Apocalipsi 10 - Tachi Ak'õre Pedea

Tachi Ak'õrepa ɨt'aripa peedapa k'art'a t'uya uru bada

¹ Mãɨya nak'ari k'ãmok'araa jĩra mɨa Tachi Ak'õrepa ɨt'aripa peeda chi atepe bɨt'a pajãnepa edá cherut'a unusima. Ichi neet'á jɨ̃ara jĩra basima. Ichi poro ɨ̃rɨ iuma jũra basima. Ichi k'ĩra ɨmata jĩra urua basima. Ichi jĩru t'ɨpɨ urua nɨbɨ jĩra basima.

² Ichi juade k'art'a chak'e ewa uru basima. Ichi jĩru juaraaripema p'usade t'ɨa nɨbasima. Jĩru juawieripema ĩjũane t'ɨa nɨbasima.

³ Maapae ichi imama arraapari jĩra jĩk'ua biasima. Mãɨya biak'ari pa bari k'ak'o siete baesima.

⁴ Pa bari k'ak'o siete baek'ari mãɨ pa baedapa jaradat'a mɨa k'art'ade bɨi pasima. Mãɨne pajãne mɨa pedea ũrisima nãɨya jara bɨt'a: «Pa baedapa bari k'ak'o siete jarada mẽra uru base. Mãɨ k'art'ade bɨrãse».

⁵ Maapae chi mɨa ununa chi Tachi Ak'õrepa ɨt'aripa peeda p'usade mãɨnepa ĩjũane t'ɨa nɨbɨpa ichi juaraaripema ɨt'aa pajãnea jirak'ari,

⁶ Tachi Ak'õre t'ɨ̃ne pedeasima. Ichia nãɨ ĩjũa, pajã mãɨnepa p'usa mãɨnepa mãɨne nɨbee sida ãarea ook'oasima. Mãɨ Tachi Ak'õre ewaricha chok'ae bɨ t'ɨ̃ne nãɨya jarasima: «Tachi Ak'õrepa jarada tãaraawẽa bɨde jõma mãɨyaipɨ.

⁷ Chi ichi pari pedeapataɨrã, ichiaba chi ichi pae pari mimiapataɨrãpɨ. Naena Tachi Ak'õrepa ãchiá jarapachima ichia k'awapiwẽa bɨ k'aadea ãarea mãɨyait'a. Tachi Ak'õrepa ɨt'aripa peeda chi k'aadeapemapa ãnimara k'achu chaarude piarã jõma mãɨyaipɨ».

⁸ Maapae chi pajãne pedea mɨa naena ũrinapa mãicha nãɨya jarasima: «Chi Tachi Ak'õrepa ɨt'aripa peeda jĩru aba p'usade mãɨnepa jĩru aba ĩjũane t'ɨa nɨbɨpa k'art'a chak'e ichi juade ewa uru bɨ atade wãse».

⁹ Ara mãɨne chi Tachi Ak'õrepa ɨt'aripa peedamá wãk'ari mɨa idisima k'art'a chak'e teamẽrá. Ichia p'anoosima: «Jitase. K'ose. Pɨ it'aede jɨrrɨjõ jĩra k'ũaa baipɨ, maamina pɨ bide asia beeipɨ».

¹⁰ Mãɨ k'art'a chak'e chi Tachi Ak'õrepa ɨt'aripa peeda juadepema jitak'ari k'osima. Mɨ it'aede jɨrrɨjõ jĩra k'ũaa basima maamina k'ok'ari mɨ bide asia beesima.

¹¹ Maapae mɨá jarasima: «Pɨa mãicha Tachi Ak'õre pari pedeai bɨma p'uuru chok'ará mãɨyai bɨ k'orea, tuacha mãɨyai bɨ k'orea, pedeacha mãɨyai bɨ k'orea, ya poro jũra jɨ̃parí jɨ̃ p'anɨrã k'orea pida».