Apocalipsi 14 - Tachi Ak'õre Pedea

Chi ẽpẽerã 144 mil k'aridada

¹ Mãɨya nak'ari mɨa unusima chi Oveja Chak'e chi Sión p'uuru eya ɨ̃rɨ bai nɨbɨt'a. Ichi ome 144 mil p'anasima. Ãchi tau bɨɨrɨde chi Oveja Chak'e t'ɨ̃ mãɨnepa ãchi Ak'õre t'ɨ̃ bɨ uru p'anasima.

² Mãɨne pajãne to pedea jĩra pũa ũrisima, mãɨnepa pa pedea jĩra. Chi mɨa ũri bada arpa chaauta jĩra auk'ará basima.

³ Mãɨne chi Tachi Ak'õre suak'a beeparí auk'ará bɨ naa, chi ẽpẽra jĩra k'ĩmari chok'ae p'anɨ naa mãɨnepa chi chõarã 24 p'anɨ naa k'ari chiwidit'a k'ari p'anasima. Abaɨ pida mãɨ k'ari p'ue k'awadaé pasima. Chi mãɨ abapuru 144 mil p'anɨrãpa, chi Tachi Ak'õrepa k'aripa badapa mãɨrãpuru k'ari k'awa p'anasima.

⁴ Mãɨrã ẽpẽerã waidi wẽra oodak'a pasima. Tachi Ak'õremá mãɨrã ãpia pida nemietá newẽa p'anasima. Ãchia chi Oveja Chak'e ichi wãrumá ichi ome wãpatama. Tachi Ak'õrepa ãchi nãɨ ĩjũanepema k'aripasima, ichi pae mãɨnepa chi Oveja Chak'e pae p'ananamẽrá mãɨ chi ne uuda naa chauda ichiá teapata jĩra.

⁵ Ãchia mi aba pida sea jaradak'ama. Jaraideepara nemietá aba pida newẽma.

Tachi Ak'õrepa ɨt'aripa peeda ũpea p'anɨpa jaradada

⁶ Mãɨya nak'ari mɨa aba chi Tachi Ak'õrepa ɨt'aripa peeda pajãne wãamari wã nɨbɨt'a unusima. Ichia chi pedea pia uru basima ãarea ẽpẽerã́ jarai k'orea: ĩjũanepemarãcha, ẽpẽerã awaraɨcha, pedeacha mãɨnepa p'uurucha. Mãɨ pedea ewaricha mãɨya baipɨ.

⁷ Ichia nãɨya jĩk'ua jarasima: «¡Tachi Ak'õre wap'eat'ɨ! Ichiá pia bɨade a jarat'ɨ, chi ichia ɨtɨai ewari cheda pẽra. Ichiá pia pedeat'ɨ, chi pajã, ĩjũa, p'usa mãɨnepa chi to ek'aripa t'ɨ nɨbɨ ooda pẽra».

⁸ Mãɨ Tachi Ak'õrepa ɨt'aripa peeda mãɨ ɨ̃ari chek'ari nãɨya jarasima: «Babilonia p'uuru jõsima. Piarã ãarea baesima. Mãɨ p'uurudepemarãpa chi minachia k'ĩra p'era oo p'anɨpa tuachadepemarã́ abarik'a nemietá oopisidama uvaba topiuta jĩra».

⁹ Chi mãɨ Tachi Ak'õrepa pajãnepa ɨt'aripa peeda wãnak'ari mãɨ k'aade aba wãamari chesima. Ichia nãɨya jarasima: «Abaɨpa chi ãnimara mietá bɨ minachia k'ɨ̃riaipɨra mãɨnepa chi sãdo ara ichi jĩra bɨ juapa oodada k'ɨ̃riaipɨra, mãɨnepa chi tauchaaparí tau bɨɨrɨde wa juade itu bɨipɨra,

¹⁰ Tachi Ak'õrepa k'ĩruupidepa mãɨ ẽpẽra minachia piawẽa ooipɨ uvaba asia k'ĩruu bɨdepa tearu jĩra. Mãɨ ẽpẽerã jõma Tachi Ak'õrepa ɨt'aripa peedaɨrã k'ĩrari mãɨnepa chi Oveja Chak'e k'ĩrari azup're uruapa mãɨnepa t'ɨpɨ taudepa minachia mĩa baipɨ.

¹¹ Chi mãɨ ẽpẽra minachia mĩa bɨmá mãɨ t'ɨpɨ tau k'iiwẽa baipɨ, maawẽapuru nãri minachia che nɨbaipɨ. Chi abaɨpa chi ãnimarane mãɨnepa chi sãdo juapa oodaada ara ichi jĩra bɨ k'ɨ̃riaipɨra, mãɨ ɨ̃apaawẽa baipɨ. Mãɨ ãnimara t'ɨ̃ itu tauchaapidaadapa mãɨrã p'ue ãst'á mãɨnepa teamasi ɨ̃apaadawẽa p'ananaipɨ».

¹² Mãɨpuru Tachi Ak'õre ẽpẽerãpa minachia ĩjãa p'anɨnepa chi ichia oopi bɨ pedea ũri p'ananai p'anɨma mãɨnepa minachia choadai p'anɨma.

¹³ Mãɨya nak'ari mɨa ũrisima pajãne abaɨpa nãɨya jarasit'a: «K'art'ade nãɨya bɨse: “Nãɨ idiipa naa pia p'anɨma chi Tachi Chiparide ĩjãa p'anɨne piudait'a”». Mãɨne ũrisima Tachi Ak'õre Jaorepa nãɨya jarasit'a: «Piarã ãchi pia p'ananaipɨ. Ãchi ɨ̃apaade wãnaipɨ chi minachia mĩanana pada, chi ãchia nepia oodada padadepa minachia unupodoi pẽra».

Tachi Ak'õrepa nãɨ ĩjũane be ɨtɨai pada

¹⁴ Mãɨya nak'ari mɨa ɨt'aa pajãnea ak'ɨside jɨ̃ara t'ot'oa bɨt'a unusima. Mɨa chi Ẽpẽra Warra jĩra bɨ chi jɨ̃ara ɨ̃rɨ suak'abari bɨt'a unusima. Chi porode chi jũra jɨ̃parí nee oodat'a jɨ̃ basima. Ichi juade nek'o chi p'eedea bɨt'a uru basima.

¹⁵ Mãɨne chi Tachi Ak'õre te minachia ɨt'ari bɨdepa aba chi ichia ɨt'aripa peeda ochiak'ari chi pajãnepa chi jɨ̃ara ɨ̃rɨ suak'a badá nãɨya jĩk'ua jarasima: «Chi ĩjũane ne uudada ãarea wará nɨbeesima. Pɨchi nek'opa pude wãse, chi mãɨ pui ewari pasi pẽra».

¹⁶ Ara mãɨne chi jɨ̃ara ɨ̃rɨ suak'a badapa chi nek'odepa chi ĩjũa puk'ari maapae ãarea baasima.

¹⁷ Maapae chi Tachi Ak'õre te minachia pajãne bɨdepa aba mãicha chi ichia ɨt'aripa peeda ochiasima. Ichia pida nek'o chi p'eedea bɨt'a uru basima.

¹⁸ Mãɨne chi Tachi Ak'õre pae incienso k'era paateapataɨdepa mãɨ chi pajãne bɨdepa mãicha chi Tachi Ak'õrepa ɨt'aripa peeda chesima. Ichiapuru urua uru baparima chi t'ɨpɨ taude incienso k'era pai k'orea. Nãɨya jĩk'ua jarasima chi nek'o chi p'eedea uru bɨa: «Pɨchi nek'odepa chi uva k'ɨmɨ wará nɨbɨt'a jãɨ ĩjũanepema t'ɨat'use, mãɨ uva wará nɨbɨdepa».

¹⁹ Chi Tachi Ak'õrepa ɨt'aripa peedapa ichi nek'odepa chi ĩjũa puk'ari, maapae ãarea chi uva k'ɨmɨ baak'ari maapae chi p'ẽyajã joea k'orodade bɨsima chi uvaba jui k'orea. Mãɨ chi Tachi Ak'õrepa minachia ɨtɨait'a jara k'ɨ̃ria bɨma.

²⁰ Jerusalén p'uuru awara chi uva pertɨasima. Mãɨ pertɨasidaɨde mãmãɨpa oa minachia chesima. Chi t'umá mũra k'idat'umá pa basima.