Apocalipsi 15 - Tachi Ak'õre Pedea

Tachi Ak'õrepa ɨt'aripa peeda siete p'anɨpa minachia mĩapidai k'orea

¹ Mɨa mãicha pajãne ne jara k'ɨ̃ria bet'a unusima. Mãɨnepa chi ẽpẽerã chi mãɨya k'awa k'ɨ̃risiadawẽa p'aneesidama. Pajãne chi Tachi Ak'õrepa ɨt'aripa peedaɨrã siete p'anasidama. Ãchi k'ak'awá ne uru p'anasidama chi ẽpẽerã mĩapidai k'orea. Tachi Ak'õrepa mãɨya ɨtɨak'ari maapae ichi k'ĩruui pada jõma jõipɨ.

² Mãɨ awara mɨa p'usa jĩra p'ap'ãrá tot'á bɨ urua nɨbɨt'a unusima. Mãɨ lawari ãarea chi ãnimara p'uedaadat'a bai nɨp'anasidama. Ãchia mãɨ ãnimará mãɨnepa ara ichi jĩra juapa oodada sãdoa pia pedeadaé pasima mãɨnepa ichi t'ɨ̃ chi número bɨpidaé pasima. Ãchia chi Tachi Ak'õrepa teadat'a arpa juade uru p'anasima.

³ Mãɨ arpa chaautade Moisé chi Tachi Ak'õre pae pari mimiaparí k'arit'a mãɨnepa chi Oveja Chak'e k'arit'a k'arimaa p'anasima. Nãɨya k'arisidama: «Tai Chipari, chi Ne Ãarea P'ue Bɨ Tachi Ak'õre, pɨa oo bɨ waibɨa bɨma. Pɨa oo bɨ k'orea ẽpẽerãpa k'awa k'ɨ̃risiadawẽa p'anapatama. Jõmãɨrã Poro Jũra Jɨ̃parí Jɨ̃ bɨ, pɨa oo bɨt'a jĩp'a bɨma mãɨnepa pɨ pedea aba piarã bɨma.

⁴ Tai Chipari, ¿k'aipa pɨ wap'eawẽa bɨwẽma? ¿K'aipa pɨ chi atepe bɨade aiwẽma? Pɨt'u chi Tachi Ak'õre paepuru bɨpɨ. Tua ãareaɨrã chedak'ari pɨá pia pedeadaipɨ, pɨa jĩp'a oo bɨt'a unupida pẽra».

⁵ Mãɨya nak'ari mɨa pajãne ak'ɨside chi Tachi Ak'õre tede chi eda p'aru ara ãpia eatɨa jira bɨ ewa nɨbɨt'a unusima.

⁶ Mãɨ tedepa chi Tachi Ak'õrepa ɨt'aripa peedaɨrã siete p'anɨ chesidama. Ne mĩapipataɨrã siete p'anɨ uru p'anasima. Lino k'osada neet'á t'ot'oa mãɨnepa achiterrea bɨt'a jɨ̃ p'anasima. Chi ju k'ait'a nee oodapa p'ãjɨ̃ basima.

⁷ Mãɨne ẽpẽra jĩra k'ĩmari chok'ae p'anɨnepema abaɨpa chi Tachi Ak'õrepa ɨt'aripa peedaɨrã́ ãchicha p'arat'u jãjoa bɨ nee ooda teasima. Mãɨ p'arat'ut'a chi Tachi Ak'õre ewaricha chok'ae baparí k'ĩruu bɨ k'awapi bɨma.

⁸ Mãɨne Tachi Ak'õre k'ĩrawãrea bɨdepa mãɨnepa ichi jua chaareadepa ichi tiida nãri minachia nɨbeesima. Mãɨpa aba pida mãɨ tede eda p'ue wãnaé pasima aba Tachi Ak'õrepa ɨt'aripa peedaɨrã siete p'anɨpa chi minachia mĩapidai pada mãɨ siete p'anɨ jõrunea.