Apocalipsi 12 - Tachi Ak'õre Pedea

Wẽra Juanpa ununa

¹ Pajãne ne jara k'ɨ̃ria bet'a unupisima. Mɨa unusima wẽrapa ɨmata p'aru jĩra jɨ̃ bɨt'a. Nãɨ wẽra k'ĩra awara bɨma chi Babilonianepema wẽra k'achia bɨ ome. Jedek'o ichi jĩru ek'ari basima. Poro jũra jɨ̃parí k'ãk'ãi k'ak'o doce ooda jɨ̃ basima.

² Mãɨ wẽra biak'oa basima. Mãɨ warra t'õitea bɨẽra mãɨ p'uapa bia basima.

³ Maapae mãicha pajãne ne jara k'ɨ̃ria bet'a unupisima. Mɨa je p'urea minachia bɨt'a unusima. Mãɨ jepa poro siete uru basima mãɨnepa k'achu diez uru basima. Poro jũra jɨ̃parí porocha jɨ̃ basima.

⁴ Ichi tu jĩnap'et'aside k'ãk'ãi perá estarik'a pajãnepa nãɨ ĩjũanea baepisima. Mãɨ je wẽra warra t'õi k'orea bɨmá bai nɨbeesima warra chak'e t'õrune mii k'orea.

⁵ Mãɨne wẽrapa ɨmɨk'ĩra warra t'õsima. (Mãɨ warrapa ichi jua chaareadepa jõma nãɨ ĩjũane berã́ ichi pedea oopiipɨ). Maamina jepa mii naena Tachi Ak'õrepa mãɨ warra ɨt'aa ateesima ichi suak'a beeparí auk'ará bɨde suak'abari bɨmá.

⁶ Maapae wẽra ĩjũa pania newẽa bɨmá mĩruwãsima. Mãma Tachi Ak'õrepa ãarea oo uru basima, 1.260 ewari ichi ak'ɨ uru p'ananamẽrá.

⁷ Mãɨya nak'ari Tachi Ak'õrepa ɨt'aripa peeda chi atepe bɨ Miguel apataɨpa chi ichi ome p'anɨrãpa chi je ome pajãne k'ĩruu p'anasima. Mãɨnepa chi jederã paara k'ĩruu p'anasima.

⁸ Maamina chi je chi ichi lawari ãarea p'anɨrãpa p'uedaé pasima. Mãɨpuru ãchi pajãne waa p'ue p'ananaé pasima.

⁹ Mãɨne chi je waibɨa bɨ mãɨnepa chi ichi lawari p'anana ãarea nãɨ ĩjũanea bat'a peesidama. Mãɨ je waibɨa bɨ mãɨt'u chi chõarãenapema taamapɨ. Chi t'ɨ̃ Tiore mãɨnepa Ãnimara apatama. Ichia chi nãɨ ĩjũane be ãarea sea uru baparima.

¹⁰ Mãɨne mɨa ũrisima aba chi pajãne jĩk'ua pedeamaa bɨt'a. Mãɨpa nãɨya jarasima: «Idi Tachi Ak'õrepa ichi ẽpẽerãt'a k'aripamaa bɨma. Idi ichi jua chaareadepa jõmãɨrã chipari baipɨ mãɨnepa ichidirã ichi juade baipɨ. Cristo ichia Tachi K'aripaparí teai jaradapa ãarea p'ueipɨ. Chi tachi ũpẽarã k'orea nemietá pedeaparit'a pajãnepa nãɨ ĩjũanea bat'a peesima. Ichia ãst'á mãɨnepa teamasi Tachi Ak'õre k'ĩrari tachi ũpẽarã k'orea nemietá pedeapachima.

¹¹ Tachi ũpẽarãpa p'uesidama chi Oveja Chak'e oa ãrinanepa mãɨnepa ichia pedeade piarã ĩjãa bɨade a bɨdepa. Ãchi piudai p'anɨne wap'eadaé pasima, maawẽapuru chi Cristo pari piudayá p'anasima.

¹² ¡Mãɨpuru chi ãarea pajãne nɨbɨ arapaat'ɨ! Maamina chi nãɨ ĩjũane nɨbɨ mãɨnepa chi p'usade nɨbɨ sõk'achiadaipɨ, tiore ãchimá chesideepuru. Tiorepa Jesú minachia tãaraa baiwẽ k'awa bɨ pẽra minachia k'ĩruu bɨma».

¹³ Chi jepa ichi nãɨ ĩjũane amaasit'a k'awasi pẽra, chi wẽra ẽp'ẽsima chi warra t'õna pada chi mãɨ nemietá ooyá.

¹⁴ Maamina jepa piawẽa oopiemaapa Tachi Ak'õrepa wẽrá ĩk'arra ume teasima ĩjũa pania newẽa bɨmá wãamari wãmẽrá. Mãma Tachi Ak'õrepa ichi ãyo ũpeak'ari ya estarik'a chi jedepema ak'ɨ uru bai k'orea ãarea oo uru basima.

¹⁵ Mãɨpuru chi jepa ichi it'aedepa pania to jĩra chepisima chi mãɨ wẽra to barrea ateewãmẽrá.

¹⁶ Maamina chi ĩjũapa chi wẽra k'aripasima. Chi ĩjũa ewak'ari maapae ãarea tosima chi jepa it'aedepa pania to jĩra chepi badat'a.

¹⁷ Mãɨpuru chi je minachia k'ĩruusima chi wẽra ome. Ara mãɨne chi wẽranepa chedaadarã ome k'ĩruune wãsima. Mãɨ chedaadarã chi Tachi Ak'õrepa oopi bɨ pedea oopataɨrãpɨ, mãɨnepa chi Jesucristopa jarateadade ĩjãapataɨrãpɨ.