bɨẽra. Maamina chi nemietá oodai itu bɨdaé pasima, mãɨnepa mi ãpia pida Tachi Ak'õret'a chi atepe piipará bɨade adaé pasima.

¹⁰ Mãɨya nak'ari abaɨ chi Tachi Ak'õrepa ɨt'aripa peedapa chi ichi p'arat'u jãjoa bɨde uru bada chi ãnimara suak'a beeparí minachia bɨde ɨ̃rɨ ãarea wea peesima. Ara mãɨne chi ãnimarapa chi ichi p'ue bɨ ĩjũa ãarea p'ãriosima. Mãɨne chi p'uapa ãchi k'ĩrame k'aasidama.

¹¹ Chi aida p'uapa mãɨnepa chi ãchi mĩanana k'orea, chi Tachi Ak'õre pajãne bɨ k'orea k'achia pedeapachidama. Maamina ãchia nemietá oopataɨ itu bɨdaé pasima.

¹² Mãɨya nak'ari abaɨ chi Tachi Ak'õrepa ɨt'aripa peedapa chi ichi p'arat'u jãjoa bɨde uru bada Éup'rate to waibɨade wea peesima. Ara mãɨne to p'oasima chi ɨmata ochiaparieridepema poro jũra jɨ̃parí jɨ̃ p'anɨrã k'ĩruune cheutade pia p'asadamẽrá.

¹³ Mãɨnepa mɨa jaore ũpea mietá tobio jĩra bet'a unusima. Abaɨ chi je it'aedepa ochiasima. Ya abaɨ ãnimara it'aedepa ochiasima. Mãɨnepa abaɨ ochiasima chi piarã Tachi Ak'õre pari pedeapariwẽ it'aedepa.

¹⁴ Mãɨrã chi ãnimara mietaarã jaorerãpa ne p'ue oodak'apɨ́ minachia oopachidama. Mãɨnepa chi tuachadepemarã poro jũra jɨ̃parí jɨ̃ p'anɨrã́ jarade wãsidama Tachi Chipari ome k'ĩruune wãnamẽrá, Tachi Ak'õre chi Ne Ãarea P'ue Bɨpa ɨtɨai ewaride.

^15-16 Ãchia chi hebreo pedeade Armagedón apataɨ ĩjũanea chi poro jũra jɨ̃parí jɨ̃ p'anɨrã ateewãsidama. «¡Tau pará p'anat'ɨ! Mɨ nechɨaparí jĩra cheipɨ, chi mãɨ abaɨ pida nɨ p'anɨwẽne. Pia p'ananaipɨ chi mãɨ mɨ nɨ p'anɨrãpa mãɨnepa chi ãchi neet'á oo uru p'anɨrãpa. Mãɨya p'ue ãk'adá wãnaiwẽma mãɨnepa k'ĩra p'eradaiwẽma».

¹⁷ Mãɨya nak'ari chi k'aadea sietedepema Tachi Ak'õrepa ɨt'aripa peedapa ichi p'arat'u jãjoa bɨde uru bada ɨt'ɨpa eudá bɨdea wea peesima. Ara mãɨne chi Tachi Ak'õre te suak'a beeparí auk'ará bɨdepa jĩk'ua biasima: «Ãarea jõsima».

¹⁸ Ara mãɨne pa ɨbɨa wiwirá nɨbeesima, ɨbɨa ɨrrɨa wã nɨbeesima, pa ɨbɨa bae nɨbeesima, mãɨnepa iurumia ɨbɨa wãsima. Nãɨya Tachi Ak'õrepa ẽpẽra oo basiedapema ewariaba pida mãɨya iurumia ɨbɨa wãk'a pasima.

¹⁹ Chi p'uuru waibɨa bɨ bari k'ak'o ũpea ãarea t'odochoapisima. Mãɨnepa jõma nãɨ ĩjũanepema p'uuru baewãk'oasidama. Tachi Ak'õrepa Babilonia p'uuru waibɨa bɨdepema k'ɨ̃risiasima, mãɨ ɨtɨai k'orea. Ichi k'ĩruupidepa mãɨ p'uuru minachia ɨtɨasima uvaba minachia asia bɨ topi bɨ jĩra.

²⁰ Mãɨ iurumianepa chi p'usade ĩjũa ãpia p'ɨrra be mãɨnepa chi eya ãarea wẽpapik'oasima.

²¹ Ɨt'aripa k'oe tau p'ẽya waibɨa k'ojada jĩra chi ẽpẽra ɨ̃rɨ bae nɨbeesima. Mãɨ k'oe tau k'ojada cien libra wãyá chɨk'ɨa basima. Mãɨ k'oe tau k'ojadapa chi ẽpẽerã minachia mĩapiipachi pẽra, Tachi Ak'õre k'orea k'achia pedeapachidama.