Apocalipsi 13 - Tachi Ak'õre Pedea

Chi ãnimara mietá p'usadepa ochiada

¹ Mãɨya nak'ari chi je chi p'usa ipude bai nɨbeesima. Mãɨne ãnimara mietá chi p'usadepa ochiarut'a mɨa unusima. Mãɨ ãnimara chi poro siete mãɨnepa chi k'achu diez uru basima. Chi k'achucha porode jũra jɨ̃pataɨ uru basima. Chi porocha t'ɨ̃ k'achia Tachi Ak'õre k'orea bɨ basima.

² Mãɨ ãnimara mɨa ununa imama jĩra t'ɨt'ɨdɨa basima. Ichi jĩru ui jĩru jĩra basima. Ichi it'ae imama it'ae jĩra basima. Chi jepa mãɨ ãnimara chi nãɨ ĩjũa chipari jĩra papisima. Mãɨnepa ichi suak'a beeparí auk'ará bɨde suak'abari beepisima, chi nãɨ ĩjũane be ichi juade p'ue uru bamẽrá.

³ Chi ãnimara poro aba bɨde k'õna uru basima. Mãɨnepa ichi perá piuiyá basima maamina chi k'õna jõma ani basima. Ãarea nãɨ ĩjũane berãpa mãɨ k'orea minachia k'ɨ̃risiadak'ari, ichi ome wãsidama.

⁴ Mãɨne ãchia chi je miak'ãe k'ɨ̃riapachidama, ichi jua chaarea chi ãnimará teada pẽra. Mãɨnepa chi ãnimara k'ɨ̃riapachidama. Nãɨya jarapachidama: «¿K'ai jãɨ ãnimara jĩra p'anɨma? ¿K'ai jãɨ ome k'ĩruuima?»

⁵ Tachi Ak'õrepa chi ãnimará ichit'u chi atepe bɨade itu jarapisima mãɨnepa Tachi Ak'õret'a mietá bɨade apisima. Mãɨnepa jedek'o k'ak'o 42 chi nãɨ ĩjũanepema ãarea p'uepisima.

⁶ Mãɨne ichia Tachi Ak'õre k'orea k'achia pedeapachima, ichi t'ɨ̃ k'orea, chi Tachi Ak'õre bɨmaapema k'orea, mãɨnepa chi jõmãɨrã pajãne p'anɨ k'orea.

⁷ Mãɨnepa Tachi Ak'õrepa jãɨ ãnimará ichidirã paara k'ĩruupik'ari chi animarãnea itu p'uepisima. Ẽpẽerã awaraɨcha, p'uurucha, pedeacha mãɨnepa ĩjũacha, mãɨrã ichi jua chaareade bɨsima.

⁸ Mãɨne chi nãɨ ĩjũane ãareaɨrãpa mãɨ ãnimara minachia k'ɨ̃riasidama. Nãɨ ĩjũa ooi naena ãchi t'ɨ̃ chi Oveja Chak'e k'art'ade eda bɨ baé pasima. Mãɨ chi ewaricha chok'ae p'ananai k'art'ade ãchi t'ɨ̃ ãarea eda bɨ bɨma.

⁹ Chi k'ɨɨrɨ pará bɨpa ũrise:

¹⁰ «Chi p'uek'oada eda serra bɨde ateewãnai bɨt'a, mãɨ piarã ateewãnait'a. Chi k'ĩruuparí nek'odepa piui bɨ piarã nek'odepa piuipɨ». Mãɨ k'orea Tachi Ak'õre ẽpẽerãpa minachia ĩjãa p'anɨnepa minachia choadai p'anɨma.

Chi ãnimara ĩjũanepa ochiada

¹¹ Mãɨya nak'ari mɨa ãnimara awara ĩjũanepa ochiarut'a unusima. Mãɨ ãnimarapa chi k'achu ume uru basima oveja ãpia bɨpa k'achu ãpia uru bɨ jĩra. Maamina ichi je jĩra pedeapachima.

¹² Chi ãnimara ĩjũanepa ochiada jõma chi nãɨ ĩjũanepemarã chipari jĩra beesima, ichiaba chi naapema ãnimara jĩra. Ichi jua chaareadepa ẽpẽerã́ chi naapema ãnimara minachia k'ɨ̃riapipachima. Mãɨ ichi k'õnanepa piui basimina, ya wapida chok'ae basima.

¹³ Chi ãnimara ĩjũanepa ochiadapa ne p'ue oodak'apɨ́ minachia oopachima. Ẽpẽrapa ak'ɨ p'anɨmisa t'ɨpɨ tau urua bɨ ɨt'aripa ĩjũanea chepipachima.

¹⁴ Tachi Ak'õrepa mãɨ ĩjũanepa ochiadá ne p'ue oodak'apɨɨt'a itu oopisima chi mãɨ p'usadepa cheda t'ɨ̃ne. Mãɨya chi nãɨ ĩjũanepa ochiadapa chi nãɨ ĩjũanepemarã seasima. Ichia ẽpẽerã́ sãdo jĩra oopisima chi naapema ãnimara k'ĩra jĩra, chi nek'opa k'õ bada mãɨ wapida piuwẽa bɨ jĩra.

¹⁵ Tachi Ak'õrepa chi ĩjũanepa chedá chi sãdo chi naapema ãnimara k'ĩra jĩra bɨa ɨ̃apa teapade asima. Mãɨya pedea beek'ari, chi juapa oodada sãdo k'ɨ̃rianawẽa p'anɨt'a ãarea itu peapipadaade asima.

¹⁶ Mãɨ awara chi ãnimara ĩjũanepa chedapa ãarea ãchi juaraari wa ãchi tau bɨɨrɨde tauchaapik'oasima. Chi ẽpẽerã minachia k'awa be, chi ẽpẽra ɨbɨwẽa be, mãɨnepa chi erreara minachia uru be, chi erreara nea be, chi chipari pae pari mimiapataɨrã, mãɨnepa chi chipari pae pari mimianak'apɨɨrã ãchi juaraari wa tau bɨɨrɨde tauchaapipadaade asima.

¹⁷ Abapuru chi tauchaa beadapuru p'ue ne atadai p'anasima mãɨnepa p'ue ne netodai p'anasima. Mãɨ tauchaa bɨ chi ãnimara p'usadepa ochiada mãɨ t'ɨ̃pɨ wa chi t'ɨ̃ numeropɨ.

¹⁸ Mãɨ numeropa k'ai jara bɨ k'awai k'orea k'ɨ̃risia minachia bai bɨma. Mãɨ k'ɨ̃risia minachia bɨpa k'awai bɨma k'ai k'orea jara bɨt'a. Mãɨ número ẽpẽra t'ɨ̃pɨ. Ichi número nãɨpɨ: 666.